كنت بدأت معاكم سلسة من طرق متعددة للتوفير إن شاء الله تصلح في أي مكان مش بس أمريكا وكندا
واليوم نكمل بإذن الله
الفكرة الرابعة – المنظفات المنزلية
أوقات لما بنتزنق ماديا وبنقلل تكاليف معيشتنا وبنقول خلاص شدينا الحزام ومفيش حاجة تانية نقدر نعملها وبننسى بند صغير وهو المنظفات
بالتأكيد محدش بيحب يعيش في بيت مش نضيف وإحنا العرب مهووسين بنضافة البيوت وعندنا بدل المنظف ١٠ والحمد لله دلوقتي فيه منظف لكل شيئ والموضوع فعلا مغري والشركات بتلعب على الوتر الحساس ده .. لكن تعالو نبص بنظرة متعمقة شوية .. كل اللي محتاجينه تقريبا للتنضيف هم شوية خل وبيكنج صودا!!! آه والله الإتنين دول بيعملوا المعجزات فعلا
ممكن نحتاج بعض الإضافات التانية .. زيوت عطرية .. ووشينج صودا – ولو إننا ممكن برضه نعمله في البيت – أو مثلا بوراكس وهكذا لكن كلها حاجات مقدور عليها
طبعا المنظفات اللي بنشتريها بتبقى ليها رائحة أحسن ويمكن تكون بتنضف أحسن شوية بس صدقوني ده على حساب صحتنا بيكون محطوط فيها مواد كيماوية تانية
هل فعلا عمل المنظفات في البيت موفر؟
الإجابة هي بإختصار إذا كنتم بتشتروا مثلا ٤ منظفات فقط كل شهر نقول مثلا صابون غسيل المواعين – جلانس- بليدج وصابون غسيل الملابس ودي تقريبا أساسيات في أغلب البيوت ممكن تعملوهم والتكلفة هتقف عليكم بربع الثمن أو أقل إجمالا
أما لو كنتم في أمريكا أو كندا وبتقدروا تعملوا ديلز حلوة بإستخدام الكوبونات مع العروض وتقف عليكم الحاجات دي بملاليم يبقى كده مش هتوفروا التوفير فقط هيكون في صحتكم وفي تقليل الكيماويات من البيت خصوصا لو عندكم صغار
منين نقدر نجيب أفكار ووصفات مضمونة؟
كلمة مضمونة دي كلمة نسبية جدا يعني ممكن وصفة تكون بالنسبة لي حلوة وبالنسبة لغيري لا مش محققة مستوى النظافة اللي هم عايزينه علشان كده جربوا وصفة وإتنين وتلاتة لغاية لما ترتاحوا على وصفة معينة
Leave a Reply