أفكار إقتصادية للتوفير

 

أهلا بيكم من جديد ومع فكرة جديدة من أفكارنا الجديدة للتوفير

 

فكرة اليوم هي زراعة اللي نقدر عليه بالبيت

 

زراعة الخضروات في البيت أحيان كتيرة بتكون إقتصادية أكتر لكن محتاجة وقت ومجهود وكمان محتاجة مساحة وحديقة كبيرة شوية لكن من الممكن نبدأ على صغير ونزرع مثلا في أصاري الزرع جوة البيت عند المطبخ وممكن في البلكونات لو الجو يسمح بكدة تعالوا نشوف إيه وإزاي ومنين

 

أولا : أسهل حاجة للزراعة هي الخضرة

الخضرة ( بضم الخاء وتسكين الضاد ) هي ببساطة الأعشاب اللي بنستخدمها دايما في المطبخ زي مثلا البقدونس- الكزيرة الخضرا – الشبت – الروزماري-الريحان – النعناع … وهكذا .. ودي بعض المواضيع تساعدكم علشان تبدأوا .ز إضغطوا على الصورة

 

ثانيا: خلينا نآخدها تدريجيا

بلاش تآخدكم الحماسة – وده وارد جدا – وتزرعوا ١٥ صنف مرة واحدة إبدأوا واحدة واحدة وإتعلموا وإنتم شغالين .. كل مرة هتزرعوا حاجة هتتعلموا حاجة مختلفة وتكتسبوا خبرة أكبر

الموضوع ظريف جدا وجميل وفعلا لما بنشوف الزرع بيطلع بنتبسط جدا أنا مرة زرعت كوسة في البلكونة عندي في مصر.. طرحت كوسايتين بحالهم بس ده طبعا لأني كنت مستعجلة وما أخدتش الموضوع واحدة واحدة علشان أفهم بس فعلا حاجة جميلة وإحساس ظريف

ثالثا : خلوا أولادكم يزرعوا معاكم

الأولاد بيكونوا فرحانين ومبسوطين لما يزرعوا حاجة ويشوفوها بتكبر يوم بعد يوم وبيحسوا بالفخر والسعادة إنهم شاركوا في عمل زي دة … طيب يبقى نستغل الموضوع ده ونكلفهم بأعمال ومتابعة للمزروعات بتاعتنا

 

 رابعا : تابعوا مدونات عن الزراعة المنزلية

تابعوا بعض البلوجات والمدونات المهتمة بالزراعة المنزلية ويا ريت لو كانت بالولاية أو المنطقة اللي إنتم فيها علشان تكونوا على نفس الخط يعني من ناحية الجو وإيه اللي يتزرع وإمتى وكدة

 

 Urban Organic Gardening.

66squarefeet

City Garden

 وفي النهاية أتمنى فكرة اليوم تكون عجبتكم وإستفدتوا منها .. لقراءة باقي السلسلة إضغط هنــــا

 

أهلا بيكم من جديد ومع فكرة جديدة من أفكارنا الجديدة للتوفير

 

فكرة اليوم هي توفير إشتراك الجيم وخلينا ننتظم في الرياضة بالبيت

 

الحمد لله فيه إزدياد في الوعي الصحي والإحساس بضرورة المداومة على التمارين الرياضية وفي سبيل كده ناس كتير بتشترك في النوادي الرياضية للمداومة على عمل التمارين .. لو بنمر بأزمة مادية سهل جدا نستمر في التمارين بدون ما ندفع إشتراك الجيم تعالوا نشوف الوسائل اللي ممكن نعمل بيها جيم مخصوص في المنزل

 

أولا : عليكم وعلى اليوتيوب

اليوتيوب مليان قنوات للرياضة فيها كل شيئ من أول الزومبا لليوجا للتمارين الرياضية وهكذا وكله فري وبدون أي فلوس منكم كل اللي عليكم تفتحوا اليوتيوب وتخصصوا وقت في اليوم من القنوات المشهورة الحلوة

* Spark People.

* Fitness Blender.

* XHIT Daily.

* ReFitRev.

ثانيا: مش عايزين يوتيوب .. إتمشوا

المشي المشي المشي .. أسهل وأرخص وسيلة لحرق السعرات الحرارية وببلاش .. المشي ليه فوائد عديدة غير حرق السعرات الحرارية .. ممكن الأزواج يتمشوا مع بعض وأهه فرصة نتكلم برة البيت في كل اللي بيدور في عقولنا وقلوبنا مع بعض .. ممكن نتمشى مع الأصدقاء ودي فرصة للتقريب بيننا والود

ممكن نتمشى لوحدنا ونستغلها فرصة للتفكير والتأمل وإعادة ترتيب الأوراق .. للتفكر في خلق الله من طيور وأشجار والتسبيح والتكبير .. ممكن قوي نسمع درس ديني أو حتى أخبار وإحنا بنتمشى

 

ثالثا : لا يوتيوب ومفيش عندي مكان أتمشى

دوروا على  روتين يومي أو إسبوعي للتمارين الرياضية وإتبعوه .. إدخلوا على بينتريست وإعملوا بحث هتلاقوا مئات من الخطط اليومية للتمارين الرياضية

 

 رابعا : إعملوا داونلود لتطبيقات فري

فيه تطبيقات كتيرة فري على أجهزة الآندرويد أو الأبل لمتابعة عمل التمارين الرياضية مثل

•  JEFIT.
• Nexercise
• Runtastic Six Pack Abs
• Johnson & Johnson Official 7 Minute Workout App
• Fitocracy
• Workout Trainer.

 وفي النهاية أتمنى فكرة اليوم تكون عجبتكم وإستفدتوا منها .. لقراءة باقي السلسلة إضغط هنــــا

 

أهلا بيكم من جديد ومع فكرة جديدة من أفكارنا الجديدة للتوفير

 

فكرة اليوم هي أكل الشغل والمدرسة يكون من البيت

 

أفكار اللانش بوكس للأولاد

 

زمان لما كنت بأشتغل في مصر كنا على الأقل كل يوم نصرف ٢ جنية على اللانش بتاعنا في الشغل وده بالقليل أنا بقى لو قابضين وحبينا نبحبح كانت بتوصل لها ٧ و٨ جنية وده كان يا مكان في سالف العصر والأوان من ييجي ١٠ سنين يعني طبعا الأرقام دي تتضرب دلوقتي في ٣ مثلا؟

 

الوضع  هنا كالتالي في مدرسة الأولاد اللانش اليومي بـ ٢.٥ دولار تقريبا مضروب في ٥ أيام يبقى ١٢.٥ دولار للطفل الواحد ده على إعتبار إنهم مش هيآخدوا تاني يعني هيآكلوا مرة واحدة فقط

بالنسبة لزوجي أي لانش في الشغل هيبقى أقل حاجة ٤ دولار في ٥ أيام يبقى المجمل ٢٠ دولار يعني زوجي والطفلين ٤٥ دولار بالقليل كل أسبوع ولسه بقى لما التالت يدخل هو كمان المدرسة

 

البدايــة

من فترة أخدتني الحمية وقلت العيال دي لازم تعتمد على نفسها بقى وقلت لهم كل يوم الصبح كل واحد يحضر اللانش بوكس بتاعه … اللي حصل إنهم إستجابوا أول أسبوعين … تلاتة … شهر وبعدين بدأ كل واحد يقول لي هآكل في المدرسة .. طبعا فهمتوا اللعبة

 

 الأساتذة طبعا مكسلين يعملوا اللانش بوكس وبالتالي الحل الوحيد اللي قدامهم هنآكل في المدرسة ويروحوا يآكلوا أي كلام وما يخلصوش الأكل لأنه طبعا مش عاجبهم وندفع الفلوس وخلاص وإسمهم أكلا في المدرسة

 

  الفكرة

ومن هنا جات لي فكرة نميسة متعبة شوية لكن نميسة وموفرة بأتبعها بقالي تقريبا شهر أهه والله المستعان

في خلال وقت طبيخ الفريزر للأسبوع بتاعي أقوم أعمل ٢-٣ رغيف فرنش لوف أو أشتريه من برة لو مفيش وقت وكالعادة بنشتري كل أسبوع جبنة ولانشونات مثلا وحاجات من اللي الأولاد بيحبوها

وأفتح اللوف وأحط فيه مايونيز /شرائح خس/ لانشون/ جبنة / بيضة … اللي بيحبوه هم وزوجي وبعدين أقسم اللوف ل ٥ أو ٦ ساندوتشات وبالتالي بيكون عندي تقريبا في المتوسط ١٦ ساندويتش جاهزين للأسبوع أغلفهم بالفيلم و أقسمهم في علب التلاجة 

 

كمان بقالي أسبوعين بأعمل كوكيز في يوم الطبيخ العالمي بتاعي وكل يوم وهم خارجين كل واحد بيآخد له ٢واللا تلاتة في كيس معاه .. ومع تفاحة أو كمثرى أو أي فاكهة كده بأسهل عليهم إنهم يعملوا لنفسهم اللانش بوكس وبأوفر من الميزانية نقول مش أقل من ٢٠ لـ ٢٥ دولار أسبوعيا

 

لو عايزين هوت لانش ممكن أعمل لهم هوت دوج أو كفتة وتنبقى ساندوتشات برضه أو ممكن في علبة مع شوية مكرونة بس أنا أولادي بيفضلوا الساندوتشات في المدرسة

 

أفكار كتير للانش

أفكار كتير للسناكس

 

أفكار كتير لوجبات اللانش بالفريزر

الموضوع هيبقى متعب شوية في الأول ومحتاج شوية تخطيط وتنظيم وترتيب ممكن نعمله وإحنا بنعمل ترتيبات المنيو للأسبوع لكن حقيقي مريح باقي الاسبوع وغير كده كمان موفر جدا جد

هااه إيه رأيكم في فكرة اليوم ؟ أتمنة تكون عجبتكم وأتمنى أسمع رأيكم .. تعليقاتكم بتسعدني دوما

كلنا بنمر بأزمات مادية وساعات بتكون طاحنة .. وبعض الناس مش بيعرفوا يتعاملوا مع الأزمة – وأنا كنت منهم – وبنحس إننا قدام حيطة سد زي ما بنقول في مصر .. خلاص مفيش حاجة تانية نقدر نعملها مش عارفين نلم المصاريف ومش قادرين نوفر أكتر من كدة .. لكن الحقيقة بيكون لسه فيه شوية من هنأ على شوية من هناك علشان نعدي الأزمة ونخرج منها سالمين إن شاء الله .. قبل كده تشاركت معكم بعض الأفكار اللي إتعلمتها في خلال رحلتنا المضنية .. واليوم أتشارك معكم أفكار أخرى ينفع تتطبق مش فقط بأمريكا .. أتمنى تفيدكم

أهلا بيكم من جديد واليوم ميعادنا مع الفكرة التاسعة إن شاء الله

 

شراء النضارات الطبية أونلاين

الحقيقة الفكرة دي مش من بنات أفكاري .. الفكرة دي قالت لنا عليها زميلة زوجي في العمل … من حوالي ٦ سنين كده إبني الكبير إكتشفنا إن نظره ضااايع وطبعا روحنا عملنا كشف نظر وخلافه وإشترينا النضارة من عند الدكتور ودفعنا فيها مبلغ محترم لأن هنا الدكاترة عندهم النضارات بتكون ماركة وغالية ناااار

بعد أقل من سنة ضاعت النضارة أم ٢٠٠ دولار وكانت طبعا صدمة ما بعدها صدمة ما لاقيناهاش خالص .. وبالتالي كان لازم نضارة تانية

واحدة زميلة زوجي في العمل قالت له إشتري النضارات أونلاين بالذات للأطفال ما يستاهلش الموضوع ماركة والكلام ده لأنهم بيضيعوها وبيكسروها وبتبقى خساؤة والفرق كبير فعلا

 

 طيب نشتري منين النضارة؟ عايزين حد كويس

 فيه ويب سايتس كتيرة ومنها الويب سايت ده عنده بوجو تقريبا على طول وده إشترينا منه قبل كده ومضمون

كمان زيني أوبتيكال هايل ومضمون جدا جدا وأيضا كوستال جربناه وحلو

 إسألوا حواليكم كمان ممكن الناس تدلكم على ويب سايتس تانية وكويسة أتعاملوا معاها

 

 المميزات والعيوب

 كل حاجة ليها مميزات وعيوب وإنتم عليكم الإختيار

دطبعا الميزة الخطيرة هي السعر .. ممكن تجيبوا نضارة بالشحن تقف في حدود ٢٥ دولار أو ٣٠ لكن عند أي دكتور أو سنتر مش بتبقى أقل من ٢٠٠ دولار وده سعر خرافي فعلا

 

 أما العيب الواضح طبعا هو إننا مش بنجرب النضارة ولا شكل الفريم على وشنا .. بالنسبة للناس اللي بتحب التوفير زيي كده الموضوع ده مش مهم بالذات للأطفال يعني مش هنجيب نضارة تقلب شكلهم تخليه وحش !!! بالتقريب كده فريم لطيف وصغير واللون اللي بيحبوه وخلاص مش كيميا يعني زي ما بنقول لكن فيه ناس مش بتحب كده وبتحبكها حبتين يبقى الموضوع ده مش هينفعهم

 

حاجة تانية مهمة وهي إنكم لما بتعملوا أوردر أونلاين لازم تدخلوا كل القياسات من نفسكم .. يعني لو فيه مقياس ناقص في الورقة بتاعة الدكتور بتضطروا تكلموه وتآخدوا كل المقاييس منهم .. وبرضه فيه ناس مش بتحب كده وبتخاف إن النضارة تطلع مش مظبوطة

 

على العموم إقرأوا كويس جدا عن الشركة قبل ما تعملوا أوردر وشوفوا الناس بتقول إيه .. عن نفسي أنا بأفضل بالذات الناس اللي عندهم أطفال بيلبسوا نضارات زيينا إنكم تشتروا أونلاين لأن الأطفال بيستهلكوا مش أقل من نضارتين في السنة

 

بالنسبة لينا التجربة كانت ناجحة والحمد لله ووفرت معانا فلوس كتير والسنة دي بالتأكيد هتوفر لأن عدد أفراد الأسرة اللي هيلبسوا نضارة إرتفع لـ ٤ أفراد يعني العيلة كلها نظرها شيش بيش هههههههلو قلنا كل واحد حيجيب نضارة واحدة بس بـ ٢٠٠ دولار هيبقى خراب بيوت مستعجل واللا إيه رأيكم؟

 

أتمنى تكون فكرة اليوم نفعتكم وتستفيدوا منها ولو عندكم أي إقتراح في موضوع النضارات والعدسات اللاصقة ده يا ريت تفيدونا.. شكرا لكم .. وطبعا عارفين إن تعليقاتكم بتسعدني

لقراءة باقي السلسلة

 

كلنا بنمر بأزمات مادية وساعات بتكون طاحنة .. وبعض الناس مش بيعرفوا يتعاملوا مع الأزمة – وأنا كنت منهم – وبنحس إننا قدام حيطة سد زي ما بنقول في مصر .. خلاص مفيش حاجة تانية نقدر نعملها مش عارفين نلم المصاريف ومش قادرين نوفر أكتر من كدة .. لكن الحقيقة بيكون لسه فيه شوية من هنأ على شوية من هناك علشان نعدي الأزمة ونخرج منها سالمين إن شاء الله .. قبل كده تشاركت معكم بعض الأفكار اللي إتعلمتها في خلال رحلتنا المضنية .. واليوم أتشارك معكم أفكار أخرى ينفع تتطبق مش فقط بأمريكا .. أتمنى تفيدكم

 

أهلا بيكم من جديد واليوم ميعادنا مع الفكرة الثامنة إن شاء الله

 

الصورة دي شفتها هنـــا وعجبتني قلت أنقلها لكم

لا حقيقي .. طبعا مش كل الناس كده ومش عايزين نعمم لكن فيه ناس فعلا لو ما أكلتش لحوم يبقى ما أكلتش!!! حاجة غريبة جدا طيب ده أنا أعرف ناس مش بتعتبر الهامبرجر والهوت دوج غدا!! ويقولوا ما ينفعش لازم المحمر والمشمر

 

اللحوم بند مهم مش هنختلف لكن الواحد مش محتاج كل ده كل يوم وكمان مش محتاجين لحوم كل يوم ممكن قوي نستيدلها بحاجات تانية وبروتين من نوع آخر

 

تخيلوا لو كل أسبوع قللتوا بس واحد باوند لحمة أو فراخ بأسعار هنا وبدون عروض أو كوبونات هنوفر من ٢ لـ ٤ دولار في الأسبوع يعني أكتر من ١٠٠ دولار في السنة .. ومش هتشعروا بفرق صحيا ولا هتتعبوا بالعكس يمكن تكونوا أكثر صحة تعالوا أقول لكم شوية أفكار تساعدكم على تقليل اللحوم في المنيو

 

أولا :: لازم كل أسبوع يبقى فيه يوم بدون لحوم

أو أكثر طبعا حسب رغبتكم .. لكن حقيقي لازم يكون فيه يوم على الأقل بدون لحوم ممكن تآكلوا أي حاجة تانية .. بدعوا في أطباق من البيض والفول والطعمية ثم إن ماله الكشري جميل ولذيذ والكل بيحبه

لو مش عارفين تآخدوا الخطوة .. حطوا قدامكم هدف مثلا عايزين نقلل من المصاريف علشان نطلع رحلة حلوة السنة دي .. أوهدف نبيل مثلا هنقلل التكاليف علشان نتبرع بالفرق لمؤسسة خيرية زي مؤسسات اللاجئين السوريين  أو لأهداف صحية أو علشان نعلم أولادنا إن فيه ناس في الدنيا دي مش بتلاقي اللحمة كل يوم ولازم نشكر ربنا على اللي إحنا فيه وهكذا

ثانيا : بدلوا اللحوم وبالبقوليات تدريجيا لغاية ٥٠٪ أو أكثر

البقوليات تعتبر بديل مغذي ومشبع للحوم في الأيام العجاف اللي حصلت لنا كنت أوقات بأخلط بعض من العدس الأسود المطبوخ باللحمة المفرومة ومحدش أخد باله وده إعتراف على فكرة إبدأوا بـ ٢٠٪ مثلا

جربوا أطباق من المطبخ المكسيكي فيها فول كتير وأهه بتجربوا أطباق جديدة وموفرة .. ممكن كمان لو بتحبوا إستخدموا المشروم مع البقوليات

 

ثالثا: مش ضروري الطبق الرئيسي يكون لحوم

بمعنى إننا ممكن نآكل لحمة مفرومة معصجة فوق مكرونة أو مكرونة بشاميل ومش لازم لحمة معاها وزي ما قلت لكم نخلط معاها عدس إسود صغير مش هيبان وهيؤدي نفس الغرض

 

رابعا : إستخدموا قطعيات رخيصة في اللحوم

صدور الدجاج هي أغلى حاجة في الدجاج .. والفرخة اللي على بعضها بالعضم هي أرخص حاجة .. ممكن قوي نجيب فرخة كاملة ونتعلم نخليها إزاي واليوتيوب عليه مليون فيديو في الموضوع ده ونآخد العضم نعمل منه شوربة

 

وفيه عندي مجموعة من الأطباق كنت عملتها من تحدي ال٦ * ٦ لو فاكرينه

بالنسبة للحمة هنلاقي اللحمة المفرومة هي أقل سعر وبعدها قطعيات معينة بتكون ناشفة شوية ممكن نجيبها ونهريها على البوتجاز أو لو عندكم حلة الضغط هتستوي بسرعة

فكرة تانية برضه بأعملها بأخلط لحمة مفرومة مع لحم التركي المفروم لأنه أرخص وصحي أكتر ممكن تبدأوا بنسبة ٣٠٪ تركي مفروم والباقر لحمة لغاية لما توصلوا للنسبة المعتمدة عندي وهي ٥٠ – ٥٠

فيه ويب سايتس كتيرة فيها وصفات إقتصادية زي ده مثلا نقدر نآخد منها أفكار ونعدلها حسب مزاجنا

الموضوع ساعات بيكون صعب علينا لإختلاف طبائعنا عن طبائع الأجانب والطعم الل إحنا متعودين عليه لكن خليكم دايما مرنين جربوا كميات صغيرة واللي يعجبكم يبقى نكرره كل فترة

 

خامسا :: البيتزا

أهي دي بقى الكل بيحبها ونقدر ننوع فيها وبتآخد لحمة أقل لو حبينا نعملها باللحمة وممكن نعملها بالتونة

ممكن نعمل مناقيش , ميني بيتزا , بيتزا بوكيت , بيتزا في الطاسة , بيتزا سريعة بالخبز الفرنسي … الأفكار لا تنتهي وممكن تبدأوا بعجينة العشر دقائق وتنطلقوا من هناك

 

أتمنى أكون أفدتكم بفكرة اليوم ويا ريت لو حد عنده أي فكرة تانية للتقليل من إستهلاك اللحوم يتشارك معانا بيها في التعليقات وشكرا ليكم .. تعليقاتكم دايما بتسعدني

باقي السلسلة من هنـــــا

 

كلنا بنمر بأزمات مادية وساعات بتكون طاحنة .. وبعض الناس مش بيعرفوا يتعاملوا مع الأزمة – وأنا كنت منهم – وبنحس إننا قدام حيطة سد زي ما بنقول في مصر .. خلاص مفيش حاجة تانية نقدر نعملها مش عارفين نلم المصاريف ومش قادرين نوفر أكتر من كدة .. لكن الحقيقة بيكون لسه فيه شوية من هنأ على شوية من هناك علشان نعدي الأزمة ونخرج منها سالمين إن شاء الله .. قبل كده تشاركت معكم بعض الأفكار اللي إتعلمتها في خلال رحلتنا المضنية .. واليوم أتشارك معكم أفكار أخرى ينفع تتطبق مش فقط بأمريكا .. أتمنى تفيدكم

 

أهلا بيكم من جديد واليوم ميعادنا مع الفكرة السابعة إن شاء الله

: أكل البيبي من البيت

 

أكل البيبي مغري جدا للشراء في البرطمانات الصغيرة شكلها كيوت  وفيها متنوعات كتيرة ومنها الأورجانيك ومنها غير والبسكوتات والسريال والبافز اللي بالزبادي و و حاجات كتيرة أشكال وألوان فاكهة وخضار ولما يكبروا شوية بتلاقوا اللحوم المختلفة مخلوطة مع الأرز والخضروات ووجبات جميلة ومغذية وسهلة نآخدها معانا في أي مكان …بس للأسف غالية ومكلفة جدا جدا

طبيب الأطفال هنا في أمريكا كان قال لنا إن الأكل المعلب الجاهز يضمن نضافته لأنه عليه قواعد وتفتيش عالي جدا من وزارة الصحة هنا .. لكن ده مش الحال في كل الدول بالتأكيد .. وبعدين كل أم بتكون حريصة على النضافة لما بتعمل أكل لأطفالها .. لو الماديات مش مشكلة يبقى إشتروا الأكل الجاهز – لو ضامنين نضافتها – إنما لو عايزين توفروا إغسلوا إيديكم كويس وإغسلوا العلب كويس وتوكلوا على الله وإعملوا الأكل في البيت هتوفروا مبالغ كبيرة

 

: كيف أبدأ

طبعا إسألوا طبيب الأطفال لكن انا هأقول لكم مع أطفالي التلاتة بدأت إزاي .. ملحوظة أطفالي والحمد لله كانوا بصحة جيدة ومفيش مشاكل عندهم أو حساسية لأي شيئ

ولله الحمد أنا كنت بأرضع أطفالي طبيعي حتى تقريبا ٩ شهور في المتوسط وبداية من ٤-٥ شهور أبدأ بالسيريال الخفيف للأطفال وطبعا أنا كنت بأشتريه لأني عمري ما خطر ببالي إنه ممكن يتعمل في البيت!! أيوة بيتعمل في البيت

 

بتقول لما إزاي نقدر نعمله Homemade ginger من هنا هتلاقوا

فكرة رهيبة وذكية فعلا وموفرة بشكل كبير بالذات لأن السيريال بتاع الصغيرين ده بيتباع في علب صغيرة وممكن نوع ما يعجبش الطفل ونبقى إشترينا العلبة على الفاضي أو ساعات بيحبها الأطفال وبتخلص بسرعة جدا

: الخطوة التالية

بعد كده بنبدأ واحدة واحدة ندخل الخضروات والفاكهة صنف صنف وبعدين نخلط صنفين ثم تلاتة مع بعض وشوية شوية بنبدأ نعمل وجبات مع الأرز والبروتين

فيه مئات الوصفات على الإنترنت وبالذات البينتريست لعمل وصفات الأكل المحببة للصغار وطرق التفريز

 

 

إزاي بتعمل الفروزن يوجورت بايتس homegrownandhealthy ومن هنــا بنشوف

 

الجولد فيش!!! أو كراكرز الجبنة .. لازم أجربها إن شاء الله

 

أكياس الأكل البيورية!! كمان ممكن نعملها .. وجدت جهاز هنا ظريف جدا ومش غالي مقارنة بالتوفير

 

وصفات كتيرة جدا جدا وممكنة ومش صعبة لو عندكم بيبي تقدروا تعملوا الأكل في البيت لغاية لما يبدأ يآكل معانا على الترابيزة ونفتفت له من الأكل بتاعنا

 

هل فعلا بنوفر ؟؟

الإجابة هي بالتأكيد ولو ما إستخدمناش كوبونات ولا أي شيئ يبقى التوفير من ٤٠٪ لـ ٥٠٪ على حسب نوعية الطعام وإذا كان أورجانيك أو لأ وفي السيزون واللا لأ

 

أتمنى أكون قدرت أفيدكم النهاردة بمعلومة جديدة ووفرت عليكم شوية في تكاليف الحياة .. والله المستعان

تعليقاتكم بتسعدني .. أتمنى ما تبخلوش علي بيها وبأي فكرة تقترحوها.. باقي السلسلة من هنـــــا

كلنا بنمر بأزمات مادية وساعات بتكون طاحنة .. وبعض الناس مش بيعرفوا يتعاملوا مع الأزمة – وأنا كنت منهم – وبنحس إننا قدام حيطة سد زي ما بنقول في مصر .. خلاص مفيش حاجة تانية نقدر نعملها مش عارفين نلم المصاريف ومش قادرين نوفر أكتر من كدة .. لكن الحقيقة بيكون لسه فيه شوية من هنأ على شوية من هناك علشان نعدي الأزمة ونخرج منها سالمين إن شاء الله .. قبل كده تشاركت معكم بعض الأفكار اللي إتعلمتها في خلال رحلتنا المضنية .. واليوم أتشارك معكم أفكار أخرى ينفع تتطبق مش فقط بأمريكا .. أتمنى تفيدكم

 

أهلا بيكم من جديد واليوم ميعادنا مع الفكرة السادسة إن شاء الله

 

 : التخطيط للمنيو الإسبوعي أو الشهري

مين فينا ما بيزهقش من الطبيخ؟ والسؤال المريع اللي بييجي على بالنا كل يوم الصبح … هنآكل إيه النهاردة؟ ويا سلام بقى لو كنا برة البيت ومفيش حاجة في البيت .. هنعمل إيه غير إننا نجري على التيك أواي

أنا أعرف ناس مش هنا في أمريكا فقط لأ وفي مصر كمان بيشتكوا من المصاريف .. لكن تيجي على الأكل كل يومين دليفري من مكان!!! ولو كلمناهم في الموضوع ده يزعلوا ويفتكروا إننا بنبص لهم في الأكل هههه

لو معاكم فلوس ومش مشكلة معاكم يبقى خلاص كل واحد أدرى بنفسه لكن ما تشتكوش من المصاريف!! واللا إيه؟ حتى الأكل كتير من برة مش حلو ومش صحي ومش معروف مصدره وبلاويه كتير

أنا قبل كده كنت كلمتكم عن موضوع التخطيط للمنيو ده .. ومهما قلت لكم قد إيه إستفدت منه مش هأقدر أوفيه حقه

التخطيط للمنيو الإسبوعي أو الشهري يوفر الكثير جدا أكثر مما أقدر أقول لكم ماديا وعصبيا ويوفر المجهود والوقت

بالنسبة لي أنا بأعمل الأكل يوم السبت أو الأحد للاسبوع يعني مثلا كفتة – فراخ-تتبيل لحمة أو صواني وتوضع بالفريزر ونطلعها يوم الأكل برة أو قبلها بليلة تفك ونسويها يومها إذا كانت غير مستوية

عدم التخطيط للمنيو بيخلينا نخرج نشتري أي حاجة وبكميات غير مناسبة وبدون ترتيب أو تنظيم

 

أوراق فري للمساعدة في التخطيط للمنيو

 

أنا أخطط للمنيو تبعا لما هو موجود عندي بالفريزر .. ثم أتجه للي عليه تخفيضات بالستورز هذا الأسبوع .. مفيش لا ده ولا ده يبقى نشوف معانا فلوس قد إيه نشتري ليومين مثلا لحمة أو فراخ والباقي نمشيها كشري / بيتزا / تونة / فول وبيض وهكذا يعني خليكم مبدعين وإقدحوا زناد فكركم حلوة دي مش كدة؟

لما نتمرس في موضوع التخطيط للمنيو الإسبوعي ممكن نتجة للتخطيط الشهري يعني بدل ما كل أسبوع نعملها كل شهر أو كل أسبوعين وهكذا

الإنترنت مليانة وسائل معينة وأمثلة على المنيو الإسبوعي لكن المشكلة إنها في أغلبها بتكون من مواقع أجنبية وبيآكلوا حاجات مش بنعملها أو مش بنحبها و علشان كده أنا عملت هنا في مغتربة جزء للمنيو الإسبوعي لإعطاءكم بعض الأفكار لمساعدتكم ودي البورد من بينتريست للمتابعة

Follow Amira’s board المنيو الأسبوعي on Pinterest.

 

الموضوع قد يكون صعب في الأول لكن ما تيأسوش مفيش حاجة بتكون ١٠٠٪ من الأول ولا حتى بعد مليون مرة .. يعني برضه حتى بعد ما تتمرسوا ممكن تخرم منكم لكن مهما كان التخريم مش هيكون زي ما نسيبها كده زي ما تيجي تيجي

 

أتمنى تكون فكرة اليوم عجبتكم وأفادتكم وأشوفكم المرة اللي جاية إن شاء الله