السلام عليكم
أتمنى النهاردة تكونوا أحسن ومش مكتئبين وإن البوست اللي فات يكون رفع من روحكم المعنوية شوية
تفكيـــــر
بعد اللي حصل شعرت إن الدنيا دي فعلا ما تساويش جناح بعوضة
الموت حق…. أنا عارفة فكل من عليها فان ويبقى وجه ربك ذو الجلال والإكرام
بييجي في أي لحطة …. برضه عارفة
الإنسان بين نفس طالع ونفس داخل .. يا يطلع ما يدخلش يا يدخل وما يطلعش
محدش خالد في الدنيا ولا الدنيا بتقف علشان حد أبدا أبدا
كما أعلم أن كل مصيبةٍ دون مصيبتنا بموته صلى الله عليه وسلم تهون , فبموته صلى الله عليه وسلم انقطع الوحي من السماء إلى القيامة وبموته انقطعت النبوات وبموته ظهر الفساد
كله كلام عارفاه .. لكن بعقلي فقط مش بقلبي … عندي يقين إننا كلنا هنموت لكن يقين عقلي مش قلبي .. لما جت المصيبة عندي ما صدقتش وما تخيلتش إننا فعلا ما نساويش للدرجة دي.. وده بالتأكيد من ضعف نفسي وضعف إيماني ويقيني بالله
كل الناس في مصر وهنا وكل الصديقات والإيميلات كان كلها تقريبا فيها كلمة مشتركة وهي حديث سيدنا رسول الله ” إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له،” رواه مسلم
وكل الناس طبعا شجعتني بالحث على الدعاء وقراءة القرآن والتصدق وخلافه .. وجزاهم الله جميعا خيرا فكانت خير الوصية والحمد لله
وقررت فعلا إني خلاص هأعتزل المنتديات ومغتربة وهأتفرغ الباقي من حياتي لنفسي ولوالدي بالدعاء والصلاة وقراءة القرآن
تفكيــر أعمق
وفكرت في نفسي … لما أموت بالتأكيد هينقطع عملي … تفتكروا أولادي هيدعوا لي؟ ده لو إفتكروا أساسا
مين هيعلمهم يدعوا لي .. هل سمعوا بالحديث ده؟ حديث؟!!! هم يعرفوا أصلا يعني إيه حديث؟ أصلا معرفتهم بسيدنا محمد معرفة سطحية جدا .. هو اللي علمنا القرآن وعلمنا الإسلام وبس!!! يا سلام على تربيتي الجميلة ليهم
يا خبرررر أنا فعلا في ورطة… كمان ولادي أولاد يعني هيكبروا ويبقوا رجالة إن شاء الله.. وهيكونوا مسئولين عن أسرة وعندهم شغل و و … بصراحة البنات في الحاجات دي بتكون أحرص من الولد
والبلوة هتبقى أكبر لو تزوجوا أجنبيات غير مسلمات ولم يعينوهم على أمر دينهم وعلى طاعة الله ويا سلام بقى لو رزقهم الله ذرية وتركوها لزوجاتهم يربوها تربية غير إسلامية .. والأمثلة أمامنا في الغربة كتير .. الله يحفظهم وأولادكم من التردي في هذه الهوة
طيب أعمل إيه؟؟ لازم ألحق نفسي في اللي باقي من عمري حتى لا ينقطع عملي
تفكير أكثر عمقا
قالت لي صديقة مقربة جزاها الله عني خيرا .. إن كل عمل خير تقومين به فلأبيك وأمك ثواب منه.. لأنهم من علموكي وربوكي على حب الخير .. ولقيته كلام سليم .. يبقى لازم أبدأ بأولادي
مش كفاية إنهم بيتعلموا القرآن مع الشيخ عن طريق سكايب من مصر ..ولا إني بأحاول معاهم في العربي في البيت .. البيئة العربية المسلمة الصحيحة مش موجودة حواليهم وهم مش بيروحوا مدرسة الأحد أو السبت لأسباب كتير مش وقتها .. يبقى لازم أنا أخلق لهم البيئة دي في البيت ولازم أنا أقوم بتدريس التربية الدينية ليهم بالبيت مش فقط أقتصر على القرآن واللغة العربية لازم تأصيل لمفاهيم كتير … عقيدة وسنة وحديث وتفسير قرآن .. أنا مش هأطلعهم شيوخ لكن الحاجات اللي أخدناها وإحنا صغيرين في المدرسة هم مش بيآخدوها ويمكن لما أعلمها لهم يعلموها لأولادهم وتبقى تندرج تحت علم ينتفع به
وفكرت أكتر في إن فيه كتير ناس زيي كده مسلمين مغتربين وأولادهم مش بيروحوا المسجد لأسباب أخرى وفعلا نفسهم في مصادر لتعليم أولادهم اللغة العربية ومفاهيم الدين .. ومش عارفين يبدأوا منين … طيب ما يمكن أقدر أساعد
أنا عارفة والحمد لله إن مغتربة بتساعد ناس كتير غير الكوبونات وطرق التوفير وخلافه من ملاحظتي للمدونة بألاقي فعلا ناس كتير بتعمل داونلود للأوراق البسيطة اللي موجودة لتعليم الأطفال اللغة العربية .. يعني ممكن فعلا دي تبقى علم ينتفع به وكل أما الأولاد يتعلموا حرف آخد ثواب ويا سلام لو كان الحرف ده في القرآن
طيب وإيه تاني .. أيوة هأعمل دروس في الدين أعتمد فيها على الكتب الصحيحة للمشايخ الأجلاء والذين نحسبهم على خير من أهل السنة والجماعة … وطرق لتعليم الأولاد سنة حبيبنا محمد عليه الصلاة والسلام
ماذا بعد …..؟
هو ده اللي هيبقى لي … وماذا بعد …؟ ماذا بعد الفناء والهلاك؟ ماذا بعد هذه الدنيا الفانية.. ماذا أعددت لآخرتي وعلى أي حال سيكون قبري مظلم أم منير … مليئ برائحة الجنة أم برائحة ذنوبي وعثراتي وسوء أدبي في الدنيا!!! ماذا أعددت يا أميرة ليوم أن تحملي على الأعناق… لاشيئ
وعلشان أحقق ده محتاجة مساعدتكم … محتاجة إنكم تحاولوا معايا من فضلكم .. لو تعرفوا حد محتاج يعلم أولاده العربي والدين قولوا له على مغتربة يمكن أولاده يستفيدوا … أو إطبعوا الورق ووزعوه على ناس يمكن يكونوا محتاجينه … ولا تنسوا الدال على الخير كفاعله وهيكون في ميزان حسناتكم أيضا ويكون علم ينتفع به .. وإن شاء الله تؤجروا عليه ويكون لكم بعد الموت سيل من الحسنات لا ينقطع أبدا
رجاء آخر أرجوه منكم …. لو عندكم أفكار أو محتاجين حاجة تساعد الأولاد في تعليم اللغة أو الدين … لو فيه حد منكم عايز يعمل دروس ويحطها على الموقع .. فأنا أسعد بإستضافة كل أفكاركم وبإذن الله تكون في موازين حسناتي وحسناتكم
وأخيرا :: درس آخر مستفاد
زوج أختي مريض بمرض لا يرجى الشفاء منه وكل شيئ بأمر الله … وكلنا الحقيقة وأنا أولهم كنا معتمدين على والدي إن لما يحصل حاجة لزوج أختي هيكون هو بجوار أختي يعينها ويساعدها ويسندها عند وفاة زوجها
ويشاء الله أن يقبض أبي أولا … وشعرت إن ربنا بيقول لي سبحانه وبيقول لنا جميعا … أنا السند ولا سند غيري … وأنا المعين ولا معين غيري .. كلكم إلى زوال وأنا الباقي الواحد الأحد الفرد الصمد
سبحانه من له الدوام … سبحانه من حكم بالموت والفناء على خلقه الخاص والعام … سبحانه من عزيز لا يضام وملك لا يرام … وقوي لا يعجزه الإنتقام … ذلكم الله ربكم لا إله إلا هو الملك القدوس السلام
جزاكم الله خيرا على إنكم سمعتوني وتحملتوني طيلة الفترة السابقة وكلامي وتعبي النفسي وأنا أعلم تمام العلم أن كل واحد/واحدة منكم عندكم ما يكفيكم من المشاكل وهموم الحياة التي ولابد منها ولا مفر منها .. أشكركم شكرا جزيلا وأتمنى أسمع منكم دوما ولا تبخلوا علي بالتعليقات التي تسعدني وتشرح صدري وتعينني على المواصلة
tulip says
وعليكم السلام ورحمه الله وبركاته
سبحان الحي الْقبوم الذي لا يموت.
اول شي انا مبسوطة من الي إنتي كتبيه اليوم وأحس انك صرتي أقوى الحمد لله وخليك دايم كذا وايمانك بالله كبير.
سبحان الله في ناس ما تعرفينهم الا عن طريق النت ويدخلون قلبك وإنتي وحده منهم. اسال الله كما جمعنا عن طريق المدونه ان يجمعنا في الجنه يارب
الله يجعله في ميزان حسناتك على مساعدة الناس
والواحد لازم يحاول يعمل لاخرته لان وين الي بيفتكرك بعد الموت ممكن كم يوم وبعدين ينسو. الله يجعل اعمالنا كلها خير ويتقبل منا يارب
ثاني شي بجد الغربه هنا لازم الام تعلم اولادها الدين مزبوط لان المدارس ما تعلمهم الدين و لو الام ما اهتمت بيضيعو الأولاد في الدين. الله يعينك أن شاء الله
والله كان نفسي اعطيك افكار لتعليم الدين للأطفال بس ماعندي تجربه مع الأطفال. الله يزقني الذرية الصالحه.
اخر شي عظم الله أجركم في زوج اختك والله يرحمه ويصبركم
أتمنى بين فتره وفتره تطمنينا عنك وعن أحوالك
Amira says
تيوليب .. جزاك الله خيرا حبيبتي على كلامك الحلو والمشجع
وكلامك صحيح بعد الموت حتى اللي بيفتكرونا هييجي عليهم وقت وينسونا ولا يبقى إلا العمل الصالح
الله يرزقك الذرية الصالحة يا رب عاجلا غير آجل ويقر عينك بأولادك ويحفظكم في الغربة
Dina says
إنا لله وإنا إليه راجعون ز آلمني الخبر فعلا الله يكون بعون أختك ويخفف عنها مصابها
وأنا برضه مبسوطة من كلامك وإصرارك ما لنا إلا أعمالنا فعلا
وإن شاء الله أعطيكي أفكار وبإذن الله هأنشر مدونتك لصديقاتي هنا
ويا رب يكون بميزان حسناتنا جميعا
Amira says
جزاكم الله خيرا دينا وربنا ما يحرمني منكم ويا ريت على طول تمدينا بالأفكار وفي ميزان حسناتك إن شاء الله
سيرين says
السلام عليكم ام حسن وعظم الله اجركم في زوج اخته
( كل من عليها فان )
ربنا يصبركم ويثبتكم ويرفع عنكم
وما شاء الله عليك عندك ايمان بالله بس بدك شويت شد حيل وترجعي ام حسن الي نعرفه بصراحه انا بتبعك من بعيد لبعيد ويمكن عرفتك من منتدى لك بس سبحان الله كل فترة بحب اطل عليك وعلى مدونتك
ليك معزه خاصه ما بعرف ليش
الله يكون الكم معين ويرحم امواتكم ويلطف فينا بغربتنا
استودعتك يد الرحمن
Amira says
سيرين جزاكم الله خيرا .. المنتدى والمدونة كانوا سبب في صداقات عديدة لي .. وعرفت من خلالهم صديقات أكثر من الأخوات
ربنا يبارك فيكم جميعا
Shery says
الحمدالله حاسه انك بقيتي أحسن ربنا معاكي حبيبتي
Amira says
الحمد لله بفضل دعواتكم لينا إن شاء الله نكون دائما أحسن .. مشكورة شيري