حبيبي … ترقرقت عينيك بالدموع لما رأيتني بثوبي الأبيض
وترقرقت عيني بالدموع ولم تتح لي حتى فرصة رؤيتك بثوبك الأبيض
ولكنها دموع غير الدموع …. وثوب غير الثوب … وحشتني يا حبيبي
جزاك الله عنا خيرا ورزقك الفردوس الأعلى وجمعني الله بك قريبا يا رب
السلام عليكم جميعا
اليوم هو ذكرى مرور شهر على رحيل والدي عن هذه الدنيا التي لا تساوي عند الله جناح بعوضة وهي فعلا كذلك
إن شاء الله هأرجع من اليوم وهأحاول أكون زي الأول لسبب هأوضحه لكم في آخر كلامي بعد ما كنت تقريبا قررت إعتزال البلوج والمنتديات والإنترنت بل والحياة كلها … هتقولوا لي كل ده علشان والدك مات؟!!! إنتي مش أول ولا آخر واحدة … وده صحيح ١٠٠٪ فعلا .. بس الإحساس بالتعب .. الزهق … الندم القرف من الدنيا والناس عندي أحاسيس ومشاعر متلخبطة كتير قوي
أنا عندي إحساس إني عاملة زي إبرة البوصلة اللي أخدت قلم على وشها وعمالة تلف تلف وتتهز مش لاقية الشمال من الجنوب .. بس أكيد شوية وهتدأ وهتلاقي الطريق .. ومن البوست ده إن شاء الله بداية الطريق
أحلام … أحلام ودعاء ورجاء
مش عارفة أبتدي منين لكن فكرت كتير وهأبدأ احكي لكم من الأول فعلا من أول ما وصلت هنا أمريكا. من أول يوم وأنا خايفة عليهم هم الأربعة بترتيب العمر ( والدي رحمه الله – حماي – والدتي- حماتي) فعلا خايفة عليهم
مش خايفة عليهم من الموت لأن الموت حق .. وسبحانه هو الذي إختار لنفسه الدوام وحكم بالموت على خلقه الخاص والعام وساوى بالتراب بين الملوك والخدام … أنا خايفة عليهم من الموت وإحنا مش معاهم
طب يعني هتعملوا لهم إيه؟ هتمسكي في ملك الموت وتقولي له لأ إستنى شوية؟ لأ طبعا ومين يقدر يقف قدام أمر الله أو يأخره .. بس نبقى موجودين معاهم في آخر عمرهم في آخر لحظاتهم يبقوا شايفيننا … مش عارفة هو مجرد إحساس
كل صلاة لي بأدعي بالدعاء ده .. يا رب ما تورينا حاجة وحشة فيهم وإحنا مش معاهم ومش جنبهم … يا رب ما تحصلش وفاة وإحنا مش هناك .. يا رب ما تحكمش علينا بكده ده شيئ صعب علينا
كنت تقريبا وعلى فترات متقاربة أحلم إن والدي توفاه الله .. طبعا دي مش نبوءة ده فزع وخوف وعليه الأول بحكم السن وإنه أكبر واحد فيهم هم الأربعة كل أما يكون تعبان أحط إيدي على قلبي وأخاف … أخاف جدا عليه
تعرفوا حاجة مضحكة جدا … بقالي يمكن شهر كل ما أكلم والدتي في التليفون وأول ما تقول لي ألو … أفتكر إن صوتها مخنوق أو بتعيط أو فيه حاجة وأقول لها فيه حاجة تقول لي لأ الحمد لله … إلا يومها!!! زي ما أكون مكنتش عايزة أصدق إنها بتعيط وهي بتكلمني
والدي رحمه الله مكانش صغير في العمر الحمد لله توفاه الله وهو عنده ٧٨سنة والحمد لله تمتع بأولاده وأحفاده .. وكان حافظ للقرآن الكريم ومصحفه لا يفارقه أبدا ولله الحمد وإن شاء الله في نعيم بإذن الله هو وكل موتانا .. بس هي الفجأة يا جماعة الفجأة والحسرة
أسبوعين قبل الوفاة
قبل الوفاة بأسبوعين تقريبا والدي تعب وكان عنده دور برد وهو كان البرد عنده صعب وبيتعبه جدا المهم إنه تعب بعد كده وشخص الأطباء إنها البروستاتا ودي حاجة منتشرة بين كبار السن والعملية بتاعتها بسيطة وبتتعمل في مصر عشرات المرات كل يوم
المهم إنه في الفترة دي مكانش قادر يكلمني يعني أنا ما سمعتش صوته من يمكن ٥ سبتمبر وكل مرة يبقى تعبان ومش قادر يكلمني لأنه كان ممنوع عليه المسكنات علشان الضغط والكلام ده فكان فعلا متألم … وإن شاء الله ألمه ده يكون رفع درجات وتطهير من الذنوب والخطايا
ذهب والدي للطبيب وحدد له ميعاد العملية وقال نعملها يوم الثلاثاء الموافق ١٦ أغسطس ولازم توقف دواء السيولة اللس هو بيآخده من اليوم علشان يبقى ٥ أيام قبل العملية … ويشاء الله إن الممرضة تقول للدكتور مفيش عندنا وقت يا دكتور يوم الثلاثاء خليها السبت ٢٠ سبتمبر … وينسى الدكتور تعديل ميعاد وتوقيت وقف دواء السيولة لوالدي … وتنسى أمي وإخواتي مراجعة الطبيب المختص بعلاج القلب لوالدي وأنسى أنا أيضا سؤالهم عن خطورة توقيف الدواء كل هذه المدة … ولكنها إرادة الله سبحانه وتعالى ده كان عمره وكان هيموت لهذا السبب أو لغيره
ثلاثة أيام قبل الوفاة
كنت قد بدأت أكتب لكم عن طرق لإنشراح الصدر وكنت بأحضر في البوست الثالث .. لكن مش قادرة أكمله فعلا .. كل أما أحاول أكتب عندي إكتئاب ومش عارفة السبب … أستعيذ بالله من الشيطان الرجيم لكن مفيش فايدة
كنت ألاقي نفسي بأبكي ومش عارفة ليه !!! كان شيئ غريب فعلا وقولت يمكن بس علشان واحد من أولادي تاعبني شوية في تربيته وتقويمه .. يمكن علشان كده أنا حاسة بالضيق .. وقعدت أقول لنفسي إحمدي ربنا على عطاياه وإنه بصحة كويسة وإنكم كلكم كويسين ووالدك ووالدتك كويسين الحمد لله .. وعددي نعم الله عليكي زي ما بتقولي وبتنصحي صديقاتك على البلوج لكن برضه جوايا إحساس بالغم مش عارفة مصدره .. ولعله كان تهيئة من الله لي
لي عودة بباقي الفضفضة إن شاء الله دعواتكم لنا ولأبي ولكل موتانا
سيرين says
السلام عليكم ام حسن
صراحه اقرات كلماتك وابكتني بتعرفي ليش لاني مرين بنفس الوضع
بنفس الحزن بس مش على والدي او والدتي هم بصحة جيد الحمد لله
وانما على اختي رحمها الله استوفاه القدر وهي 15 سنه وقبلها بأسبوع كانت بتتكلم معاي عوزه تشوفني وتشوف اول طفل لي !!
بنهاية الاسبوع والساعه 5 صباحا توفيت ولم ارها برغم اني كنت ارتب لزيارة اهلي وشريه ليها هدي ولكن لم تفرح بها
والى الان كل لما يمر عليه شريط كلامها وحياتها واخر مكالمه اعيط
الحمد لله على كل حال وربنا يصبرك ويكون اليك معين
ويرحم والدك ويجعل الجنه مثواه
Amira says
لا حول ولا قوة إلا بالله العلي العظيم .. إنا لله وإنا إليه راجعون
صحيح اللي يشوف مصيبة غيره تهون عليه مصيبته
الله يكون في عونكم ويربط على قلوبكم وعلى قلب والدتك ووالدك
موت الأبناء أصعب شيئ فعلا يا رب ما تحكم علينا بكده يا رب
اللهم إرحم موتانا جميعا يا رب
Dina says
السلام عليكم
كلامك أبكاني فعلا يا الله بيوجع والله
ربنا يصبركم ويخخف عنك