يللا نكمل تظبيط الميزانية
عـــاشــــرا:: بدايـة التطبيق
بعد ما حسبنا حساباتنا جه وقت التطبيق العملي … مثلا هنبدأ الشهر القادم يبقى نقعد مع نفسنا ونشوف حساباتنا هيطلع اليوم مصاريفه كام وبالتالي الأسبوع ونشتري طلبات كل أسبوع لوحده فى الأول لغاية لما نتعود نحسب فى دماغنا ونتعود على السيستم بتاعنا بعد كده ممكن نبقى نعمل الشوبينج لأسبوعين أو زي ما نحب
وبرضه لغاية لما نتعود مش هنعمل خطوة التخزين ولو شفنا أي عرض مهما كان فظيع ورائع نسيبه دلوقتى إلا إذا طبعا كان فري .. إحنا هنأجل التخزين دلوقتي لغاية لما نظبط نفسنا أكتر
حادي عشــر :: بلاش السلف .. السلف تلف والرد خسارة هههه
بلاش أرجوكم بالذات فى البداية نقول هأستلف ٢٠ دولار من الأسبوع اللي جاي .. لأن هييجي الأسبوع اللي جاي ونقول نستلف من اللي بعده وهكذا صدقوني أنا بأكلمكم من واقع تجربتي ياما إستلفت وقولت الأسبوع اللى جاي هأخليه ناقص ٢٠ دولار .. ما بيحصلش فيستحسن بلاش بالذات فى الأول خلينا ملتزمين بالمبلغ الأسبوعي
ثاني عشــر :: بلاش الإحبــاط
يعني لو ما عرفناش نظبطها أول أسبوع معلش .. إن شاء الله تظبط الأسبوع اللي بعده وهكذا خلينا متفائلين وعندنا أمل إن شاء الله وصدقوني هتظبط معانا فى النهاية
Leave a Reply