المرة اللي فاتت إتكلمنا وعرفنا إننا أكيييد كلنا عندنا مشكلة فى المصاريف .. وإنتهينا إلى إننا نقعد مع نفسنا ومصاريفنا ونشوف البنود اللي مضروبة فى ١٠ هي إيه؟ طيب بعد ما عرفناها نعمل إيه؟
رابعـــا :: لابد من تقديم بعض التنازلات
أنا مش بأقول نضيق على نفسنا حتى الإختناق !! لكن كل شيئ بالمعقول حلو .. والإسراف من الشيطان .. إعلموا أخوتي وأخواتي إني أبدا مش ضد إننا نتمتع بالحياة ومباهجها .. يعني أنا مش ضد الخروج والأكل برة البيت بالعكس .. ده بيكسر الروتين وبيريح وبيبسط الكبار والصغار .. لكن من غير المعقول إني كل أسبوع أصرف ٥٠ دولار مثلا على الأكل بالمطاعم وميزانيتي لا تسمح وأرجع أشتكي إني مش بأحوش فلوس وما عملتش حاجة للمستقبل أو شيئ للأولاد وخلافه أو مثلا ييجي الجامع يجمع تبرعات أقول مفيش معايا فلوس
خامسـا :: طيب لو مفيش تبذير بأي ركن زيادة عن اللزوم
نبدأ نبص لميزانية البقالة .. يعني بالعربي كده اللي بنصرفه في الستورز كل أسبوع .. ولمارت تارجت ولجرينز وهكذا. مش عارفين ؟ كل حاجة بأشتريها مهمة وبأحتاجها في البيت .. مش كده.. لأ غلط مش صح .. وانا أولكم
هاتوا ورقة وقلم ونكتب بيتي محتاج إيه ضروري كل أسبوع .. بأقول ضروري كل أسبوع وهأعطيكم أمثلة
لبن – بيض – خبز- خضروات – فاكهة – لحوم – مشروبات ( يشمل عصائر وشاي وقهوة) -دي في الغالب أساسيات في كل بيت
طيب إيه تاني أكيد بنحتاجه لكن بصفة مش أسبوعية .. أمثلة
سكر- دقيق- زيت – مكرونة – أرز – صلصة – بقوليات- صابون-مناديل ورقية … وخلافه
سادسـا :: نحدد أقل ميزانية ممكنة للأسبــوع
بعد ما عرفنا الضروريات وكتبناها نقوم بمراجعة آخر مجموعة فواتير للسوبر ماركت ونطلع منها سعر كل حاجة من الأساسيات مثلا اللبن ٥ دولار الجبنة ٧ دولار الخبز ٥ دولار وهكذا ونجمع الأرقام ودي هتبقى أقل ميزانية ممكنة فى الأسبوع يعني ميزانية الحاجات اللي ما نقدرش نعيش من غيرها .. وعلشان نكون مرتاحين شوية ما تحسبوش الميزانية بالكوبونات إحسبوها بالأسعار العادية
ملحوظة :: لو مثلا بتشتروا الفراخ واللحوم من محلات الجملة زي كوسكو وسامز كلوب يبقى مثلا كيس الفراخ بـ ٢٠ دولار بيكفينا أسبوعين نقسمهم يبقى كل أسبوع ١٠ دولار
إحسبوا أقل ميزانية تنفعكم وأشوفكم المرة الجاية إن شاء الله
اروى says
جزاك الله الف خير ويفرح قلبك ويطمنك وابقى طمنينى عليك وعملت ايه ولى عوده لان مش عارفين نوفر اى حااجه اوحتى نوفر مقدم لشقة ايجار تكون اوسع لانى اتخنقن من المكان مش عارف اظم وعندىعشواءيه فى السره المشتريات
Amira says
جزانا وإياكم أروى … إدعي لنا إحتمال يكون ليه علاج هنا .. يا رب يا رب
الله يفتح عليكي تعرفي فعلا العشوائية هي أسوأ حاجة في كل شيئ .. من مستوى الدول لمستوى الأسرة .. آه والله طيب بصي العشوائيات في مصر زبااااالة وناس غلبانة غلب فظيع .. برضه العشوائية على مستوى المصاريف وعدم التنظيم بتخلي الواحد ييجي في نص الشهر ويقول الفلوس راحت فين