من أول الأسئلة اللي الناس بتسألها هي أصرف كام في الشهر؟
تفتكري إيه المبلغ المناسب للبيت؟ هل ١٠٠٠ دولار كفاية ؟ .. طيب ٥٠٠ طيب ٨٠٠ هل كده إحنا مسرفين واللا المبلغ ده يا دوب؟
الإجابة على السؤال ده صعبة لأنها بتعتمد على كل شخص وتعتمد أيضا على عدد أفراد الأسرة وإحتياجاتهم وأعمارهم وإحتياجاتهم الصحية ومكان المعيشة و و يعني .. فيه عوامل كتيرة مؤثرة على الإجابة لكن هأحاول أحط لكم مبادئ عامة وأساسيات وإنتم تنطلقوا من هنا
::أولا نسبة المصروفات للدخــل
أغلب الناصحين فى مجال الإقتصاد الشخصي بينصحونا إن المصاريف كلها لا تزيد عن ثلثي الدخل بمعنى لو الدخل الشهري مثلا ٣٠٠٠ دولار يبقى المصاريف لا تزيد عن ٢٠٠٠ دولار شهري والباقي للتوفير أو الإستثمار
المصاريف تشمل الآتي:: الإيجار أو القسط الشهري للمنزل – فواتير الكهربا والغاز والمية وخلافه – الإنترنت- التليفون- إشتراك الدش – البنزين – التأمين الصحي وتأمين العربية مثلا – مصاريف البيت والبقالة وكل المصاريف فى البيت أو أي مصاريف للأولاد في المدرسة أو أنشطة رياضية وهكذ .. أنا حاولت أحط لكم كل المصاريف اللي جت على بالي
::ثانيــا عايزين نعرف إحنا موقفنا إيه
يعني إيه … يعني بعد ما عرفنا المفروض نصرف كام عايزين نعرف إحنا فعليا بنصرف كام؟ يا ترى أقل – يبقى خير وبركة – واللا أكتر ولو أكتر يبقى الفرق كام؟
حاولوا تشوفوا مصاريفكم الـ ٣ شهور اللي فاتت على الأقل لأخذ المتوسط هاتوا الفواتير وإحسبوها أو بصوا كويس على كشف الحساب بتاع البنك أو كشف حساب الكريديت بتاعكم وإعرفوا صرفتوا كام في الشهور اللى فاتت وإعملوا متوسط ونشوف نسبة المتوسط ده لصافي الدخل الشهري
لو المبلغ أقل أو بيساوي نسبة التلتين يبقى إنتو فى السليم .. بس ممكن تبقوا عايزين توفروا أكتر .. يبقى كملوا معانا أو الحالة التالتة اللي أغلبنا فيها وهي إن النسبة أعلى من التلتين ومحتاجين نقللها .. بس عايزين نعرف أكتر بأد إيه ؟ هل مثلا بندفع ٢٥٠٠ دولار مصاريف – على أساس المثال السابق إن الدخل ٣٠٠٠ شهري- واللا بندفع ٢١٠٠ واللا بندفع أكتر من الدخل أصلا وعلينا ديون
:: ثالثـا نظـرة متعمقـة للمصـاريف
دلوقتي عرفنا إن فيه مشكلة .. وممكن تكون كبيرة كمان لو الديون بتتراكم علينا شهر ورا التاني …يبقى لازم نقف مع نفسنا ونشوف الغلط فين .. أكيد فيه بند أو بنود زيادة عن اللزوم . فيه ناس لازم تآكل برة مرة على الأقل كل أسبوع مع إن ميزانيتها لا تسمح. فيه ناس تشتري أكل جاهز كتير . فيه ناس بتشتري هدوم كتير عند أى وكل أوكازيون تشوفه . طيب يمكن مدخلين الأولاد أنشطة كتيرة زيادة عن اللزوم أو بما لا تسمح الميزانية .. خلينا نشوف ونفكر وندقق فى المصاريف ونشوف كل بند واخد كام وليه وهل ممكن نتصرف ونقلله شوية؟
Leave a Reply