Uncategorized

من فترة وأنا أشعر بالتقصير في حق أولادي من ناحية العاطفة واللعب معاهم .. ولكن لما بدأت أسمع سلسة للأستاذ عمرو خالد إسمها الجنة في بيوتنا والحقيقة حسيت بتقصير أشد

كنت قرأت من فترة إن الأولاد بقى عندهم إنعزال إجتماعي بسبب الألعاب الإلكترونية الحديثة زي الإكس بوكس والآيباد والكلام ده .. وعلشان نرجع تاني ندخل عالمهم لازم نحاول نشوف إيه إهتماماتهم ونشاركهم فيها ولو بالكدب .. وحاولت فعلا ونزلت لعبة على الجهاز بتاعي أولادي بيحبوها وحاولت ألعب معاهم .. آل يعني بأحبها وأهتم أسمع هم وصلوا لأي مرحلة وكدة وحسيت بفرق شديد وإنهم بيحبوا ييجوا يحكوا لي عملوا إيه فيها ويشجعوني أوصل لمراحل متقدمة زيهم وأنا طبعا ما أخبيش عليكم ما أعرفش الألف من كوز الدرة في اللعبة لكن أهه أي حاجة وخلاص

 

لكن مشاغل الحياة بتآخدنا وبتلهينا عنهم وهم بكرة يسيبونا ويمشوا لبيوتهم ويمكن هنقول يا ريتنا لعبنا معاهم شوية .. لكن الحقيقة سلسلة الجنة في بيوتنا حلوة جدا بالنسبة لي وكل أما أسمع حلقة فيها أحن على أولادي وأتعامل معاهم بلطف وحب .. بس شوية كدة كام ساعة ويبدأوا يغيظوني بتصرفاتهم العادية لكن أنا علشان أمهم بأكون عايزاهم أحسن ناس في الدنيا وبالتالي ترجع ريما لعادتها القديمة وأرجع أزعق فيهم وأوجههم بطريقة غلط في غلط

 

من يومين إبني الصغير جاب الديناصورات بتاعته والعربيات وقال : ماما ممكن تلعبي معايا؟

لسه هأقول له لأ مش فاضية ومش وقته والكلام إياها بتاعي .. لكن وعدته هألعب معاه بعد ساعة

طبعا مش محتاجة أقول لكم إن في الساعة دي سألني مليون مرة هي الساعة جت علشان تلعبي معايا :)؟ ويا عيني فضل قاعد جمبي لغاية لما خلصت ولعبنا مع بعض .. وكان في قمة السعادة

 

بعد كدة قررت إني لما أوصلهم المدرسة هأقول لهم بأحبكم وأحرص على إني أبوسهم قبل ما ينزلوا من العربية حتى لو أنا زعلانة منهم لازم أبين لهم إني بأحبهم مهما حصل

 

في يوم وصلت أولادي وإبني الصغير ما لحقش يبوسني ونزل وبعد ما نزل كان زعلان أوي وقال لي كنت عايز أبوسك بس العربيات مشيت وإضطريت إني أمشي أنا كمان .. لكن فيه حاجة وجعتني في قلبي وقلت كان لازم أنزل وأبوسه حتى لو وقفت الشارع كله مش مهم

 

رجعت لأفاجأ بخبرين أصعب من بعض بصراحة على نفسي … واحد أعرفه هو ومراته ( أجانب) بنته عندها ١٥ سنة ماتت في حادثة شديدة وأليمة .. وخبر تاني لصديقة توفاها الله فجأة في بيتها .. الله يرحمهم جميعا

 

 

رحلت الجارة العزيزة وتركت زوج مصدوم وصغار إفتقدوا حنان الأم بدري ووالدين ملتاعين والنار تكوي قلوبهم .. الله يصبرهم ويربط على قلوبهم … بصراحة إتفاجئت وعيطت كتير مع إني ما أعرفهاش أوي لكن قلبي وجعني جدا

 

وقلت في نفسي ياااه أد كدة الموت قريب جدا مننا .. ممكن نموت في أي وقت .. هي حقيقة كلنا عارفينها ومستوعبينها لكن مش حاسين بيها أوي .. لأ ومش كده كمان ده ممكن أولادنا هم اللي يختفوا من قدامنا فجأة ونستشعر الحسرة – بعد الشر علينا كلنا- ونحس إننا كان نفسنا نقعد معاهم أكتر أو نخرج معاهم أو أو .. بعد الشر وربنا ما يوريها لحد لكن للأسف إحتمال وارد

 

أنا مش عايزة أجيب لكم إكتئاب ولا أغمكم لكن الدرس لس وليكم … يا جماعة إلعبوا وأقعدوا وإتكلموا و هزروا معاهم … قبل فوات الأوان

 

 

إلى كل قارئي مدونة مغتربة الأعزاء

حان موعد سفرى إن شاء الله نتقابل على خير

وأستمر فى الكتابة بعد الوصول لمصر…أستودعكم الله

 

اللهم إنا نسألك في سفرنا هذا البر والتقوى ومن العمل ما ترضى

 

اللهم هون علينا سفرنا هذا وطوي عنا بعده اللهم أنت الصاحب في السفر

 

والخليفة في الأهل ،اللهم إني أعوذ بك من وعثاء السفر

 

،وكآبة المنظر وسوء المنقلب في المال والأهل

 كل عام وأنتم بخير … اليوم هو أول أيام شهر شعبان .. نشم رائحة رمضان في الأفق .. اللهم بلغنا رمضان وتقبله منا يا رب

ولشهر شعبان فضائل متعددة فلا تغفلوا عنا

فصوموا يا عباد الله فلعل الله يطلع عليكم في هذا الشهر فيرى كثرة صيامكم فيقبل الله سائر أعمالكم

ولا تنسوني وأهلي ووالدي رحمة الله عليه وشائر المسلمين في صالح دعاءكم .. ولا تنسوا الدعاء للمسلمين المستضعفين في الأرض .. وإخوانكم في فلسطين وسوريا وبورما

والمحبوسين والمسجونين ظلما وعدوانا في كل بقاع الأرض وأن يعز الله المسلمين ويردهم ردا جميلا لدينهم .. اللهم آمين

 

فضل شهر شعبان– مكتبة صيد الفوائد

التنبيه على بدع النصف من شعبان

فضائل شهر شعبان – الدكتور راغب السرجاني

مجموعة من الأفكار الجديدة النميسة .. أتمنى تفيدكم تعالوا نشوف

 

نعمل إيه لو حطينا ملح كتير وإحنا بنطبخ *

جدتي الله يرحمها كانت بتقول نقشر بطاطساية ونحطها مع الأكل … البطاطساية هتشرب الملح من الأكل ويرجع تاني كويس إن شاء الله

 

عايزين ننضف براد الشاي الكهربائي *

براد الشاي الكهربائي أو غلاية المياة بتتسخ من جوة وبيتعلق فيها الكالسيوم اللي في مياة الشرب .. وبتبقى عبارة عن طبقة جيرية جوة البراد .. الحل نعمل محلول نصه مية والنصف التاني خل أبيض عادي ونغلية مرتين تلاتة وبعدين نرمي المية ونغلى مرتين مية بس علشان نتأكد إن ريحة الخل راحل وهتلاقوا البراد من جوة زي الفل كأنه جديد

 

 

ريحة الثوم والبصل من الإيدين *

الثوم والبصل بالذات الثوم ريحته رهيبة وبتلزق في الإيدين وساعات الواحد بيطبخ ويخرج ويبقى مكسوف من الريحة .. علشان نتخلص من ريحة الثوم ممكن ندعك الإيد بالليمون أو البيكنج صودا أو ندعك الأصابع في معلقة ستانليس أو حتى في حوض المطبخ الستانليس!!! تصدقوا بتضيع الريحة

 

البطاطس مش بتستحمل وبتطلع براعم *

حطوا معاها تفاحة .. بس خلاص

 

تعبتوا من التلج المتكثف جوة علب الآيسكريم *

لما تشتروا العلبة وتفتحوها قبل ما تغطوها وترجعوها الفريزر – ده لو ما خلصتوهاش بالهنا والشفا – غطوها بورقة من البارشمنت وبعدين حطوا عليها الغطا

 

 

ما ترموش الرز المحروق  *

لو حرقتوا الرز ما ترموش الرز .. بس حطوا قطعة خبز في الحلة هتمتص الرائحة .. وبعدين نغرف الرز من غير ما نجيب المحروق معانا من فضلكم .. العيش مش هيرجع الرز المحروق لكن على الأقل هننقذ باقي الرز

 

الفيشار مش كله بيفرقع *

لو بتعملوا الفيشار في الحلة ومش كله بيفرقع معاكم .. جربوا تنقعول الفيشار في مية ١٠ دقائق وبعدين طلعوه ونشفوه وإعملوه هيطلع جميل كله إن شاء الله

 

يا ترى كام مرة قطعتوا فلفل حراق وبعدها …هرشتوا في عينيكم *

أو تحطوا إيديكم على وشكم أو الشفايف وتلاقوا وشكم ولع نااار .. قبل ما تقطعوا فلفل حراق إمسحوا الأصابع بشوية زيت .. وبس خلاص المادة الحراقة بتاعت الفلفل مش هتلزق في إيديكم

أرسلت لي أختي على الواتس آب فيديو به هذه الـــ… ــسيدة الدكتورة نوال السعداوي  وهي تصول وتجول كعادتها في موضوع الحجاب ورؤيتها له .. لغاية هنا وده عادي فالكل -تقريبا- يعرف موقفها من الحجاب وده حقها رؤيتها لأنه مش فرض وإنه عادة والكلام ده كله

 

لكن اللي زاد وغطى أن قامت بشتيمة واضحة للحجاب ومن ثم المحجبات!! فقالت أنا بأعتبر الحجاب ده قلة أدب!!! عذرا يا ست الدكتورة والمفكرة – مش عارفة مفكرة في إيه بالظبط – هنا لازم تقفي عند حدودك

 

فمن الواضح أنها لم تسمع من قبل عن أدب الإختلاف ده غير أدب الحوار .. غير إن حضرتك بهذا القول قمت بإغتياب الآلاف من المحجبات في العالم كله .. واللا هتقول لنا مفيش حاجة في الإسلام إسمها غيبة ودي عادة وليست عبادة هههه

 

وإذا كان ده تصرف واحدة دكتورة ومفكرة وعالمة فليس من العجب أن الشارع المصري بل والعربي كله بيقطع في بعضه لأننا ما بنعرفش نختلف مع بعض بأدب بل كل إختلافنا مليئ بالشتائم وعلو الصوت ويصل إلى مد الإيد كمان

 

أعزائي قراء المدونة إذا كنتم من غير المقتنعين بالحجاب أو غيره أرجوكم تحلو بالأدب عند الإختلاف مع المحجبات فقط قولوا لنفسكم قد تكونوا على صواب وقد تكونوا على خطأ .. لو كنتم على خطأ بلاش تزودوا الطينة بلة زي ما بنقول في مصر وتقلوا أدبكم على المحجبات وبلاش تنشروا الكلام في الفيسبوك وغيره كفاية عليكم الذنب بتاعكم .. اللهم إنا نعوذ بك أن نكون ضالين مضلين

 

أسأل الله لي ولكم جميعا وللست الدكتورة الهداية