مطبخ مغتربة

منيـو الغذاء الأسبوعـي من ٣-٩ مارس ٢٠١٤ إن شاء الله

الإثنين: فراخ في الفرن + بطاطس بالزعتر والثوم + ملوخية وشوربة فراخ

الثلاثاء : أسباراجوس + بسلة بالصلصة + أرز أبيض وكفتة

الأربعاء : أومو رايس أكلة يابانية من صديقتي نامي

الخميس : مكرونة + فراخ بانية

الجمعـة : بواقي

السبت : كشري مصري

الأحد : بواقى الأيام السابقة

الحلو هذا الأسبوع : هنآكل كوكيز بأشتريها وأعملها بالبيت

فتة شاورما الفراخ طبق لذيذ جدا جدا ويحبه الصغار والكبار … وعجب الكثير فعلا .. سهل وسريع إتعلمته من صديقتي بيرو ولكن أنا غيرت فيه شوية بس رائع رائع فعلا ومش ممكن يطلع وحش مفيهوش إفتكاسات

:: هنحتاج

١ باوند فراخ صدور مخلية مقطعة شرائح رفيعة – أو حسب عدد الأفراد

١ كوب خل أبيض- أو ما يكفي لتغطية الفراخ

١ بصلة متوسطة مقطعة شرائح

ملح وفلفل حسب الرغبة

فلفل ألوان مقطع مكعبات

٢-٣ كوب أرز بسمتي مطهي – المفروض يكون لونه أصفر لكن أنا عملت أرز عادي أبيض علشان أولادي

٣ رغيف خبز لبناني أو بيتا

٣ فص ثوم مفروم

٢ معلقة كبيرة زبدة أو زيت زيتون

للتومية:: هنستخدم ١ كوب زبادي سادة + ١ معلقة كبيرة مايونيز + ملح وفلفل + فص ثوم مفروم

أنا ما إستخدمتش مايونيز يعني عملتها بالزبادي فقط

الطــريقــــــة

نضيف حلقات البصل لشرائح الفراخ ونتبلها بالملح والفلفل ونغطيها بالخل في طبق عميق وتوضع فى التلاجة من الليل

نآخد قطع الفراخ ونشوحها بدون زيت أو سمن حتى تنزل كل المية وتنشف ثم نضيف قطع الفلفل عليها – بيرو أضافت طماطم أيضا لكن أنا حبيت أعملها بدون طماطم

نقلب تقليبتين ونطفي النار ونبدأ بتجهيز الخبز

يقطع الخبز مربعات ويخلط مع الزبدة والثوم ويوضع بالفرن أو في طاسة على النار حتى يقرمش

نجهز التومية بخلط مكوناتها معا ثم نبدأ بتجهيز الطبق للتقديم

يغرف الخبز – ونشيل شوية لتجميل الوجه – ثم نضع عليه الأرز ثم قطع الفراخ والفلفل

نضع باقي الخبز على الوجه ويزين بخليط الزبادي أو التومية

وزووووم على رأي بيرو

أتمنى يكون الطبق عجبكم وبالهنا العافية

منيـو الغذاء الأسبوعـي من ٢٤ لـ ٣ مارس ٢٠١٤

الإثنين: بامية باللحمة + أرز أبيض

الثلاثاء :فتـة شاورما الفراخ

الأربعاء : أرز أبيض + ملوخية + فراخ بالفرن

الخميس : غذاء خارجي

الجمعـة : بــواقــي

السبت : بــواقــي

الأحد : هامبرجر وهوت دوج ساندوتشات

الحلو هذا الأسبوع : البسبوســة

الخبز ده رائع رائع بمعنى الكلمة لو بيحبوا الزعتر والجبنة .. ما يتشبعش منه فعلا تعلمته من صديقتي الفلسطينية أم مالك جزاها الله خيرا .. مع كوب شاي منعنع على رأيها مفيش أحلى من كده الخبز ده غير المناقيش وفطاير الزعتر والجبنة الفلسطينية المعروفة .. جربوه وإن شاء الله يعجبكم

الخبز ده المفروض يتعمل بالزعتر الأخضر وأي نوع جبنة مفتتة زي الفيتا .. ممكن تعملوا الجبنة بنفسكم مش هتآخد دقائق .. أنا إستخدمت جبنة بيضا كنت جايباها من مصر .. صورتها موجودة تحت جبنة بيضا عادية للفرد والنتيجة كانت جميلة جدا

::المقاديــــر

٣ كوب دقيق أبيض

١ معلقة كبيرة خميرة فورية + ١ معلقة كبيرة سكر أبيض

٢ معلقة كبيرة زعتر ناشف

١ معلقة صغيرة ملح

١ كوب ماء فاتر للعجن

ربع كوب زيت يفضل زيت الزيتون

١ كوب جبنة بيضا

نبدأ إن شاء الله

نضيف المقادير الجافة ونخلطها على بعضها كويس

 ثم نضيف الزيت ونقلب حتى يتشرب بالدقيق ثم نضيف الماء حبة حبة حتى تتكون عجينة ملساء

نضيف الجبنة ونعجن بالراحة علشان الجبنة ما تتفتتش أكتر – لو إستخدمتوا جبنة زي بتاعتي هتتكون عدنكم عجينة تلتصق باليد ما تقلقوش وما تزودوش دقيق هى شكلها كده بس هتزبط فى الخبيز

نترك العجينة تختمر ساعة ثم نأخذ منها كور بحجم كورة الجولف كده ونفردها على سطح مدهون زيت زيتون

نخبزها فى فرن متوسط الحرارة أو إعملوا زيي سويتها على عين البوتجاز فى طاسة تقريبا دقيقتين لكل وجه

وتقدم بالعافية مع المزيد من الجبنة والزعتر أو غمسوها بزيت الزيتون أو حاف كده من غير غموس مع كباية شاي بالنعناع

جميلة جدا جدا …. وبالهنــــا والشفــــــا

أم علي … طبق مشهور جدا في مصر ومن الحلويات الشتوية والرمضانية

في مصر تباع رقائق خاصة بأم علي بمحلات الحلويات .. هنا ممكن نعمله بالكرواسان أو رقائق الباف أو الجلاش .. أنا بأحب أعمله بالباف بأحس إنها أقرب واحدة لرقائق أم علي اللى بتتباع فى مصر

الطبق ده سهل جدا جدا ومفيهوش إختراعات تعالوا نشوف محتاجين إيه

١باكيت باف باستري .. نتركها على الكاونتر تفك *

مكسرات قطع أي نوع بتحبوه – لوز/جوز/فستق/سوداني وزبيب*

١ علبة قشطة -قمير- أنا إستخدمت نستلة تلاقوها بولمارت وتارجت *

٢-٣ كوب لبن حليب سائل *

نصف كوب سكر أبيض *

معلقتين زبدة *

رشة فانيليا*

نجهز رقائق الباف باستري كما هو مكتوب على العلبة بتاعتها .. فى الغالب هنحطها فى الفرن على درجة ٣٥٠ فهرنهايت حتى تصبح ذهبية ومقرمشة

نكسر رقائق الباف ثم في طبق الفرن نضع نصف الكمية ثم المكسرات والزبيب ثم نضع باقي كمية الباف

نغلي اللبن مع الزبدة والقانيليا والسكر على النار ثم نصبها فوق الباف ونتركها ١٠ دقائق .. هنلاقي جزء من اللبن إتشرب فى الباف .. نفرش علبة القشطة فوق الوجه ونسويها بظهر ملعقة

تدخل الفرن ١٠ دقائق ونفتح الشواية بس نآخد بالنا كويس .. حتى تصبح بنية اللون وجميلة

نخرجها من الفرن وتترك لتهدأ وتؤكل سااخنة ويقدم معها لبن بالسكر والفانيليا لمن يحب الإستزادة

وبالهنا والعافية