أطباق الدجاج
٦xمطبخ مغتربة الإقتصادى :: الشاورما السريعة من تحدى الـ ٦
طبق الشاورما مين فينا ما يعرفهوش فى الشرق الأوسط .. الشاورما من الأطباق المحببة تقريبا لجميع من أعرف .. طبعا الشاورما بتتعمل أساس على سيخ كبير سصعب تواجده فى البيت وفى الوصفى الأصلية لازم نتبل اللحم فترة كافية .. لكن المرة دى هنعمل تقليد سريع للشاروما من الدجاج الذى سبق طهيه .. تعالوا نشوف ممكن نعمل إيه
هنحتاج الآتى
٣ أكواب دجاج مطهى ومقطع *
٣ ملاعق كبيرة خل أبيض *
بصلة متوسطة مقطعة حلقات – يفضل بصل أبيض أو أصفر لأنى إستخدمت الأحمر وأعطانى لون غير محبب *
فلفل رومى ألوان مقطع شرائح طولية *
١ معلقة صغيرة ليمون *
١ طماطم متوسطة مقطعة مكعبات – ويمكن إستبدالها بنصف كوب عصير طماطم *
٤ معلقة كبيرة زيت زيتون *
ملح وفلفل *
الطــــريقــــة
فى طاسة على النار نسخن الزيت ثم نضيف شرائح البصل ونقلبها تقلبتين ثم نضيف شرائح الفلفل الملون ثم نضيف قطع الدجاج مع التقليب المستمر
نضيف البهارات والملح والفلفل والخل والليمون ثم عصير الطماطم أو الطماطم المقطعة ونخلطهم جيدانغطيهم ونتركهم على نار هادئة حتى يمتزجوا معا تقريبا ٢٠ دقيقة
يقدم مع الأرز والسطة الخضراء أو طبعا ساندوتشات فى العيش البيتا
الطبق ده بيكون أحسن بكتير لما يتآكل تانى يوم أو نتركه على الأقل ٤ ساعات لأن الفراخ بتشرب التتبيلة والطماطم وبتكون أحلى
وبالهنا والشفا
٦xمطبخ مغتربة الإقتصادى :: تحدى الـ ٦
الوجبات الإقتصادية هى عادة مفهومها وجبات لا تحتوى على البروتين الحيوانى بالبلدى الفراخ واللحمة .. لكن هل تعرفوا إننا ممكن نعمل وجبات إقتصادية فيها لحمة وفراخ … دخلت مؤخرا فى تحدى مع صديقة لى إزاى ممكن أسرة بحالها تآكل ربع فرخة فقط فى اليوم!!!! هل ده ممكن؟ ومع بعض التحايل واللعب بالمكونات توصلت لمجموعة من الوصفات أستطيع بها إن أسرتى تآكل ربع فرخة باليوم … حاجة ما تتصدقش مش كده .. أنا برضه ما صدقتش بس علشان تعرفوا أنا أسرتى مكونة من 5 أفراد أب وأم و٣ أطفال ذكور ١٠و ٧ و ٣ سنوات من متوسطى الشهية … طبعا الحال هيختلف معاكم على حسب أعمار أولادكم وطبيعتهم فى أكلهم
الوصفات دى ممكن نلجأ ليها لما نكون مثلا آخر الشهر أو عايزين نقرص شوية أو بنقلل من أكل البروتين الحيوانى … كمان لو إحنا فى مأزق مادى يعني لازم نحط فى بالنا إننا لازم نقلل شوية من إستهلاك اللحوم .. على فكرة الإنسان فى يومه مش محتاج بروتين بالكمية اللى إحنا متعودين عليها فى بلادنا يعني يا دوب قطعة صغير كفاية …مش ضرور خروف مشوي كل يوم
فى البداية أنا إشتريت عدد ٦ صدور فراخ على ما أفتكر كانت بـ ١٥ دولار من كوسكو والهدف كان إنى أعمل ٦ وجبات مختلفة ومشبعة لحد كبير لعائلتى من الفراخ دى بواقع ربع فرخة لكل يوم لو أخدنا المتوسط
النهاردة هأقول لكم على التوضيبات المبدئية وبعدين هأبقى أنزل لكم الوصفات واحدة واحدة
الأول طبعا نآخد الفراخ ونغسلها كويس بالطريقة المعتادة*
نآخد كل ربع وننضفه من الدهون ونشيل الجلد *
نفصل العضم عن اللحم مش نخلى الصدر لأ نقطع كده من عند الجزء السميك بتاع الصدر بحيث العضم يكون عليه لحم *
هننتهى بـ ٦ صدور فراخ بدون عضم و٦ هياكل الصدر وعليها لحم *
ده شكل العضم لما شيلنا الجزء السميك بتاع الصدر أتمنى يكون واضح قصدى *
وده هيكون شكل الصدور وهى بدون العضم *
نآخد صدرين دجاج ونقطعهم لـ ٦ شرائح فيلية رفيعة *
ونآخد صدرين تانيين ونقطعهم مكعبات متوسطة *
وصدر آخر لوحده نقطعه مكعبات أيضا لوصفة أخرى*
صدر واحد نقطعه شرائح رفيعة *
نضعهم فى أكياس ونكتب على كل كيس فيه إيه ونضعهم بالفريزر *
العضم يسلق جيدا طبعا بالبهارات المعتادة والبصل وبعدين لما يبرد نفصص اللحم اللى فيه هيطلع من ٤ لـ ٥ أكواب لحم دجاج مطهى
نقسم لحم الفراخ المطهى ده لجزئين ٣ أكواب أو ٤ فى كيس و كوب فى كيس وعلى الفريزر برضه *
وطبعا هيطلع لنا مرقة دجاج رووعة ومركزة … نحفظها بالفريزر نستخدمها لعمل شوربة أو ملوخية مثلا وهكذا
الأكلات هتكون كالآتى : هأبقى أضيف اللينكات للوصفات واحدة واحدة
١- مكرونة ألفريدو
٢- شاورما الدجاج السريعة
٣- كسرول الدجاج بالمكرونة
٤- كسكسى بالفراخ والخضروات
Sweet and sour chicken ٥- فراخ بالصوص الحامض والمسكر
٦- بيتزا الفاهيتا
أتمنى يكون عجبكم التحدى بتاعنا ويا ريت لو عندكم وصفات تقولوا لنا عليها
مطبخ مغتربة :: فراخ كورنيش بالسماق
السمــــاق … بصراحة مش مشهور فى مصر خالص وأنا فقط أتذكر والدتى وخى تضع السماق مع السبانخ .. كا بيعطيها طعم مزز وحلو ولما جيت هنا إشتريت السماق من باب العادة مش أكتر … وفضل قابع فى أدراج المطبخ لغاية لما جاءت الفكرة والفرصة وعمات بيه تتبيلة للفراخ المشوية وأيضا خضار مشوى تعالوا نشوف عمت إيه بالسماق
مقادير التتبيلة ـ التتبيلة هنا لعدد ٢ فرخة صغيرة كورنيش
كوب زبادى
ملح وفلفل
بصلتين كبار مفرومين
٣ ملاعق سماق
خل وفصين ثوم مهروسين
٢ معلقة كبيرة بهارات
شوية شطة
معلقة كبيرة بابريكا
٣ ملاعق كبار زيت – أى نوع أنا إستخدمت زيت زيتون
روز مارى
نخلط مقادير التتبيلة وتتبل بيها الفراخ والخضار(طماطم – فلفل أخضر وأحمر وفلفل شطة – جزر – بصل ) ونسيبها شوية متبلة ساعة على أقل تقدير
ونحطها على الشواية … وخلاص
وإستمتعوا بأحلى طبق فراخ مشوى
وصورة كمان … وبالهنا والشفا