كيكات وتورتات

اليوم هأقدم لكم كيكة لذيذة لمحبي نكهة الموز ززز سهلة جدا وهشة وإن شاء الله دايما ناجحة .. عملتها كتير وكانت بتعجب أصدقاء زوجي في الشغل جدا جدا

لو إنتم مش من هواة الموز أو مش بتحبوه في الكيك .. الكيكة دي للأسف مش هتنفعكم .. لأن فيه ناس مش بتحب طعم الموز ولا نكهته .. مع إنها عجبت أصدقاء زوجي ودايما بيطلبوها مني إلا إنها ما عجبتش زوجي لأنه مش بيحب الموز ولا بيطيق النكهة بتاعته في أي شيئ

مش عارفة ليه دايما لما بنشتري موز بيتبقى ٢ أو تلاتة مفيش حد عايز يآكلهم!! يمكن لأن الموز بيسود بسرعة وأنا أولادي لو الموز بقى لونه منقط أو إسود لا يمكن يآكلوه.. لو ده حالكم الكيكة دي تنفعكم جدا بدل ما نرمي الأكل

لو مش مستعدين تعملوا الكيكة قطعوا الموز قطع وحطوه بالفريزر ولما تكونوا مستعدين تعملوا الكيكة طلعوه

أتمنى تجربوها وإن شاء الله تعجبكم

 

وأخيرا وصلت كيكة البرتقال … أحذركم منها عملتها ٥ مرات من وقت الثانكس جيفينج كل اللي أكلوها معجبين بيها جدا أجانب وعرب

سهلة بشكل ومكوناتها سهلة وموجودة في كل بيت .. بإستخدمت فبها زيت الذرة مرة ومرة زيت الخضروات وبأستخدم فيها الساور كريم للتقليل من الدهون فيها لكن لو مفيش يبقى تستخدموا كل المقدار زيت مفيش مشكلة

الكيكة مطلوب فيها ١ معلقة صغيرة بشر برتقال .. لو بتحبوا طعم البرتقال ممكن تزيدوا ولو مش بتحبوا الطعم قوي بلاش منه خالص وكفاية العصير

الكيكة دي عجبت أصحاب زوجي في الشغل جدا وطلبوها أكتر من مرة وعجبت أولادي وزوجي اللي هو أساسا مش بيحب طعم البرتقال!!! ممكن تآكلوها كده من غير إضافات وممكن ترشوا عليها سكر بودرة أو الجليز بتاع الدوناتس أو ممكن الكريم تشير فروستينج .. وطبعا الأخير ده أحلى واحد والولاد أكلوه على نمرة واحدة بالهنا والشفا

من هنــــا فيديو يوضح طريقة عمل الكيكة الهشة واللذيذة … أتمنى تجربوها

 

طبخة ولقطة هو تحدي شهري يضم إلى الآن مغتربة وصديقتي العزيزة بيــــرو كل شهر هيكون عندنا تحدي وهنوريكم اللي هيطلع وأتمنى يعجبكم

تحدي هذا الشهـــر وبما إنه شهر عيد الأم بمصر .. فإحنا هنعمل وصفة ماما بتحبها

بما إننا مغتربــين ومغتربـــات أكتر حاجة بتوحشنا هي الأهل وبالذات الأم والأب .. وتدمع العين لفراقهم بعد الزيارات وفي المطارات ..ز ربنا يخلي لنا آباءنا وأمهاتنا يا رب ولا يورينا فيهم ما يبكينا أو يفطر قلوبنا وإحنا بعيد عنهم ويردنا ليهم آمين

أمي الغاليــة بتحب جدا جدا الميل في – تآكليه فى الهنا والسعادة دايما يا ست الكل – ومن هنـــا قررت إني أعمل تورتة الميل في .. وعلشان هي غالية علي جدا قررت إني أصعب الموضوع علي كمان وأعمل العجينة بنفسي

عجينة الميل في هي ببساطة عجينة الباف باستري … لما تدوروا عليها على الإنترنت هتلاقوا وصفة واحدة مالهاش تاني … وصفة كده مكلكعة معقدة شويتين و ٣ شويات .. وإنتو عارفين إني بأحاول أبسط الأمور على قد ما أقدر

وربنا هداني لوصفة في الكتاب ده… ودي أسهل وصفة لقيتها للباف وفعلا بتآخد تقريبا ١/٣ الوقت والمجهود بتاع الوصفة التقليدية وبتطلع النتيجة مشجعة جدا جدا وحلوة ولا تفرق عن التانية نهائي

الطريقـة سهلة جدا جدا بالمقارنة بالتانية طبعا … يعني هي أكيد محتاجة شغل لكن بأقول لكم أسهل من التانية بمراحل … أنا رشيتها بالسكر البودرة وحطيت عليها فراولة طازجة

عندي تعليقين بسيطين عليها:

أولا : كان المفروض أكتفي ب ٣ طبقات من الميل في بس أنا عملت ٤ وده كان كتير قوي يعني كانت تخينة شويتين … المرة القادمة هأعملها ٣ فقط

ثانيا :: حشوة الكريم باتسيري كانت قليلة يعني كتروا الحشوة لأن العجينة بتشرب الحشوة وتطرى فيستحسن نكتر الحشوة شوية

طريقة العجينة والمقادير تشوفوها في الفيديو

 

بيرو دلوقتي في عمرة .. ربنا يتقبل منها ويرزقنا الحج قريبا يا رب ويرزقها كل ما تتمنى … إن شاء الله لما ترجع هأحط لكم مشاركة بيرو

وكل عام وكل أم في الدنيا طيبة وكل عام وحبيبتي أمي بخير وسعادة وصحة وهنا وراحة بال وأمهاتكم كلكم يا رب

التمــر تشتهر بيه بلادنا العربية ذات الطبيعة الصحراوية … وفي رأيي المتواضع أحلى تمر فى الدنيا هو تمر المدينة المنورة .. يمكن نفسيا لأنها بلد الرسول عليه الصلاة والسلام ويمكن لأني المملكة ليها مكانة خاصة فى قلبي لأني مولودة هناك .. أهه تحيز وخلاص بقى

كمان أسمع عن تمور العراق لكن اللي فعلا أكلته هي تمور المدينة المنورة بأنواع لا تعد ولا تحصى سبحان الله .. إنما هنا تقريبا فيه نوعيم فقط هم اللى بأشوفهم .. مدجول ونوع تاني إسمه دجلة . أنا بأحب مدجول ده- يا رب يكون النطق سليم ومحدش يتريق علي – بيكون أقل فى السكر شوية

الكيكة دي جميلة جدا جدا من أحلى وصفات كيك التمر اللي جربتها وألذها .. هشة وخفيفة – سيبكم من اللي على الوش ده لوحده ١٥ كيلو سكر – وكمان بتتعمل بالزيت مش محتاجة سمنة أو زبدة تعالوا نشوف

:: المقــاديــــر

١ كوب تمر منزوع النوى منقوع في كوب ماء ساااخن لمدة نصف ساعة على الأقل – إستخدمت ١٦ حبة تمر

نصف كوب سكر بودرة

١ كوب دقيق أبيض متعدد الإستعمالات

نصف كوب زيت ـ إستخدمت زيت ذرة

٢ بيضة + رشة فانيليا

ربع معلقة صغيرة قرفة مطحونة

معلقة كبيرة بيكنج بودر + رشة ملح

للوجه : توفي + مكسرات- إختياري

هنحتاج ٢ كوب سكر + علبة قشطة نستلة لعمل التوفي

:: الطـريقـــة

في الخلاط نضرب البيض مع الفانيليا كويس ثم نضيف السكر ثم الزيت بعد كده هنضيف الماء والتمر ونخلط جيدا

ننخل المواد الجافة مع بعضها في طبق غويط ونضيف لها الخليط السائل – هنلاحظ وجود بعض قطع التمر مفيش مشكلة بالعكي بتدي طعم جميل وشكل حلو للكيكة من جوة

توضع فى صينية بفرن مسخن مسبقا على ٣٥٠ فهرنهايت ونتركها من ٢٥-٣٠ دقيقة

لعمل التوفي

نضع علبة القشطة فى ما ساخن بطبق غويط لمدة لا تقل عن ٣٠ دقيقة

يجب مراعاة الحرص عند عمل التوفي لأنه بيكون ساخن .. خللوا بالكم من الأطفال

نضع ٢ كوب سكر أبيض عادي على نار متوسطة ونآخد بالنا كويس حتى لا تحترق .. هنلاحظ بداية ذوبان السكر ننتظر مع التقليب حتى يذوب كل السكر ويصبح سائل نوفعه من على النار ونضيف علبة القشطة ونقلب سريعا

هتتكون بعض التكتلات مش مهم نرجعه على نار هااادئة جدا مع التقليب المستمر وهنلاقي التكتلات ذابت بعد شوية والخليط أصبح أكثر سمكا. نرفعه من على النار ونتركه يهدأ قليلا

نصب الخليط فوق الكيكة بحرص وتزين بالمكسرات

تقطع وتقدم وبالهنا والعافية

الكيكة دي ممكن نآكلها بدون جارنيش يعني سادة .. وممكن نرش عليها سكر بودرة وممكن نعمل فروستينج هي فى كل الأحوال جميلة جدا جدا أنصحكم بيها

اليوم أقدم لكم كيكة سهلة جدا جدا ولذيذة .. تعلمتها من صديقتي هند بمنتدى لك … ولها كل الشكر والتقدير

جربوها وإن شاء الله تعجبكم

:: المقــــاديــــر

١ كوب سميد – إستخدمت الناعم *

٢/١ كوب زيت أى نوع – إستخدمت زيت الكانولا دوار الشمس *

٤/٣ كوب سكر أبيض *

١ كوب لبن حليب *

١ كوب جوز هند *

١ كوب دقيق متعدد الإستعمالات *

١ معلقة كبيرة بيكنج بودر *

٢ بيضة + رشة فانيليا + رشة هيل مطحون – أنا مش بأحط هيل *

هنحتاج شربات/ شيرة للتسقية -١كوب سكر لنصف كوب ماء

:: الطــريقــــــة

فى الخلاط نضرب البيض مع الفانيليا ثم السكر وبعدين نضيف الزيت ثم اللبن ويخلط جيدا

نضيف الخليط السابق على السميد ثم الدقيق وأخيرا البيكنج بودر

ثم توضع فى بايركس وتخبز فى فرن ٣٥٠ فهرنهايت حتى تحمر من فوق

تسقى بالشربات البارد وهى ساخنة وتقدم بالهنا والشفا

يمكن تزيينها بالمكسرات أو جوز الهند المبشور

::ملحوظة

أشارت الأخت هند إنه لازم نضيف البيكنج بودر بعد خفق كل المقادير وأنها تضع الكيكة وتتركها قليلا قبل وضعها بالفرن .. الحقيقة أنا جربت الطريقتين والكيكة طلعت لذيذة بكل الأحوال .. يعني حطيت البيكنج بودر مع الدقيق مرة ومرة أخرى عملت زى ما قالت والنتيجة رائعة بالحالتين ولذيذة .. جربوها وقولوا لى النتيجة .. أتمنى تعجبكم

طبقنا اليوم طبق لمحبى القرفة …. كيكة سهلة جدا جدا ومش محتاجة مكونات خاصـة … تعلمتها من صديقاتى بمنتدى لكِ ولهن كل الشكر

الميزة فيها إنها تعجب الصغار والكبار … حشواتها متعددة .. ممكن إستبدال القرفة بالكاكاو البودرة مثلا أو النسكافية .. كما يمكن الإبتكار فى تزيينها

كيكة هشة وسهلة وتنفع جدا فى الزنقات .. تعالوا نشوف بتتعمل إزاى

المكونــات

كوب وربع دقيق متعدد الإستعمال *

كوب سكـر *

كوب حليب  لبن يعني *

ربع كوب زيت أنا إستخدمت الزبدة بدلا من الزيت *

بيضة – رشة فانيليا ومعلقة بيكنج بودر *

للحشو .. مقدار من القرفة أو الكاكاو مع السكر أو النسكافية .. اللى تفضلوه *

الطريقـــة

 

أولا فى الخلاط الكأس نخلط مقادير الكيكة عدا الدقيق والبيكنج بودرة ثم بالخفاق اليدوي خلط المقدار السائل مع الدقيق والبيكنج بودر

سيتكون عندنا خليط أشبه بخليط البان كيك .. سائل شوية .. بالكبشة نصب مقدار من الخليط فى البايركس أو صينية الكيك وندخلها فى الفرن تحت الشواية فقط

مش هتآخد مننا أكثر من ٥ دقائق وننتبه حتى لا تحترق .. نخرج الصينية من الفرن وبملعقة صغيرة نرش مقدار من الحشو .. هنا رشيت طبقة من القرفة

بعد ما رشينا القرفة … نضع طبقة أخرى من العجين وتدخل برضه تحت الشواية حتى تحمر هذه الطبقة ثم نرش مقدار من الحسوة تانى

ونستمر هكذا إلى أن تنتهى الكمية كلها … ثم فى آخر طبقة لا نرش الحشو .. نقفل الشواية ونفتح عليها الفرن حوالى ١٠ دقائق للتأكد أن العجين كله إستوى

تترك لتبرد قليلا وتقطع وتقدم بعدة أشكال

ممكن تقدم وعليها بولة آيس كريم فى ليالى الصيف الحاااارة

أو تقدم مزينة بالفواكة للتخفيف

أو تقدم وعليها صوص الشيكولاتى والحليب المكثف .. وممكن أيضا نعمل لها صوص من الحليب المكثف وجبنة الفلادلفيا

وبالهنا والشفا .. جربوها وإن شاء الله هتعجبكم

النهاردة هأقول لكم على وصفة سحرية وهى وصفة فى العائلة من زمان … كيكة جدتى الرخامية … عمرها ما خيبت معايا ودايما مشرفانى قدام ضيوفى والحمد لله وأهم حاجة وأغرب حاجة في الكيكة دى إنها ممكن تتشال فى الفريزر فترة طويلة شهر – شهرين  … أقصى مدة جربتها شهرين والكيكة دي بتكون حلوة جدا وهى نازلة من الفريزر .. فعلا جميلة قوى سيبوها تفك ربع ساعة وقدموها مع شاى جميل أو فوقيها بولة آيس كريم فى أيام الصيف الحارة .. تعالوا بقا أقول لكم على كيكة جدتى الشهيرة

شوفوا قد إيه هشة وطرية وجميلة فعلا أنصحكم تجربوها نييجي للمفيد

المقاديـر كالآتـى

٤ أكواب دقيق أبيض متعدد الإستعمالات –

٣ كوب سكر أبيض –

٢ كوب زبدة طرية –

١ كوب لبن حليب –

٦ بيضات متوسطة الحجم –

١ معلقة كبيرة بيكنج بودر –

رشة فانيليا –

٦ ملاعق كبيرة كاكاو بودرة غير محلى –

الكيكة دي بنسميها فى عائلتنا كيكة ٤- ٣-٢-١ نسبة إلى نسب الدقيق والسكر والزبدة واللبن فكرة حلوة لتذكر المقادير

الــطـــريـــــقة

بالخفاق اليدوي نخفق الزبدة الزبدة جيدا مع السكر حتى تصبح كريمي – أنا قطعت الزبدة مكعبات حتى يسهل خفقها بالخفاق اليدوي

نضيف البيض بيضة بيضة ونستمر بالخفق حتى ننتهى من البيض ثم نضيف رشة الفانيليا

نضيف اللبن ونستمر بالخفق ثم ننخل الدقيق جيدا ونضيف الدقيق واحدة واحدة ونضيف البيكنج بودر فى النصف

نحضر ٣ قوالب  للكيك ونوزع نصف الكمية فى القوالب

نضيف الكاكاو على النصف الباقى ونقلب جيدا ثم نضيف الجزء اللى بالكاكاو على باقى القوالب

بطرف سكينة أو شوكة نعمل تموجات فى القوالب حتى نحصل على الشكل الرخامي

يدخل فى فرن مسخن مسبقا على درجة ٣٥٠ فهرنهايت ولا نفتح باب الفرن أبدا أبدا قبل مرور ٣٠ دقيقة  وإلا الكيكة هتهبط ومش هتبقى هشة

نختبر نضوج الكيكة بوضع خلة أسنان فى المنتصف لو خرجت نظيفة يبقىالكيكة نضجت لو مش نظيفة نتركها كمان ١٠ دقائق أو أقل على حسب الفرن

نترك الكيكة تبرد جيدا ونلفها بالفيلم ونضعها بالفريزر لحين الإستخدام

قبل التقديم نطلع الكيكة من الفريزر بربع ساعة ونتركها فى درجة حرارة الغرفة حوالى ربع ساعة ثم تقطع وتقدم بالهنا والشفا

إذا كنتم ناويين على أكل الكيكة طازجة يستحسن تتركوها فى الثلاجة لمدة ساعة قبل التقطيع والتقديم بتكون أطيب

وهنا إبنى بيلحس الخفاق … أكيد أغلبكم عمل كده وهو صغير

 

أفكــار للتقديم

طبعا تقدم كده سادة مع الشاى أو القهوة ويمكن تزيينها بالفواكة أو الآيس كريم