بعد ما إتكلمنا عن تحديد الميزانية وقد إيه الموضوع ده مهم ومفيد لتخفيض المصاريف دلوقتى هأكلمكم عن تحديد المنيو
أو التخطيط للمنيو سواء أسبوعى أو كل أسبوعين أو شهرى
أول سؤال : يعنى إيه التخطيط للمنيو؟
هو ببساطة لما زوجك أو أحد من الأولاد يسألك السؤال اللى كتير من الأمهات والزوجات بيعتبروه سؤال متعب للأعصاب …. هنآكل إيه النهاردة؟ بالذات لما فعلا ما يكونش فيه أكل معين
فيه ناس بتخطط للوجبات الثلاثة وكمان السناك يعنى بتقعد مع نفسها تعمل جدول فطار وغدا وعشا وسناك
إحنا فى بيتنا هنا ماشيين بالنظام المصرى يعنى الغدا هو الوجبة الرئيسية فى اليوم والباقى فطار وعشا بيكون ساندوتشات … زبادى … سيريال … يعنى اللى موجود
بالنسبة لبيتنا وطريقة معيشتنا الوجبة الوحيدة اللى أنا شايفاها تستحق التخطيط هى وجبة الغدا لأنها أكتر وجبه مكلفة ومحتاجة مجهود ووقت فى التحضير
وبالتالى أنا بس بأخطط لوجبة واحدة وهى الغدا
السؤال التانى : هأستفيد إيه لما أخطط للوجبات؟
أولا : هتريحى بالك من السؤال السخيف والغلس اللى قلنا عليه اللى عايز يعرف يبص فى الجدول أو على الاقل إجابتك هتكون جاهزة
ثانيا: كلنا بنصحة من النوم شايلين هم الأكل… ومتسربعين عايزين نلحق نطبخ قبل ما الأولاد يرجعوا من المدرسة لكن لما تخططى وتكون كل حاجة جاهزة فى الفريزر هترتاحى من الضغط العصبى والنفسى الناتج عن الموضوع ده
ثالثا: هتوفرى فلوس كتير …. أيوة هتوفرى فلوس فعلا .. مفيش أكل هيترمى أو يتبقى كله معمول حسابه وكمان هتبطلى تجرى تشترى أكل جاهز فى آخر لحظة لأنك النهاردة صحيتى تعبانة أو نفسيتك تعبانة أو حتى ما عندكيش وقت ولا مزاج تقفى فى المطبخ بالقليل خالص هتوفرى تمن الفرخة المشوية اللى بتروحى تشتريها – ودى أرخص حاجة- لما ما يكونش فيه طبيخ فى البيت النهاردة
رابعا: هتوفرى على نفسك الإحساس بالذنب … سيدات كتير بتحس بالذنب لما ما تطبخش وتروح تشترى أكل جاهز … يا إما لأنها بتضيع فلوس كتير يا إما لأنها ما وفرتش أكل صحى ومفيد لأطفالها
أنا مش بأقول إننا ما نآكلش من برة … لأ التغيير حلو لكن لما نكون مخططين له مش كل أسبوع نشترى أكل مرتين وتلاتة من برة