تاني طبق معانا النهاردة هو طبق خفيف وسهل وهو الشكشوكة لكن بشكل جديد
الشكشوكة اللي أعرفها هي بيض مع طماطم وبصل وأحيانا فلفل رومي .. المرة دي هنضيف لها فول – مسمار البطن 
– علشان نقدمها بشكل جديد شوية وتبقا وجبة مشبعة تنفع بقا فطار .. عشا … غدا أو سحور في شهر رمضان الكريم
المقادير متوفرة والطريقة سهلة وبسيطة ومفيهاش إفتكاسات تقدروا تستخدموا فول علب أو بيتي وأي نوع فول تحبوه بيمشي الحال … يا رب تعجبكم
شكشوكة الفول
2016-03-12 23:44:19
Ingredients
- ١ علبة فول مدمس أو فول من صنع إيديكم
- ١ بصلة متوسطة
- ٣ معالق كبيرة زيت زيتون
- ٣ حبات طماطم متوسطة ومقطعة
- ١ كوب فلفل رومي ألوان أو أخضر مقطع
- ملح وفلفل
- ١\٢ معلقة صغيرة كمون
- ٧ بيضات أو على حسب عدد الأفراد
Instructions
- ١- على نار متوسطة نحمس البصل في زيت زيتون لمدة دقيقة أو إتنين تقريباثم نضيف الطماطم المقطعة ونقلب دقيقة ثم نضيف الفلفل المقطع ونقلب ونتركه على نار هادئة لمدة ٤ دقائق تقريبا ونظبط الملح
- ٢- في طبق الفرن نضيف الفول ثم نغطيه بخليط الخضروات السابق تحضيره
- ٣- نكسر البيض فوق الخليط ويرش بالملح والفلفل والكمون
- ٤-يدخل فرن حار ٣٥٠ فهرنهايت تقريبا لمدة ٣٠ دقيقة أو على حسب ما تحبوا درجة سواء البيض.
- وبالهنا والشفا
مغتربة http://moghtareba.com/
ازيك يام حسن انا عرفة انى وحشتك مش كدة :)هههه عاملة ايه كنت حابة اعرف انتى بتنزلى مضر كل اد ايه وعلى اى طيران؟
والله المدونة كلها وحشتني .. عندي ظروف اليومين دول والله المستعان
السنة اللي قبلها نزلنا على الطيران البريطاني بس كان سعره تحفة ولقطة لأنه غالبا غالي جدا جدا
بالنسبة للنزول حسب المقدرة بس أغلب الناس بتروح سنة وسنة إحنا بقالنا فترة بننزل كل سنة لما إتخرب بيتنا والحمد لله وفي الغالب الصيف ده مش هننزل
أما الطيران أنا مش بأدق يعني الأرخص في الغالب السنة اللي فاتت نزلنا على يونايتد ولفينا الكرة الأرضية