مطبخ مغتربة :: الكسكسي الحلو

السلام عليكم

كيف حال الجميع .. يا رب تكونوا جميعا بخير وصحة وسعادة

النهاردة جايبة لكم طبق لذيذ جدا وسهل التحضير وشخصيا ما كنتش بآكله وأنا صغيرة ومكنتش بأحب الكسكسي عموما.. الواحد فعلا بيتغير بشكل رهيب .. دلوقتي اللي يسيبني على حلة بحالها لوحدىي ما أقولش لأ نوهاااائي أمااااال

الطبق ده مش كل الناس متعودين عليه وطبعا أمهاتنا الحلوين وجداتنا بيعملوه بالسمن البلدي المحترم لكن أنا هنا عملته بالزبدة على قدي بس ما تحاولوش تعملوه بالزيت طعمه مش أوي أو ممكن شوية زيت وشوية زبدة يعين عموما ما تكتروش من الزبدة برضو أنا حطيت على كباية الكسكسي ٢ معلقة كبيرة زبدة والمقدار يكفي تقريبا ٦ أشخاص من غير إفترا في الأكل يعني وبالهنا والشفا على قلوبكم

عند زوجي الغالي في بيتهم بيحطوا عليه قرفة ولبن وبيبقا عامل زي ما يكون سيريال كدة ممكن يآكلوه على الصبح .. جميييل وفكرة لذيذة .. أنا هنا عملته على الناشف لأنه كان حلى بعد الغدا كدة  وممكن نتعشى بيه برضو مش هيقول لأ .. لذيذ ومليان مكسرات وزبيب .. طبعا إستخدموا المتاح عندكم في البيت وبألف هنا

 أسيبكم مع الفيديو والوصفة وإن شاء الله تعجبكم

الكسكسي الحلو

2016-02-22 14:26:19

طبق لذيذ وسريع التحضير .. يصلح للفطور أو العشا أو كتحلية بعد الغدا

Write a review

Save Recipe

Print

Ingredients

1. ١ كوب كسكسي
2. ١ وربع كوب ماء لتحضير الكسكسي- أو حسب ما هو مكتوب على العبوة
3. ٢ معلقة كبيرة زبدة غير مملحة
4. ربع كوب سكر بودرة - أو على حسب رغبتكم
5. للوجة
6. مكسرات زبيب - جوز هند مبشور - والمزيد من سكر البودرة *

Instructions

1. في حلة على نار متوسطة نضع الماء ومعلقة من الزبدة وننتظر حتى تغلي
2. نضيف كوب الكسكسي وننتظر لدقيقة
3. نغطي الحلة وترفع من على النار وتترك لمدة ١٠-١٥ دقيقة
4. نفلفل الكسكسي بإستخدام شوكة ونضيف السكر البودرة ومعلقة الزبدة المتبقية
5. *تقدم ساخنة مع تزيين الوجه بالمكسرات والمزيد من السكر البودرة والمكسرات
6. وبالهنا والعافية

Notes

1. يتم التزيين بأي شيئ موجود بالبيت وبعض الناس تفضل وضع لبن على الكسكسي أيضا

مغتربة http://moghtareba.com/