مطبخ مغتربة :: قلوب الشيكولاتة بالشاي الأخضر والفستق

السلام عليكم

جمعة طيب ومباركة عليكم جميعا بإذن الله

اليوم معايا وصفة لعمل حلى لطيف وسهل بالبيت  وفيه جزء صحي شوية لأنع معمول بالشاي الأخضر

الشاي الأخضر اللي أنا مستخدماه في الوصفة دي شاي ياباني إسمه ماتشا وده نوع من أنواع الشاي عالي الجودة ومضادات الأكسدة فسه أكتر بكتير من الشاي الأخضر العادي

لكن طبعا لو الشاي ده غير متوافر عندكم بإمكانكم طحن شاي أخضر عادي حتى يصبح بودرة تماما حتى يمتزج جيدا مع الشيكولاتة البيضا

بإمكانكم زيادة مقدار الشاي الأخضر على حسب قدرتكم على إحتماله وإذا كان مش بيضايقكم .. شاي الماتشا شاي فيه طعم مر شوية علشان كدة أنا إستخدمت كمية قليلة شوية لغاية لما أتعود عليه كويس بعد كدة هأبقى أزود الكمية

إستخدام الفستق المطحون بيدي الشيكولاتة طعم رائع وجميل جدا جدا إطحنوه كويس وضيفوه على الشيكولاتة

بالنسبة للشيكولاتة البيضا حاولوا تجيبوا نوع يكون كويس أنا إستخدمت نوع إسمه بيكرز ,, المهم إنه يكون فيه زيدة الكاكاو

بالنسبة لدرجة الحرارة .. مهم جدا إننا ما نسخنش الكريمة فترة طويلة لأنها ممكن تبوظ الشيكولاتة في الحالة دي يفضل إستخدام ترمومتر الحلويات لكن طبعا علشان أنا عارفة إن دة ممكن ما يكونش متوافر في بيوت كتير يبقى هنشتغل بنظام عينك ميزانك يعني إيه .. هنحط الكريمة على النار وأول ما تبدأ نلاحظ ظهزر فقاقيع على جدار الحلة نرفعه من على النار ونضيف الشيكولاتة البيضا بسرعة

مهم تقطيع الشيكولاتة البيضا لقطع صغيرة حتى يسهل ذوبانها في الكريمة ممكن نبشرها أو تقطعوها بالسكين .. الأسهل لكم

آخر ملحوظة بقا يفضل إستخدام قوالب صغيرة لتشكيل الشيكولاتة .. لأنها إدماااان وأنا القوالب عندي كبيرة شوية وبالتالي الواحدة بتبقا كبيرة .. لو بتحبوا الشيكولاتة البيضا إن شاء الله هتحبوا الوصفة دي وهتعجبكم .. ممكن كمان نغلفها في سلوفان ونعطي منها هدايا مثلا للمدرسين في الأسبوع بتاع التيتشر أبريشياشان ده

Teacher Appreciation week

هتعجبهم أوي بس إكتبوا عليها المكونات علشان الحساسية:) ما تنسوش

أسيبكم مع الوصفة والفيديو

شيكولاتة بيضا بالفستق والشاي الأخضر

2016-02-12 10:30:42

Write a review

Save Recipe

Print

Ingredients

1. ٢٠٠ جم شيكولاتة بيضا - نوع جيد يحتوي على زبدة الكاكو
2. ربع كوب كريمة الطبخ للحلويات
3. ١ معلقة كبيرة زبدة غير مملحة
4. ٢ معلقة صغيرة ماتشا- بإمكانكم إستخدام شاي أخضر مطحون بودرة *
5. ملعقة كبيرة ونصف فستق مطحون
6. قوالب لتشكيل الشيكولاتة

Instructions

1. ١- نقوم ببشر الشيكولاتة البيضا أو تقطيعها لقطع صغيرة جدا جدا
2. في حلة على نار هادئة جدا نقوم بتسخين كريمة الطبخ
3. بمجرد ظهور فقاقيع حول الجدار ترفع من على النار
4. وبسرعة نضيف الشيكولاتة البيضا والزبدة ونحرك سريعا حتى تذوب الزبدة وقطع الشيكولاتة في الكريمة الساخنة
5. نضيف بودرة الشاي الأخضر ونضيف البودرة مع التقليب جيدا
6. تصب الشيكولاتة في القوالب وتترك لتبرد
7. توضع بالتلاجة من ٤ - ٦ ساعات حتى تتماسك أو تترك تبات في التلاجة
8. وبالهنا والشفا

Notes

1. ** الماتشا هو نوع من أنواع الشاي الأخضر الياباني عالي الجودة إذا وجدتوه يفضل إستخدامه أما إذا كان غير متوافر بإمكانكم طحن الشاي الأخضر العادي حتى يصبح بودرة وإستخدامه

مغتربة http://moghtareba.com/

ملحوظة : بعض اللينكات السابقة تحتوي على روابط إحالة .. قد تساعدني في الإبقاء على عمل المدونة للمزيد إقرأوا سياسة الخصوصية هنــــا