مطبخ مغتربة :: كيكة الفستق بالسميد

السلام عليكم

اليوم معايا كيكة ما توقعتش إن أصدقاء زوجي الأمريكان في الشغل تعجبهم لأنهم مش بيحبوا السكر بتاعنا – آل يعني بقا وهم أصلا الدوناتس بتاعهم غرقان في السكر – لا حقيقي بيخافوا جدا من الحلويات الشرقية .. بتعجبهم جدا لكن مش بيقدروا يآكلوا منها .. لكن دي فعلا أنا قللت فيها السكر وبدل ما أسقيها شربات سقيتها لبن مكثف ومحلى وبس حطيت نصف العلبة مش العلبة كلها .. لو علي أنا كنت حطيت العلبة كلها :))) أموت في السكريات

المهم كلهم الحقيقة سألوا زوجي على الوصفة والحمد لله إنها عجبتهم ودخلت مزاجهم .. لو هتعملوا الكيكة لحد بيموت في السكر زيي ممكن تزودوا السكر أو جربوا تسقوها شربات .. الكيكة هنا متوسطة السكر بس فعلا جميلة جدا جدا أنصحكم بيها

مشكلتها حاجة واحدة بس هي إنكم هتآخدوا قطعة ورا التانية لغاية لما تخلصوا الصينية كلها بالهنا والشفا جمييييلة فعلا علشان كدة لما عملتها خرجتها برة البيت وبعتها مع زوجي للشغل أنا مش ناقصة سكريات

أولادي ما أكلوش منها … تفتكروا ليه؟ الأساتذة مش بيحبوا الفستق!!! فقريين زي ما بنقول في مصر هو حد لاقي فستق يا ابني إنت وهو … لكن هنقول إيه بكرة يعرفوا غلطتهم

من الحاجات الجميلة في الكيكة دي كمان هو انها مقرمشة شوية يعني مش زي الكيك اللي معمول بالدقيق .. لأنها معمولة بالسميد بنلاقيها محببة كدة وجميلة فعلا مش هتفهموني إلا لما تجربوها إن شاء الله

سهلة جدا جدا ومش محتاجة وجع دماغ ولا غلبة .. هنحتاج فيها كريمة حامضة أو ساور كريم .. لو مش متواجد ممكن نضيف قشطة – ولو إن الساور كريم أخف بكتير – وما نحطش لبن

أتمنى تجربوها وإن شاء الله تعجبكم أترككم مع الفيديو والوصفة مكتوبة

ملحوظة على الفيديوهات الجديدة : إضطريت أدمج قناة اليوتيوب العربية مع الأجنبية بسبب مشاكل حصلت لي في اليوتيوب أتمنى أعرف رأيكم وإذا كان ده تسبب في أي مضايقة ليكم وإقتراحاتكم .. شكرا لكم على متابعتكم الجميلة

كيكة الفستق والسميد

2016-02-08 23:27:02

Write a review

Save Recipe

Print

Ingredients

1. ١ ونصف كوب دقيق بسبوسة - سميد
2. ١ كوب فستق مطحون والمزيد للتزيين
3. ١\٤كوب لبن حليب
4. ٣\٤ كوب كريمة حامضة *
5. ١\٤ كوب زيت
6. ٣\٤ كوب سكر - بإمكانكم زيادتها لكوب
7. ٢ م ص بيكنج بودر
8. ٢ بيضة
9. رشة فانيليا
10. ** شيرة أو حليب مكثف للوجه

Instructions

1. في وعاء عميق نضرب البيض مع رشة الفانيليا لمدة ١٥ ثانية
2. نضيف السكر ونضرب حتى يمتزج السكر جيدا
3. نضيف الزيت والساور كريم واللبن ونكمل خفق
4. نخلط السميد مع البيكنج بودر والفستق المطحون
5. نضيف خليط السميد للمكونات السائلة ونقلب حتى تمام الإمتزاج
6. ندهن صينية الفرن جيدا ونصب بها الخليط
7. يدخل فرت مسخن مسبقا على ٣٥٠ فهرنهايت لمدة من ٣٠ لـ ٤٠ دقيقة
8. تسقى بشربات - شيرة - أو بحليب مكثف
9. تزين بالمزيد من الفستق المطحون
10. وبالهنا والشفا

Notes

1. * إذا لم يتواجد الساور كريم أو الكريمة الحامضة بالإمكان إستخدام علبة قشطة والإستغناء عن اللبن
2. ** إستخدمت نصف علبة حليب مكثف ومحلى بإمكانكم إستخدام العلبة كلها إذا بتحبوا السكر أكثر بالحلويات

مغتربة http://moghtareba.com/