مطبخ مغتربة :: وصفة صحية أصابع الكوسة المقرمشة

السلام عليكم

وصفة اليوم وصفة سهلة جدا وكانت محببة لي لما كنت بأعمل رجيم أو بأحاول أخفف من الأكل لأنها كانت بتحد من الرغبة في أكل البطاطس المقلي والمقرمشات عموما .. يعني حاجة بنتصبر بيها علشان نتحمل الرجيم

أصابع الكوسة المقرمشة والمخبوزة في الفرن عملتها ببقسماط البانكو اللي كنت قلت لكم عليه من قبل في وصفة الدجاج لكن ممكن نعملها بأي بقسماط عندنا مفيش مشكلة أبدا.. المرة دي أنا ما حمرتش البقسماط قبل ما أحطه لكن جربتها بالطريقتين والإتنين كانت لذيذة

لو بتحبوا الجبنة البارميزان ممكن تحطوا منها على خليط البقسماط .. إحنا مش بنحبها فخليت البقسماط كده سادة مع شوية توابل إيطالية .. يعني إلعبوا في البقسماط علشان يعطي نكهة أكتر للكوسة على حسب الرغبة

الطبق ده ممكن نعمله سناك أو طبق جانبي او حتى لو بنتبع رجيم وعايزين نآكل وخلاص .. ساعات بييجي لنا الإحساس ده .. هتآكلوا منه وضميركم مرتاح ما تقلقوش

ممكن تآكلوه سادة أو مع أي صلصة تغميس أو كاتشاب يعني اللي يعجبكم

أسيبكم بقا مع الوصفة وأتمنى تعجبكم وتجربوها إن شاء الله

أصابع الكوسة المقرمشة بالفرن

2015-10-12 11:17:44

وصفة سهلة وسريعة وتصلح لمتبعي الحمية والأكل الصحي

Write a review

Save Recipe

Print

Ingredients

1. ثمرة كوسة متوسطة الحجم
2. ١ بيضة
3. ربع كوب لبن
4. من كوب ل كوب ونصف بقسماط بانكو - أو عادي
5. نصف كوب دقيق أبيض
6. ملح وفلفل
7. نصف معلقة صغيرة بودرة ثوم
8. ١ ونصف معلقة صغيرة توابل إيطالية - إختياري للنكهة
9. ٢ معلقة كبيرة جبنة بارميزان - إختياري

Instructions

1. نقطع الكوسة أصابع رفيعة
2. في طبق خارجي نخلط البيض مع اللبن
3. في طبق آخر نخلط البقسماط مع الملح والفلفل وبودرة الثوم والتوابل
4. نغمس أصابع الكوسة في الدقيق
5. ثم توضع في خليط البيض ثم البقسماط وتقلب من كل جانب
6. نرش صينية فرن بالزيت نرص أصابع الكوسة
7. تدخل فرن حامي مسبقا ٤٢٥ فهرنهايت لمدة ٢٠-٣٠ دقيقة أو حتى تصبح ذهبية اللون
8. تقدم مع أي صلصة تغميس أو كاتشاب

Notes

1. بإمكانكم قلي أصابع الكوية في زيت خفيف لكن طبعا في الفرن أخف

مغتربة http://moghtareba.com/