طووول عمري أسمع من أمي ـ أطال الله في عمرها وبارك لما فيها – إننا لازم ننشف غسالة الملابس بعد إستخدامها وكنت بأتضايق جدا من الموضوع ده .. ولما تزوجت في مصر ما أفتكرش إن عمري نشفت الغسالة بعد الإستخدام وكانت الأمور ماشية تمام . الجديد بقى إني لما جيت هنا وجربت الغسالة اللي بيسموها هنا هاي إفيشنسي اللي ليها باب أمامي مش من فوق وما نشفتش الغسالة زي ما ماما قالت لي حصل بلاوي في الغسالة .. ودي آخرة اللي ما يسمعش كلمة ماما تقولها ههههه
إيه اللي حصل في الغسالة بقى: بقيت بتطلع ريحة غريبة جدا ومقرفة في الغسيل .. مهما حطيت من أحسن أنواع منعمات الملابس مفيش فايدة فيه ريحة عطن في الغسيل!!! وكنت هأموت مش عارفة من إيه
وبعد البحث والتمحيص وقراءة العشرات من المواقع عرفت إن غسالتي المحترمة فيها عفن وهو اللي بيطلع الرائحة دي على الملابس .. العفن ده بيبدأ في الجزء الكاوتش بتاع باب الغسالة ولو ما إتعالجش ممكن ينتقل للحلة وأجزاء داخلية من الغسالة وينتهي الأمر يا إما بتغيير الحلة أو نرمي الغسالة الموقرةونشتري غيرها
من لطف الله بي إن العفن عندي كان فقط في الجزء الكاوتش لباب الغسالة .. وأنا فعلا كنت بأفتح هناك وألاقي حاجة عاملة زي الطين كده وكنت فاكراها وساخة من الغسيل وقعدت أقول في نفسي يااااة معقول هدوم الولاد مهببة كده!!! ومهما نضفته بيرجع تاني!! لغاية ما عرفت إنه لازم له حل جذري وعاجل ولازم تنضيف كل شهر أو إتنين على الأكثر ولازم لاوم … إييييه؟ تمااام برافو عليكم ننشف الغسالة
أو على الأقل نسيب الباب مفتوح لغاية لما تنشف لوحدها
تعالوا بقى أوريكم خطوات تنضيف الغسالة ذات الباب الأمامي
أولا الخطوات دي لازم تتعمل كل شهرين مثلا لضمان نضافة الغسالة وتعقيمها ولو أصلا عندكم عفن يبقى تعملوا الموضوع ده كذا مرة لغاية لما تتأكدوا تمام إنكم قضيتم على الفطريات دي ورجعت الغسالة بتلمع .. كمان الخطوات دي مهم نعملها قبل ما نغسل غسيلنا في غشالة مأجرينها أو إشتريناها مستعملة يعني لضمان نضافتها وتعقيمها كويس
هنعمل محلول تنظيفي عبارة عن ١ جالون (٤ لتر تقريبا ) ماء + ١ كوب كلوركس *
بإستخدام فوطة أو قطعة قماش بيضاء نغمسها في المحلول وننضف كاوتش الباب جيدا *
نترك المحلول ليقضي على الفطريات والعفن مدة لا تقل عن ٥ دقائق ثم نمسح بفوطة أخرى ناشفة *
نقوم بخلع درج الصابون وننضفه جيدا بالماء والصابون ونرجعه تاني مكانه *
في أسفل الغسالة هنلاقي مكان الفلتر نجيب فوطة كبيرة ونضعها أسفل مكان الفلتر ونخرج الفلتر*
هيتدفق ماء من الغسالة نتركه ينزل وننضف الفلتر بماء فاتر ونمسح مكانه ونركبه تاني *
نظبط الغسالة على أعل برنامج من حيث سخونة الماء والمدة ونملأ درج الصابون بالخل ونشغل الغسالة *
بعد إنتهاء دورة الخل نملأ كل الأدراج بالكلوركس ونشغل على دورة عادية ونتركها تعمل للنهاية *
نشغل الغسالة مرة أو مرتين بعدها بماء فقط وطبعا مفيش هدوم في كل الدورات دي *
إن شاء الله بعد كل التنضيف ده مش هتلاقوا رائحة تاني في الهدوم وحشة وترجع الغسالة فل ونضيفة
ملاحظات مهمة للإبقاء على نضافة الغسالة
تنشيف حلة الغسالة والباب والكاوتش بعد كل غسلة *
نترك باب الغسالة مفتوح لفترة لعد دورة الغسيل للتأكد من إنها جفت بشكل جيد *
نشيل الغسيل من الغسالة قدر الإمكان فور إنتهاء دورة الغسيل *
نعمل عملية التنضيف دي مرة كل شهرين أو كل شهر للصيانة ولضمان نضاقة وتعقيم الغسالة *
ده فيديو قصير يوضح طريقة تنضيف الغسالة أتمنى يعجبكم وآسفة على الكواليتي بتاعة الصورة .. معلش سااامحوني .. ما عرفتش أصوره تاني والغسالة دي مش عندي خلاص
مع تمنياتي الخالصة بغسيل نضيف ورائحة فريش وغسالات بدون عفن!!! وما تنسوش تسمعوا كلام ماما هههه
جزاكى الله خيرا
جزانا وإياكم