لمحات من أسبوعنا الماضي

مش المهم ضاع مني إيه المهم وفرت أد إيه ههههه

أول الأسبوع اللي فات كنت كتبت لكم عن عرض تارجت بتاع الأوكسي كلين .. المهم عملت الكوبونات ووضبت حالي وقلت آخد الكاميرا معايا علشان أصور لكم العرض عيانا بيانا وتشوفوا كل حاجة عيني عينك

المهم روحت تارجت وصورت لكم العرض ومعايا أهه الأربع كوبونات إياهم .. ورجعت البيت وكلي فخر

وكمان جيبت العرض الفري بتاع التشيز إت وعرض الشيكولاتة إم آند إمز وقلت أصور بقى لكم إشتريت إيه علشان تشوفوا وتتشجعوا تستغلوا العروض وأدرو على الكارد اللي بأنقل بيه الصور من الكاميرا مش لاقياه ولا لقيت الشنطة الصغيرة اللي فيها الكاميرا … قلبت الدنيا وروحت تارجت مرتين يمكن حد يكون لاقاهم مفيش

ومن الآخر أنا ضيعت حاجات بـ ٢٠ دولار وأنا بأوفر ١٠ دولا مش مهم لكن المهم إني وفرت مش كده .. إوعوا تقولوا حاجة غير كده ههههه

 

وأخيرا وبعد طول غياب رجعت تاني أعمل الأكل بتاع الأسبوع وأحطه بالفريزر … ياااه فعلا شيئ مريح جدا جدا يعني النهاردة مثلا الأكل عندي جاهز وبكرة وبعده مش هأقعد لسه أفكر في الأكل أطلع إيه بالليل وكل يوم أقف في المطبخ ساعتين على ما أخلص الأكل وضبت الأساسيات

عملت مكروونة بالبشاميل ولسه هأحمر وشها النهاردة إن شاء الله

وعملت كفتة وحلة رز محترمة أهه لزوم الناس اللي بتحب الرز عندنا في البيت

وده الأستاذ الصغير بيعمل معايا تجربة علمية معملية فذة … بنحاول نعمل الرول أبس ويا رب تفلح

وفي هذه الأثناء كان إبني التاني بيعمل معايا شوية عربي .. والحمد لله الحقيقة مستواه إتحسن .. مش قوي يعني بس بالتأكيد أحسن وعلى فكرة القراءة في المصحف الشريف حسنت جدا اللغة العربية عندهم في فترة قصيرة وإن شاء الله نستمر عليها

وهنا خلاص خلصت أكل الأسبوع بعد ما وقفت في المطبخ حوالي ٣ ساعات .. حلة الرز ومكرونة بالبشاميل – لحمة التاكوز و دجاج طاووق تبلته وهأبقى أحطه في الأسياخ بقى يوم الأكل إن شاء الله

العصفورة العنيدة

الأسبوع اللي فات كل يوم تقريبا كنت أطلع البلكونة وألاقي قش صغير وحاجة كده فوق اللمبة بتاعت البلكونة وأنزلهم بالمقشة وأشيلهم .. تاني يوم نفس الكلام .. لغاية لما يوم الصبح واحد من أولادي قال لي بصي العصفورة دي يا ماما بتعمل بيت عندنا ولازم نمشيها

إحنا كان عندنا تجلابة قاسية قبل كده مع عصفورة سيبناها تعمل بيتها وباضت والكتاكيت طلعوا وبعدين العصفورة في الغالب خافت مننا ومن حركتنا وطارت وهجرت العش والكتاكيت فيه وماتوا وكان شيئ مؤلم فعلا ومحزن للأولاد

علشان كده لازم كنا نطير العصفورة من هنا ونخليها تعمل العش في أي مكان تاني .. المهم العصفورة دي سبحان الله بتعمل العش في ساعات معدودة فعلا وقعدت أنا والأولاد نبص على العش وقد إيه محكم وشكله جميل ونقول سبحان الله

هديت لها العش يمكن ٣ أو ٤ مرات لغاية لما يئست ومشيت أنا زعلانة بس والله قصدنا خير علشان ما تطلعش ندلة وتطير وتسيب عيالها ههههه

أشوفكم الأسبوع اللي جاي إن شاء الله .. عملتوا إيه الأسبوع ده؟ تعليقاتكم بتسعدني