طرق وأفكار جديدة للتوفير : الفكرة الثالثة – إشتراك الدش

أهلا بيكم .. بعد ما عملنا أول فكرتين في التوفير الأولى والثانية هنــا أتمنى تكونوا بدأتم تقتنعوا شوية .. نأتي للفكرة التالتة وهي إلغاء إشتراك الدش أو الكابل

ليه نلغي إشتراك الدش أو الكابل

أنا عارفة إن الموضوع ده صعب جدا جدا على ناس كتير .. ناس كتير بتقول ده المتعة الوحيدة في حياتنا هو التليفزيون

أولا بالنسبة للناس اللي عايشين برة الدول العربية وعاملين إشتراك في الكابل .. الحقيقة ده شيئ غير محبذ نهائي لأن بيكون فيه قنوات وإعلانات مش كويسة وممكن أولادنا يفتحوها فأنا أعتقد إن قلتها أحسن

بالنسبة للقنوات العربي عندنا هنا ديش نيتوورك وكمان دايركت تي في دول بيجيبوا قنوات عربي .. الإشتراك في المتوسط لو الباقة الأولى هيكون ٣٠ دولار في الشهر برضه مالهمش لازمة ممكن نستغنى عنهم

أما الناس اللي عايشين في مصر مثلا وعاملين إشتراك اللي بيقولوا عليه سلك فغير إن أغلب الشيوخ قالوا عليه حرام ممكن نقطعه خالص ونكتفي بالدش المجاني

تقدروا تتفرجوا على البرامج اللي بتحبوها وتتابعوا الأخبار والقنوات على النت .. أغلب القنوات عاملة بث مباشر وبالنسبة للكارتون وأفلام الأطفال موجودين على اليوتيوب .. يعني هنقدر نتصرف مش نهاية العالم

ثم إن قطع الدش ده بيخلي فيه وقت أطول للحوار في العائلات نقعد كده زي زمان ونتلم على ساندوتشات وشاي ونرغي وممكن برضه نتفرج  على حاجة مع بعض من غير إعلانات

بحسبة بسيطة لو قلنا ٣٠ دولار في الشهر ونشوف السنة كلها يطلع لنا ٣٦٠ دولار ومحدش يقول مبلغ بسيط لأن كله بيتجمع في الآخر وبيعمل مبلغ كبير

أتمنى تكون فكرة اليوم عجبتكم ولينا لقاء إن شاء الله الأسبوع القادم مع فكرة جديدة