قبل كده كنت قدمت لكم مجموعة من الخطوات للتوفير … مؤخرا لاحظت إن ناس كتيرة بتدخل على مغتربة من خارج أمريكا وكندا وفعلا وصلتني طلبات إني أحاول أشوف طرق للتوفير للناس اللي برة أمريكا.. وبما إن الحاجة أم الإختراع هنشوف مجموعة من الحاجات اللي ممكن نعملها علشان نزود التوفير والحاجات دي مش من ضمنها الكوبونات
ساعات بنكون في ضائقة مالية ومحتاجين كل سنت وقرش وفلس وصدقوني الحاجات الصغيرة اللي هأقول لكم عليها دي بتلم في آخر السنة مش أقل من ١٠٠ دولار لو حسبناها على الناس اللي عايشة في أمريكا .. يعني لو طبقنا منها ١٠ هنوفر ألف دولار على الأقل كل سنة وده مبلغ مش بسيط
الحاجات دي ممكن بعضها يكون صعب .. هي مش طريقة حياة هي طرق لفك الأزمة .. أو لغاية لما الأزمة تعدي بسلام ونخرج منها بدون ديون مضاعفة ومشاكل مادية أكتر مما دخلناها .. ولو إن فيه كتير من الطرق دي أنا شخصيا إتعودت عليها وبقيت بالنسبة لي طريقة حياة .. ونرجع نقول إخشوشنوا فإن النعمة لا تدوم
الفكرة الأولى: السينما في البيت!!! .. أيوة صح في البيت
بما إني مريت بسنوات عجاف والحمد لله وكان عندي أطفال وأكيد محتاجين يخرجوا ويتفسحوا ويروحوا سينما وكلنا عارفين إن ده تكاليف عالية جدا بالذاااات السينما
كل أسبوع تقريبا كنا نعمل موفي نايت في البيت .. وإلى الآن بنعملها وبتبسطني جدا جدا وبتبسط الأولاد كمان
الفيلم ممكن نجيبه من كذا مكان
أولا: فيه أفلام كتير موجودة فري على اليوتيوب أو إعملوا بحث وهتلاقوا فيه أفلام كتير موجودة فري .. طبعا مش هتكون أفلا حديثة لكن المهم إنها تكون جديدة عليكم وخلاص
ثانيا: لو إنتم في بلد فيها مكتبات عامة هاتوا الأفلام من المكتبة ودي برضه بتكون فري ١٠٠٪ ومن غير ولا مليم
ثالثا: بدل ما تروحوا السينما وتدفعوا تذاكر كتيرة في الفيلم الجديد إنتظروا ينزل بعدها بشهر تقريبا على أمازون أو جوجل مثلا وأجروه لمدة يومين أو ٣ بتمن تذكرة واحدة فقط
رابعا: فيه كمان هولو عليه شوية حاجات فري وممكن نت فليكس وغيرهم مواقع كتير كمان نت فليكس بيدي إشتراك شهر فري
خامسا: لو إنتم في أمريكا أو كندا ساعات بيكون فيه فري كود من ريد بوكس وبنقول هليها هنا
ويا سلام بقى لما نعمل بيتزا في البيت مع فيشار بيتي محترم وممكن كيكة واللا شيكولاتة وخلاص هتعدي الليلة وهيبقى الكل مبسوط
صدقوني إحنا بنحب جدا نعمل الموضوع ده لأننا بنتفرج براحتنا وبنكون قاعدين كلنا مع بعض وبنوفر توفير كبير .. ده لو عملتوا الموضوع ده كل ويك إند مش هتكملوا تمن مرة في السينما مع أكل برة وفيشار والكلام بتاع الولاد ده
طبعا أنا عارفة إن السنما ليها بهجتها بالذات مع الصغيرين .. يعني لو إتزنقتوا يبقى مرة كل شهرين تلاتة ويستحسن تخلوها بدري الصبح لأن حفلات الصبح بتكون أرخص بالذات مع العدد الكبير
أتمنى فكرة اليوم تكون عجبتكم ونالت الإستحسان منكم .. ويا رب تساعدكم
لو عندكم وسيلة أخرى لمشاهدة الأفلام أو ويب سايت لأفلام الأطفال يا ريت تشاركونا
دائماً مبدعة ربنا يسعدك ياريت يا أميرة لو عندك طريقة للكب كيك لانبنى كل يوم عاوزة تشترى من برة كب كيك. وطبعا انت عارفة الظروف وعملتها وفشلت ههههههههه لكن ماشاء الله الوصفة منمكن لتبقى مظبوطه
lojain says
يسلموا على الافكار
ام يوسف اروى says
دائماً مبدعة ربنا يسعدك ياريت يا أميرة لو عندك طريقة للكب كيك لانبنى كل يوم عاوزة تشترى من برة كب كيك. وطبعا انت عارفة الظروف وعملتها وفشلت ههههههههه لكن ماشاء الله الوصفة منمكن لتبقى مظبوطه
Amira says
يا سيدي على المزاج العالي بتاع البنانيت .. طيب سيبيني أمخمخ في وصفة وأعملها الأول مش ناقصين فشل ههههه