طرق وأفكار جديدة للتوفير : الفكرة الثانية- في بيتنا مخبز

أهلا بيكم في الحلقة التانية من مسلسل التوفير العصري والحصري على مغتربة ز زي ما قلت لكم الطرق دي إن شاء الله هتكون عامة ومش مرتبطة بالكوبونات

المرة اللي فاتت عرضنا فكرتنا الأولى والنهاردة مع الفكرة التانية

الفكرة الثانية : في بيتنا مخبز

حد فيكم جرب يخبز عيشه قبل كده في البيت؟ حسيتم بريحة الخبيز الحلوة بتملا البيت؟ الخبز أو المخبوزات عموما ليها رائحة جميلة جدا جدا وبتملا البيت بشكل رهيب وفعلا طعم الخبز طااازج من الفرن احلى بكتير من اللي بيتباع في السوق

 

وصفات الخبز متعدد وموجودة على الإنترنت كتير ولو مش لاقيين دوروا هنا في مغتربة

عمل الخبز في البيت مش محتاج إمكانيات لو عندكم ماكينة عمل الخبز هيكون أسهل ولو فقط عجان برضه سهل ولو حتى باليد هيكون متعب شوية بس لذيذ ويستاهل التعب علشانه

الخبيز في البيت بيخلينا عارفين إيه اللي بنآكله وفيه إيه من غير مواد إضافية مش عارفينها

 

كمان ممكن نضيف الإضافات اللي إحنا بنحبها زي سماق مثلا أو حبة البركة وهكذا

وممكن كمان نعمل تشكيلات ما كناش نحلم بيها ولا حتى بنعرف نعملها إزاي وإسألوني أنا .. ده غير الخبز العربي اللي بنحبه والمخبوزات العربية اللي هنا بتكون أسعارها مبالغ فيها جدا جدا… عندنا هنا المحل العربي بيبيع مناقيش الزعتر كل إتنين في كيس بـ ٣ دولار!!! طبعا سعر خرافي

طيب ييجي السؤال: هل فعلا عمل الخبز في البيت موفر؟… الإجابة

كريستي هنـــا جاوبت لكم على السؤال بالتفصيل وعملت دراسة مستفيضة على أبسط وأرخض أنواع الخبز وهو التوست العادي اللي بنشتريه ووجدت إن الرغيف بتقدر توفر فيه من ٥٠ سنت لـ ١.٥ دولار لو بتشتروا خبز ماركة غالية

شوفوا بقى ما شاء الله كام رغيف بتستخدموا في الشهر ده بس على خبز التوست .. أما بقى لو خبزتوا كل حاجة من سينامون رولز ودنر رولز وخبز البيتا ومناقيش وخلافه هتوفروا كام.. أعتقد لو أخدنا متوسط مش هيكون أقل من ٣٠٠ دولار في السنة لو إستهلاككم مش كبير وعائلتكم مش كبيرة

ده غير إن اللي فيكم بيدور على الأكل الصحي أكيد لازم يتجه لعمل الخبز في البيت لأنه هيوفر جدا بالذات لو بتعملوا أورجانيك لأن الخبز الأورجانيك غالي غلاء فااااحش هنا

أتمنى أكون أقنعتكم لو عايزين توفروا إنكم تعملوا الخبز بتاعكم بنفسكم  .. ودي محموعة من الوصفات تبدأوا بيها وأشوفكم المرة اللي جاية إن شاء الله

خبز بزيت الزيتون *

خبز الطابون الفلسطيني *

عجينة العشر دقائق *

الخبز الفرنسي *