السلام عليكم
من فترة … يمكن ٦ شهور أو أكثر .. دار هذا الحوار بيني وبين إبني الكبير -١١ سنة
إبني: ماما تعرفي إيه السؤال اللي مالهوش إجابة أبدا؟
ماما : لأ إيه هو يا ترى؟
إبني: مين أحسن إنسان في الدنيا دي؟ .. سؤال مالوش إجابة .. لأن كلنا زي بعض
ماما : لأ طبعا ليه؟
إبني: لأ مالهوش
ماما: لأ ليه يا حسن
إبني : طب مين؟
ماما: سيدنا محمد عليه الصلاة والسلام
إبني : بس ممكن ييجي واحد أحسن منه!! << طبعا كنت هأولع مش عارفة بيجيبوا الكلام ده منين
ماما : أولا يا حسن إزاي كلنا زي بعض؟ يعني الوحش زي الحلو .. الحرامي زي الكويس اللي بيسمع كلام ربنا لأ طبعا
ثانيا يا إبني .. سيدنا محمد هو أعظم الخلق وأعظم وأحسن إنسان وأحسن أخلاق في الدنيا دي
إبني: بس ممكن ييجي حد أحسن منه
ماما : يا حبيبي مش ممكن .. عارف ليه؟ لأن ربنا سبحانه وتعالى قال لنا كده في القرآن .. مش إنت مؤمن بالقرآن وعارف إن ده كلام ربنا واللا ليك رأي تاني؟>> ولسان حالي يقول ده أنا هأقطعك لو ليك رأي تاني
إبني: أيوة طبعا أنا عارف إن القرآن كلام ربنا لينا
ماما : عليك نور أهه بقى في القرآن ربنا قال لنا إن سيدنا محمد أخلاقه أحسن أخلاق ومفيش حد حييجي أخلاقه أحسن منه
إبني :: هممممم << لحظة تفكير ثم … بس برضه ممكن ييجي حد أحسن منه
ಠ_ಠماما : قوم من وشي الساعة دي
طبعا إتنرفزت من كلامه .. آل ييجي حد أحسن آل!!! إيه العيال دي
وبعديها قعدت أفكر إنهم ما يعرفوش عن سيدنا محمد كفاية .. يعني كله كلام كده من على الوش وقررت إني لازم أحكي ليهم السيرة بالتفصيل وبالدروس المستفادة من كل حكاية … وبعدين الفكرة إتركنت على الرف كالعادة
وبعد اللي حصل قلت لأ أنا كده هأضيع العيال فعلا .. أولا أنا كنت عايزاهم يتبعوا السنة في كل حاجة واحدة واحدة أعلمهم وأتعلم معاهم كل السنن.. بس إزاي وهم أساسا ما يعرفوش سيدنا محمد كويس
فقلت هأبدأ واحدة واحدة أعلمهم السنن وأحكي لهم وأحاول أحببهم في سيدنا المصطفى عليه الصلاة والسلام
البداية
قبل ما أحكي لهم عن حياة سيدنا محمد عليه السلام بدأت بحاجات بسيطة للتشويق والإثارة زي الأفلام كده .. علشان أثير فضولهم
أولا: الصبح بدري وهم بيفطروا وبعد ما يرجعوا من المدرسة كنت بأشغل أذكار الصباح والمساء للشيخ مشاري جزاه الله عنا خيرا
الأذكار بأشغلها على تليفزيون البيت من اليوتيوب بإستخدام الجهاز ده إسمه كروم كاست
فبدأوا يسألوني إيه القرآن ده؟ قلت لهم دي إسمها أذكار الصباح والمساء … طبعا سألوني يعني إيه ومن هنا نبدأ نفهمهم إن دي حاجات كان سيدنا محمد بيقولها الصبح وبالليل علشان تحفظنا وتحمينا من كل سوء وبنآخد عليها ثواب كبير جدا جدا… وطمعتهم في الثواب فبدأوا يقولوا عايزين نقولها
طبعا فيه كلام صعب عليهم شويتين لكن على الأقل لو ما قالوش بيسمعوا وممكن يطلعوا بحاجة .. لا حظوا أنا ما غصبتش عليهم يقولوا أبدا أنا بأشغلها وبأقول معاها وبس وهم بيقلدوني .. ميزة الشيخ مشاري وميزة اللينك ده بالذات إن الأذكار عاملة زي الأغنية وهم لما بيقولوا بيحاولوا يقلدوا الشيخ مشاري فيها ويلحنوها زي ما هو بيقولها بصوته العذب
ثانيا: شغلت لهم أغاني وأناشيد عن الرسول عليه الصلاة والسلام في البيت وفي العربية
والأغنية دي أكتر أغنية بتعجبهم وفيه أغاني كتير تانية حلوة جدا جدا وأكثرها من ماهر زين الحقيقة جزاه الله خيرا عنا
وبدأوا يسألوني مين المصطفى؟ يعني إيه طيبة-المدينة المنورة- وليه بيقول في الأغنية يا حبيب على الرسول عليه الصلاة والسلام؟ وإنهالت الأسئلة وبدأوا يحبوا الأغاني دي ويغنوها معايا كل مرة نركب العربية
حتى فيه طفل إبن صديقتي بأوصله ساعات مع إبني المدرسة بيقول لي يا طنط شغلى لنا أغنية الصلاة وبيغنيها مع إبني الصغير
قلت لهم كمان شفتوا الأغاني دي لما بنسمعها أو بنغنيها بنآخد ثواب فطبعا فتحوا عينيهم وبقهم من الإندهاش .. قلت لهم شفتوا أي دين بيديكم ثواب لما تغنوا!!! بس مش أي أغنية… يقولوا لي إزاي فطبعا شرحت لهم إن الأغاني اللي فيها الحب وقلة الأدب والرقص والبنات بتآخد من حسناتنا لغاية لما نبقى صفر والعياذ بالله إنما الأغاني دي بتدينا ثواب .. الجميل كمان في أغاني ماهر زين إن فيه منها كتير بالعربي والإنجليزي وبالتالي ممكن يغنوها ويفهموها كمان باللغتين
ثالثا : قناة القرآن الكريم من مكة
القناة ليها بث مباشر على الإنترنت من اليوتيوب ولو عملتوا بحث في جوجل هيطلع لكم كذا لينك تاني
أنا طبعا كنت بأشغلها قبل كده لكن مش بصورة يومية … لكن لما شغلتها لفتت إنتباههم وبدأوا يبصوا على الكعبة ويسألوني ليه بيلفوا كده؟ قلت لهم دي من مناسك الحج والعمرة
ويسألوا كتير .. إيه الحته المعدنية دي ؟ وإيه الحجر الأسود؟ و و و
كلها أسئلة للتمهيد لإنهم يسمعوا سيرة الحبيب عليه الصلاة والسلام … اللهم إرزقنا سجدة في بيتك الحرام وصلاة في روضة المصطفى عليه الصلاة والسلام
طيب كفاية كده عليكم لأني حسيت إني رغيت كتير .. إن شاء الله المرة اللي جاية هأبدأ معاكم الدرس الأول في السيرة
أنا مش هأقول لكم تقولوا إيه للأطفال كل واحد يقول بالطريقة المناسبة لأولاده لكن أنا هأحط لكم الخطوط العريضة والدروس المستفادة ولو فيه أنشطة هأحطها لكم
وأخيرا
بالنسبة للمراجع اللي أنا إستخدمتها هي كتب الشيخ محمود المصري عن السيرة هتلاقوا كتب للأطفال وكتاب للكبار إسمه سيرة الرسول كان والدي رحمة الله عليه أهداني هذا الكتاب وقال لي إقرأيه وعلمي أولادك .. الله يرحمك يا والدي ويجعل ما أقدمه في ميزان حسناتك إن شاء الله وجزى الله خيرا الشيخ محمود المصري
أيضا سلسلة حلقات على خطى الحبيب للأستاذ عمرو خالد موجودة هنـــا على اليوتيوب .. يعني حاولوا تعددوا المصادر علشان تتأكدوا من الروايات والأحداث وأنا مش هأحكي لهم غير عن الموثوق فيه من أحداث واللي تستطيع عقولهم إستعابه وهأحاول ربط الأحداث بالواقع وأخذ الدروس والعبر من سيرة الحبيب
رجاء خاص:: أتمنى تتابعوني وتقولوا لأصدقاءكم اللي عندهم أولاد واللي يحبوا يحكوا السيرة لأولادهم وجزاكم الله خيرا
أصل الصورة
um ghassan says
جزاك الله خير فعلا استفدت كثير من متابعتك
Amira says
الحمد لله إن فيه حد بيستفيد من الموضوع ده … تابعيني إن شاء الله
جزانا وإياكم حبيبتي