مرحب شهر الصوم :: خطة عملية لإستقبال الشهر الكريم – ١٣والأخيرة

وصلنا لآخر محطة في الإستعدادات أنا كنت ناوية أخليهم ١٥ محطة لكن للأسف الوقت مش مكفي وخلاص رمضان هيدق على الأبواب كمان كام يوم إن شاء الله وكل عام وأنتم بخير

النهاردة هيكون يوم الزينة … هنعمل زينة رمضان وفوانيس بالورق الملون ونعلقها في البيت … لو عندكم زينة كهربا أو  فوانيس كهربا علقوها في البيت أو البلكونة بتبقى جميلة جدا جدا وبتدي روح وإحساس تاني في البيت وللأولاد

أنا عندي عادة كل رمضان  بنكون هنا بأعملها وهي إني أغسل سجاجيد الصلاة في البيت كلها وإسدالات الصلاة وأعطرها بالمسك … صدقوني الواحد بيسجد عليها مش بيكون عايز يرفع راسه من السجدة من جمال الريحة … يمكن علشان أنا ريحة المسك بتفكرني بالسعودية وبأحس كأني في الحرم الله يوعدني وإياكم يزيارته عن قريب يا رب … لو تقدروا تعطروها وعندكم مسك كان بها مفيش يبقى إغسلوها بس وعطروها بأي ريحة حلوة بتحبوها

وأشوفكم بالمتابعة إن شاء الله