الأسبوع ده هأعمل محشي!!! تتصوروا محشي فعلا بقالي كتير جدا ما طبختش الطبخة العربية الأصيلة دي تعالوا معايا نشوف باقي المنيو
إتفضلوا معانا … منيـو الغذاء الأسبوعـي من ١٩ لـ ٢٥ مايـــو
الإثنين:محشي فلفل وكوسة وباذنجان + كفتة
الثلاثاء :فراخ بالفرن + ملوخية+ فاصوليا + أرز
الأربعاء : بواقي
الخميس : بواقي
الجمعـة : بيض وفول وجبنة وحاجات بتاعة الفطار دي
السبت : بيتزا
الأحد : بواقى الأيام السابقة
Shery says
محشي باذنجان ابيض متقوليش أني فيه هنا انا مبحبش
الكرنب بس جبته علشان اعمل اي محشي وخلاص هههه
انا بموت في محشي الباذنجان. المنيو بتاعك جميل بألف هنا
وشفا عليكم حبيبتي
Amira says
بصي يا بنتي أنا بقالي هنا حوالي ٧ سنين أهه ما شوفتش الباذنجان الأبيض غير مرة واحدة بس وكان في المحل العربي وسمعت إنه خير اللهم إجعله خير لما بينزل الستات العرب بيبلغوا بعض بسرعة يلحقوه قبل ما يخلص هههههه .. اللي بأعمله باذنجان أسود وخلاص اللي موجود هنعمل إيه
اروى says
الف هنا يارب عندكم باذنجان كويس فراخ الفرن بتعمليها ازاى والملوخية مجمدة ولا اية توعها استفسار باستخدم صلصة سايبة كده هى دى بدل الطماطم ولا احطها معاها فى الطبيخ اصل انا خاااايبة جدا بسبوستك روعة احلى من الشفات والله جزيت الجنة يارب
Amira says
إسود يا رورو إسود مش الأبيض … الأبيض ده ناااادر جدا نآكله في مصر وعليكي خير… الملوخية مجمدة بأشتري مونتانا بتوصل هنا المحل العربي … أنا كمان بأستخدم الصلصة اللي بتتباع في المحلات …إسمها عندنا
tomato sauce
فراخ الفرن أي تتبيلة بتحبيها أنا كل مرة بأعمل فراخ شكل مختلف مرة بالصويا صوص والعسل مرة عادية بالبصل والتوم والليمون والذى منه مرة بالمستردة والبصل وهكذا وفي صينية وعلى الفرن عدل … جربتي البسبوسة بجد…. عجبتك؟ فرحتيني يا شيخة إلهي يفرح قلبك دايما يا رب