كـــل عــام وأنتم بخير … شهر رمضان الفضيل يدق الأبواب .. فهنيئا لمن إغتنمه وبالحسنات ملأه
لكن نملأه إزاي بالحسنات وإحنا شهر رمضان تحول عندنا لشهر ولائم وعزومات ووقفة في المطبخ طول النهار … فيضيع أغلب النهار .. وييجي وقت الإفطار ونقف نحضر الإفطار وبعدها الشاي والحلويات والذي منه ويا دوب نلحق الصلاة وييجي وقت التراويح والستات هلكانة وتعبانة ومش قادرة تقف على رجليها
طبعا مش كلنا كده لكن فيه مننا بيكون زوجها ليه طلبات خاصة مثلا لازم كل يوم شوربة … لازم يفطر على عصير مش عارف إيه … لازم يآكل الشوربة معاها إيه وهكذا … وإحنا مش عايزين نزعل الأزواج وبنفس الوقت مش عايزين نضيع مننا هذا الوقت الثمين
وعلشان نوصل لكده وأساعدكم وأساعد نفسي تعالوا معايا نستعد لرمضان السنة دي ونخليه أحلى إن شاء الله … تعالوا نستعد كويس نفسيا وروحانيا ومطبخيا ومنزليا وكل حاجة …. هااه مين معايا؟
الموضوع ده مفيهوش كوبونات ولا عروض ولا خاص بأي دولة … الموضوع ده لينا كلنا نساعد بعض ونساعد نفسنا ولنا الأجر إن شاء الله
بإذن الله هنكون مع بعض نوضب ونرتب لهذا الشهر الفضيل نستعد علشان يدخل علينا وإحنا في أحسن حالة ومستعدين له من فترة .. من غير توتر ولا تعب ولا زهق من طلبات الزوج أو الأولاد أو المصاريف وخلافه
أتمنى الموضوع يعجبكم … وبالمناسبة دي أهديكم أغنية من أحب الأغاني لقلبي واللي بأسمعها من سنين الطفولة
اروى says
لو قلت لك انا بكيت ربنا يجزك الخير يارب معاك الله المستعان
Amira says
جزانا وإياكم أروى …. تصدقي بالله عارفة أغنية تم البدر بدري؟ بتضايقني قوي بتخليني عايزة أعيط كل رمضان … الواحد في الأول بيحس إنه تعبان في رمضان بس لما بيحس إنه هيخلص بيكون متضايق … فعلا ضيف عزيز وغالي