أنا عمري ما سافرت للسودان ولا حتى لأسوان في مصر !!!! لكن الحقيقة أنا تعرفت على ناس من السودان أثناء وجودنا في المملكة العربية السعودية وأنا صغيرة … ومن إحتكاكي بيهم أقدر أقول لكم إنهم شعب طيب جدا جدا وخلوق فعلا والسماحة في وجوههم ربنا يكرمهم ويفك كرب بلادهم يا رب
طبق اليوم هو أشبه بسلطة البابا غنوج لو تعرفوها لكن مختلفة لأن فيها طماطم وأيضا زبدة الفول السوداني اللي بتعطيها طعم متميز
مقاديرها سهلة ومتوفرة وتسمى بسلطة الأسود لأنها معمولة من البانجان الرومي الأسود .. مع بعض الإضافات زي الثوم والليمون والبصل الأخضر وزبدة الفول السوداني … جميلة فعلا وأتمنى تعجبكم
جميله تسلم ايديك متنسيش تحطلنا المنيو بتاع الأسبوع
معلش هسالك سؤال عندي عزومه وعايزه اعمل عرق لحمه بارده انا مش
عارفه أجيب الدوبار اللي بيتربط بيه منين لو تعرفي
باريت تقوليلي علشان هنزل في الويك اند اشتري طلبات
العزومه ولو عندك افكار حلوه لأكل هما جماعه مصرين علي
أجانب وبيحبوا الأكل الصحي قوليلي افكار غشيشيني.
هههههههههه وقوليلي صنف حلويات برضو بتعبك معايا حبيبتي
It is called “Butcher’s twine ”
وممكن تعملي تركي في الفرن بس الأجانب يعرفوا التركي .. يعني إعملي الحاجات المصري اللي بنفتقدها .. ممكن رز بالخلطة وسلطات كتير نوعي في السلطات مع المشويات بتبقى حلوة … بابا غنوج وطحينة أو حمص وطبعا سلطة خضرا وممكن سلطة فاصوليا بيضا أو السلطة اللي بيبقى فيها سكر بتاعة البصل الأحمر والفاصوليا الخضرا .. سلطة بطاكس بالثوم والكزبرة .. الطماطم اللي بالتوم .. ممكن أطباق جانبية جلاش حادق تحشيه حشوة البيتزا يعني جبنة وزيتون وفلفل أو باللحمة المفرومة الحلويات بقى إعملي ممكن سلطة فواكة حلوة علشان الناس اللي بيحبوا الصحي .. وممكن بقى بسبوسة على جنب غير صحية 
ومن التراث الشعبي المصري … ربنا معاكي ويوفقك وإن شاء الله عزومة ولمة حلوة وبالهنا والشفا
تلاقيه في أي ستور في المكان بتاع الهاردويير … هتلاقيه في ولمارت هناك وممكن كمان تلاقيه في الحنة اللي بيبيعوا فيها الفويل والكلينج فيلم والزيب لوك والحاجات دي … لو ما لقيتيهوش جربي روحي عند الجزار هناك وإسأليه إذا كان ممكن تشتري منهم قطعة
أنصحك تعملي صواني ومشويات بلاش مقلي وكده وإلا هتتهدي وتتعبي وتفضلي واقفة فى المطبخ لآخر لحظة … المشويات حلوة تبلي فراخ ولحمة أو كفتة مثلا من قبلها وحطيها بالفريزر وإرميها على جوزك يشويها
ميرسي حبيبتي اوي بجد بكره هنزل أدور علي الدوبار . واديتني افكار بصراحه
١٠٠ ١٠٠
منتظراكي تقولي لنا المنيو بتاعت العزومة إن شاء الله
ازيك يا جميله عملت عزومه تمام معملتش لحمه بارده علشان ملقتش الدوبار قالولي في الوال مارت بيجي وقت
الأعياد بصي بقا يا ستي عملت ورق عنب ًوصنيه خرشوف باللحمة المفروم
وعملت رز وملوخيه وعملت بيكاتا بالمشروم وعملت كانيلوني
وعملت جزء من الفراخ بألفيجيتار وعملت جزء منها زي الفاهيتا
وعملت سلطه خضرا وعملت سلاطه زبادي والحلو كان آيس كريم وسلطه
فواكه الحمدالله عدت العزومه كويس بس انا مكسره من
الواقفه والتعب
ما شاء الله لا قوة إلا بالله
عزومة حلوة وجميلة يا ريتني كنت جمبك كنت طبيت عليكي ههههه… حد يعمل ورق عنب في عزومة!!!! ومش عايزة تتكسري… ده إنت تتفشفشي كمان ههههه بألف هنا وشفا بس بصراحة عزومة جميلة جدا جدا وشيك تسلم إيديكي يا قمر وشكرا علشان شاركتينا المنيو بتاعتك
انتي تنوري بجد في أي وقت
الورق عنب علقه فعلا متفكرنيش بوجع الضهر آه يا ضهري
هههههههههههه
ابعتلك الصوره ازاي بتاعه العزومه اصلي صورت الأطباق
ههههههههههههههههه
الله يكرمك ويعزك يا شيري .. بصراحة أيوة علقة محترمة إنتي فدائية بس ده يدل على كرمك على فكرة
ممكن تبعتيهم على الإيميل؟amira@moghtareba.com