المارشميللو كريم … يعشقه أطفالي بشكل رهيب ويغنيهم عن أكل المارشميللو العادي لأنه مافيهوش جيلاتين .. ساعات بيكون نفسهم فيه ومش بيكون متواجد بالبيت وعايز له نزوله وكوبون بقى وحركات
فيه كذا طريقة لعمل المارشميللو كريم أغلبها لازم نسويه على النار ويستحسن يكون معانا ترمومتر بتاع الحلويات … شغلانة يعني شوية .. وبما إني دايما أحاول في أعمل الحاجات بأسهل الطرق قدر المستطاع لقيت طريقة سهلة قوي قوي فيها مشكلة واحدة بس وهي إنها تحتوي على بياض البيض بدون تسوية نيئ يعني .. بالنسبة لنا دي مش مشكلة .. أولا ما عندناش حد عنده حساسية ثانيا مش بيقعد عندنا كتير … بيتشلفط عليه على طول
الطريقة دي تحتوي على البيض النيئ ولهذا لا تقدم للرضع الصغار أو كبار السن أو اللى عندهم حساسية … نقدر نحفظها بالثلاجة لمدة لا تتجاوز أسبوعين – لو قعدت أصلا – ونقدر برضه نحفظها بالفريزر لمدة شهر
::هنحتاج
١ بياض بيضة بحرارة الغرفــة
٤/٣ كوب كورن سيرب فاتح اللون
٤/٣ كوب سكر بودرة منخول جيدا
٢ وربع معلقة صغيرة فانيليا سائلة
ربع معلقة صغيرة ملح
الطــــريقــــــة
على سرعة عالية نقوم بخفق البيض مع الملح مع الكورن سيرب حتى يتضاعف الحجم حوالي ٥-٦ دقائق متواصلة
نخفف السرعة ونبدأ نضيف السكر مع الخفق المستمر ثم نضيف الفانيليا
نستمر بالخفق حوالي ٥ دقائق أخرى حتى تتجانس كل المكونات … وبس خلاص
نحفظه فى علبة محكمة الغلق فى التلاجة زي ما قلنا لمدة أسبوعين أو شهر بالفريزر
بس هتتبقى مشكلة واحدة عندي أنا
الغسيــــل واللحوســــة … أتمنى تجربوه
الجميل فيه إنكم ممكن تضيفوا نكهات أخرى محببة للأطفال زي الفراولة .. المانجو .. الشيكولاتة وهكذا
ام يوسف اروى says
جمييله اوووى ربنا يفتح عليك دائماً بالأفكار الحلوة والسهلة بت نفعنا انا اووى بصراحه مطبخي حلو وسهل بعمل منه حاجات كتير ما شاء الله كلها نجاحه ربنا يسعدك ويجعله فى ميزان حسنلتك
Amira says
الحمد لله إنها عجبتك .. أتمنى تجربيها وتقولي لي