مطبخ مغتربة :: الفطير المشلتت

يم يم الفطير المشلتت من أحلى وأجمل ما تشتهر بيه فلاحات مصر .. ودلوقتى بيتباع فى أى محل مخبوزات فى مصر .. بس طبعا لا يعلى على الفطير الفلاحي اللى غرقان بالسمن البلدي ههه … اليوم إن شاء الله فى محاولة ساذجة بنحاول نعمل شبهه … بس ما تخافوش بيطلع حلو بس إنتو كتروا السمن والزبدة ولا تسألنى عن الكوليسترول

الفطير ده ممكن نآكله كده مع الجبن الأبيض والعسل الأسود والعسل الأبيض وممكن نحشيه من جوه جبن رومى أو لحم مفروم أو سجق وخلافه ويبقى فطير محشى .. اليوم هأقدم لكم الفطير المشلتت السادة يعني مش المحشي

بسم الله نبدأ … هنحتاج الآتى

٤ كوب دقيق متعدد الإستعمالات *

٢ كوب ماء عادى من الحنفية- قد يزيد أو ينقص قليلا*

تقريبا ١ كوب زبدة سايحة*

رشة ملح*

::الطريــــــقة

نخلط الدقيق والملح جيدا معا ثم نضيف أول كوب ماء ونعجن جيدا ثم نضيف الكوب الآخر شوية شوية ونستمر بالعجن فترة طويلة حتى تتكون عجينة ملساء طرية تقدروا تشدوها باليد بدون أن تتقطع زى اللى فى الصورة كده

فى طبق عميق نقسم العجينة لـ ٦ كور وندهن الطبق بالزيت ونمسح على الكور بالزيت ونضعها فى الطبق لترتاح … أنا بأحب أغمر الكور فى زيت زيتون علشان العجينة لا تفقد مرونتها … طبعا الزيت ده مش بيترمي

نترك العجينة ترتاح حوالى ١٥ دقيقة وفى نفس الوقت نسخن الفرن على أعلى درجة ممكنة .. عندي عملته على ٥٥٠ فهرنهايت

على سطح مرشوش بالزبدة أو السمن السايح نفرد أول كورة رقيق جدا جدا لدرجة إنكم ممكن تشوفوا سطح الترابيزة من خلالها .. ثم نمسحها جيدا وبسخاء بالزبدة السايحة

نطبق العجينة بأى شكل – فى الغالب مستديرة – ونمشح بالزبدة السطح وإحنا بنطبقها ثم نتركها جانبا ونبدأ فى فرد الكورة الثانية

نفرد الكرة الثانية كما فعلنا مع الأولى بالظبط وندهنها بالزبدة ثم نضع اللى فردناها مسبقا فى النص والناحية المقفولة لأسفل وندهن زبدة ونطبق الثانية على الأولى مع رش زبدة بشكل مستمر

نفرد الكرة الثالثة بنفس الطريقة ونضع الإتنين اللى قبلها جواها ونطبق ونرش الزبدة  … ثم نضعها فى صينية الخبز وندخلها فرن حامي تقريبا ١٥ دقيقة .. ونقلبها فى النص على الناحية التانية .. نقتح الشواية عليها من فوق علشان تتحمر لو عايزين .. نطلعها من الفرن ونضع عليها حتة زبدة صغنوووونة .. معلش لزوم الكوليسترول ونغطيها كويس علشان ما تنشفش من فوق

العجينة السابقة تعمل لنا ٢ فطيرة كل واحدة تتكون من ٣ كور عجين

ملاحظين طبعا الطبقات من جوة الفطيرة … رووووعة وجميلة فعلا

ممكن نرشها بالسكر البودرة .. وفى مصر ممكن بيحشوها كسترد أو على الوجه بالمكسرات

أو تؤكل سادة بالعسل والجبنة ويا سلام لو عندكم مش تبقى جميلة … وبالهنا والشفا