من فترة كنت إتكعبلت فى فيديو كده على اليوتيوب هنــــا وخليته على جنب لوقت اللزوم للتجربة ونشوف الكلام ده بجد واللا أى كلام
المهم الفيديو ده بيورينا إزاي نشيل بقع الموكيت بسهولة ويسر .. فعلا شئ ما يتصدقش غير لما تجربوه بنفسكم
ودى صورة قبل وبعد للتأكيد .. إعذروني على إختلاف الإضاءة كنت مصورة كل حاجة وبالخطوات والمراحل كمان لكن الصور باظت على الكارد الحمد لله ودى الصور اللى عرفت أنقذها
طبعا كلنا بنقع فى نفس المشكلة لما بنييجي ننقل من بيت لبيت تانى … بنستعوض ربنا فى التأمين والسبب الرئيسي عادة بيكون الموكيت .. لكن الحل ده يخلينا يرجع لنا التأمين إن شاء الله
البقع دى فى الموكيت ما عنديش أى فكرة وصلت إزاي … ولا حتى بقالها قد إيه هناك .. توكلت على الله وقلت أجرب الحل ده يعني هي موته واللا أكتر زى ما بتقول فى مصر
اللى هنحتاجه
علبة سبراي فاضية
١ كوب أمونيا – يستحسن بالليمون لتخفيف الرائحة لكن أى نوع بيقوم بالمهمة
مكواة الملابس – اللي مالهاش أى لازمة فى بيتنا أخيييرا لقيت لها فايدة هههه
فوطة قطنية بيضاء أو أى شئ أبيض ويكون قطن
١ كوب ماء ساااااااااخن
: الطريقـــــــة
أولا نشوف مكان مبقع فى الموكيت زي اللى عندنا كده هنا
ثانيـــا :: نخلط الأمونيا بالماء الساخن ونحطهم فى الزجاجة ونخلطهم جيدا
ثالثــا ::نرش المحلول على البقع كويس ونكون مسخنين المكواة- أنا سخنتها على أعلى درجة وبالبخار
رابعــا :: نفرش الفوطة فوق البقع وندوس عليها بالمكواة .. وبس خلاص هتلاقوا البقع طبعت فى الفوطة
لو لسه ما طلعتش البقع بالكامل – كحال البقع بتاعتي- إعملوها مرتين تلاتة تانى خليكوا وراها لغاية لما تطلع
والنتيجـــة … موكيت نظيف ورائع
::ملحوظـــات مهمة جدا جدا جدا
رائحة الأمونيا صعبة جدا*
يعني لو عندكم حساسية بلاش إنتو اللى تقوموا بالموضوع ده ويا ريت تفتحوا الشباك لأن البخار بتاع المكواة بيكون ريحته فعلا متعبة قوى قوى
لازم فوطة بيضاء؟*
أيوة لازم حاجة قطن بيضا من اللى فهمته لما عملت بحث مكثف فى جوجل عن الموشوع ده إن الأبيض علشان ما يطلعش لون فى الموكيت وقطن علشان يمتص البقع اللى فى الموكيت
هل ينفع مع الموكيت الأحمر والأزرق وخلافه من الألوان؟*
أيوة بينفع ومش بيبوظ لون الموكيت .. الموضوع نفع مع ناس كتير عندها موكيت ملون ألوان غامقة مش شرط بيج .. وعلى العموم دايما يستحسن تجربوا الأول فى مكان مستخبي يعني ورا الباب مثلا أو كده للتأكد
هل ينفع مع كل أنواع البقع؟*
فى الغالب إن شاء الله أيوة .. أنا قريت ناس إستعملوه مع بقع من القطط والكلاب وقيئ الأطفال وشحوم مختلفة وناس حربته كمان على الهاي ترافيك ونفع وفيه ناس بتقول مش بتطلع على طول بيعملوا البقعة الأول بصابون غسيل المواعين والخل وبعدين يعملوها بالأمونيا .. عموما لو فيه بقعة صلصة مثلا نشيلها الأول ويستحسن نرش عليها بودرة تلك – بتاعة الأطفال – أو بودرة طباشير ونسيبها شوية ونشفطها بالمكنسة وبعديها نعمل بالأمونيا
تنظيف موكيت بالمدينة المنورة says
طريقة راااائعة جداً وبالطبع البخار يساعد في ازالة البقع جيداً