مطبخ مغتربـة :: المحشى المصري والفلسطيني والمغربى و و و

المحشي

والمحشي

والمحشي

المحشى طبق معروف فى كل دولنا العربية وأعتقد محبوب من الكل كبار وصغار … بالنسبة لى بأعتبره من الوصفات الإقتصادية لأن ممكن نضيف للأرز شوية لحمة مفرومة وخلاص يبقى عندنا وجبة متكاملة …. المحشى بكل أنواعه كان بالنسبة لى أيام ما كنت بأشتغل من خامس وسادس وسابع المستحيلات إنى أعمله أو أضيع فيه وقتى ولما كنا نشتاق له كان عندنا والدتى وحماتى ربنا يبارك فى عمرهم…  شوية دلع ويعملوا لنا اللى إحنا عايزينه

الوصفة هنا هتكون مفصلة مع طريقة لف محشى ورق العنب إن شاء الله بناء على رغبة العديد منكم  فمعلش بالنسبة للمحترفين هتكون مملة شويتين وبالهنا والشفا عليكم

لو عايزين باقى الوصفة كملوا معايا وإضغطوا المزيد

هنحتاج

للخلطة

٤/١ كوب زيت زيتون

بصلة كبيرة مفرومة ناعم

٢ كوب أرز مصري

١ كوب كزبرة خضرا مقطعة + ١ كوب بقدونس مقطع

٢/١ كوب شبت مقطع

علبة ١٦ أونص صوص طماطم

٢ معلقة كبيرة معجون طماطم – إختياري

١ معلقة كبيرة نعناع ناشف – إختياري

ملح وفلفل

على النار نضع الزيت فى حلة ونضيف البصل ولما لونه يبقى ذهبي نضيف صوص الطماطم مع معجون الطماطم ونقلب جيدا حتى يذوب معجون الطماطم ونضيف الملح والفلفل والنعناع الناشف ونتركه حتى يغلى ثم نضيف الأرز – يكون مغسول طبعا – ونهدى عليه النار لمدة  ٥-١٠ دقائق ثم نطفى النار ونضيف البقدونس والكزبرة والشبت ونخلطهم جيدا ونترك الخليط حتى يبرد قليلا

عامة إحنا ممكن نحشى أى نوع خضار …. فلفل رومى .. فلفل الأناهايم …طماطم .. كوسة .. باذنجان أسود وأبيض .. ورق عنب وخلافه يعني خاينا نبقى مبدعين .. الفلفل الرومي اللى هنا بيكون كبير قوى وجلدته تخينه مش زى اللى فى بلادنا وأحسن أوبشن إننا نحشى الفلفل الأناهايم ونختار نوع يكون مايلد يعني مش مشطشط قوى .. وممكن نقسمه نصفين لو طويل قوى ونحشي كل قسم

وكمان ممكن نحشي الفلفل الهالوبينو

وفى حلة نضع بعض أوراق البقدونس أو الأعواد أو بصل مقطع حلقات فى قعر الحلة ونرص المحشى فى الحلة كويس

 بالنسبة لطريقة لف ورق العنب علشان ما يفكش مننا زى الصورة كده

الأول نضع الورقة بحيث الوجه الخشن لأعلى ونضع فيها معلقتين أرز تقريبا ونلفها كما هو موضح بالصورة .. أتمنى يكون واضح

ونرصهم جنب بعض كويس فى الحلة بتاعتنا

نضيف تقريبا ٢ كوب شوربة أو ماء اللى تحبوه وممكن ندوب فيها معلقة معجون طماطم .. ونضعها على النار حتى الغليان ثم نهدي النار خالص ونتركها حتى تمام السواء .. تقريبا ٤٠ دقيقة لكن فى ورق العنب بتكون أطول شويتين

وتمتعوا بأحلى وأجمل محشى

وبالهنا والشفا

بعض الملحوظات

يمكن إضافة اللحم المفروم لخليط الأرز

ورق العنب هنا بيكون تخين وناشف شوية .. إتعلمت من صديقة لى إضافة سمن أو زبد أو حتى زيت سااخن على وش ورق العنب وهو بيستوى