مقولة حلوة لكن .. هنعمل إيه مضطرين علشان نعيش فى العالم ده إننا نجيب فلوس على العموم تعالوا نشوف طريقة جديدة لبيع كراكيب البيت وهى البيع على الفيسبوك
كراكيب البيت فعلا هى أكتر حاجة مربحة … أولا بننضف البيت وثانيا بنعمل ريسايكل وثالثا بنكسب فلوس … آه مش كتير لكن أحين من ما يتركنوا فى البيت .. قبل كده شفنا طريق بيع كراكيب البيت ومنها كريجز ليست أو فى الكونساينر أو الجراج سيل
ودلوقتى فيه طريقة جديدة وهى مجموعات الفيسبوك
وأخيرا ظهرت فايدة كويسة للفيسبوك على الأقل حاليا بدل الشائعات اللى شغالة عليه نتيجة المرحلة الحرجة اللى بتعدى بيها أوطاننا من ربيع وخريف عربي وخلافه
طبعا تقدروا تحطوا اللى عايزين تبيعوه لأصدقاءكم والأهل على الوول بتاعتكم لكن كمان فيه مجموعات للبيع فى كل منطقة كل واحد بيحط الحاجة اللى عايز يبيعها هناك .. كل اللى عليكم إنكم تعملوا بحث عن المجموعة الموجودة فى المنطقة بتاعتكم … مثلا لو إنتم ساكنين فى منطقة بروكلين بنيويورك كل اللى عليكم إنكم فى البحث تكتبوا
Brooklyn sale
هيظهر لكم كل المجموعات الخاصة بالبيع فى منطقة بروكلين .. المدن الكبيرة هتلاقوا مجموعة لبيع الملابس الرجالى ومجموعة لبيع مثلا الأدوات الرياضية وهكذا .. إعملوا طلب للإشتراك فى المجموعة اللى عايزينها
لو ما لقيتوش مجموعة إعملوا إنتم مجموعة جديدة وهتلاقوا ناس مع الوقت ينضموا ليكم
بعض الملحوظات المهمة
المعلومات الخاصة
أرجوكم أرجوكم أرجوكم … ما تكتبوش معلومات خاصة عنكم فى الجروب على المشاع .. لا نمرة تليفون ولا عنوان ولا أى معلومة ممكن تستغل بشكل أو بآخر .. المجانين كتير وربنا يحفظنا جميعا ..ولو صفقة فشلت وكان فيه قلة وق من الطرف الآخر تجاهلوا الموضوع كله وما تردوش ولا تتعصبوا على حد ولا تستخدموا ألفاظ .. إرتفعوا بمستواكم عن الصغائر دى
خدوا صور كتير للشئ اللى عايزين تبيعوه
وإختاروا صورة واحدة للعرض على الجروب وإكتبوا إن عندكم صور تانية إعرضوا تبعتوها بالميل للى حابب يعرف أكتر ويشوف صور أكتر وأى تفاصيل تحبوا تضيفوها إعرضوا إنكم تبعتوها بالميل أو رسالة خاصة للشخص
المقابلة فى مكان عام
زى ما قلنا الإحتياط واجب … المقابلة تكون فى أى مكان عام زى كريجز ليست بالظبط .. ماكدونالدز أو المكتبة العامة .. بارك … وهكذا
Leave a Reply