خطوات فى إدارة الوقت – ٤

photo Credit

المقولة دى بأحس إنها صحيحة ١٠٠٪ حقيقي .. اليوم اللى بأضيع منه فترة كبيرة قدام التليفزيون أو على الإنترنت هائمة بدون أهداف محددة بأحس فعلا إنه ضاع والدنيا بتتكربس وألاقى نفسى ما عملتش أى حاجة لأن جزء كبير من اليوم ضاع فى ولا حاجة .. علشان كده لازم نآخد بالنا كويس إحنا بنعمل إيه فى يومنا وما نشتكيش وخلاص وااما نشتكى كتير لازم نحس إن المشكلة فينا إحنا مش فى الوقت .. وما ننساش إن نبينا الكريم عليه الصلاة والسلام قال لنا ” لا تزولا قدما عبد يوم القيامة حتى يسأل عن عمره فيما أفنا ….لنهاية الجديث” فلينظر كل منا فيما يفني عمره .. وإن شاء الله يكون فيما لا يغضب الله

 

النهاردة هأكلمكم عن تخصيص وقت لكل مهمة أو مسئولية يومية .. بمعنى مثلا عايزة أقرأ قرآن مش من المعقول إنى أقضى كل يومي أقرا قرآن وأتجاهل مسئولياتى تجاه بيتي وأولادى وهكذا … أو أقضى طول يومي فى المطبخ أطبخ وأخبز ما لذ وطاب وأنسى نفسى وصحتى وعلاقتى بربى وخلافه يعني كله بالمعقول بيكون كويس وطبعا المعقول ده بيختلف من شخص لآخر ومن فترة زمنية لأخرى زى ما قلت لكم سابقا .. وعلشان أساعدكم تحددوا وقتكم هأعرض لكم الطريقة اللى بأقسم بها نشاطاتى ومهماتى اليومية لمجرد إنها تكون مثال لكن طبعا دى مش القسمة المثالية للوقت ولا حاجة ده فقط مثال للتوضيح

 

كمان عايزة أوضح لكم إن التقسيمة دى ما جاتش من أول مرة يعني قعدت أمسح وأكتب وأقص وألزق وأشيل من هنا ومن هنا لغاية لما ظبطت معايا ٢٤ ساعة يومية .. يعني تجيبوا كده ورقة وقلم وتعملوا حسابكم عبى ٢٠ دقيقة تقريبا لغاية لما تظبط معاكم إن شاء الله

 

تعالوا بقى أقول لكم على التقسيمة بتاعتى

 

٨ ساعات نوم

٣٠ دقيقة قراءة قرآن

٣٠ دقيقة ممارسة تمارين رياضية

٣ مذاكرة ساعات مع أولادى – بواقع تقريبا ساعة لكل طفل

٢ ساعة أعمال منزلية – طبيخ وتنضيف وخلافه

١ ساعة مع زوجى كلام ورغى

١ ساعة تقريبا لتناول الوجبات على مدار اليوم

٣٠ دقيقة مكالمة للأهل فى مصر والإطمئنان عليهم

٢ ونصف ساعة وقت مستقطع

٥ ساعات للبلوج ومتابعة بلوجات وقراءة إيميل وخلافه من أعمال إلكترونية ويدخل فيها ولو ١٠ دقائق قراءة فى أى كتاب

 

كده بقوا ٢٤ ساعة بالتمام والكمال  … طبعا الوقت مش بيكون بالدقيقة لكن دى حاجة تقديرية إحنا مش روبوتات

 

ملاحظات خدوا بالكم منها لما ترتبوا وقتكم

من الضرورى جدا جدا أخذ كفايتكم من النوم *

فالإستيقاظ بدون أخذ قسط وافر من الراحة ممكن يقلب علينا اليوم كله ويبظه لأنه هيصيبنا بالصداع والشعور بالإرهاق طول اليوم وعدم المقدرة أو التركيز فى أى عمل

طبعا كل واحد أقدر على معرفة عدد ساعات النوم الكافية له والمناسبة لظروفه .. أنا مثلا لو نمت ٦ -٧ ساعات كفاية جدا لكن المشكلة إنى مش بأنام نوم متواصل نتيجة لأن عندى أطفال .. والأطفال ممكن يصحوا من النوم أكثر من مرة بالليل اللى بيكون تعبان أو بيعيط أو خايف وهكذا يعني تعددت الأسباب والصحيان واحد وعلى هذا أعطيت لنفسى ٨ ساعات نوم لأنهم بالتأكيد غير متواصلين

 

Meditation دعوة للتأمل *

من نصائح د./ إبراهيم الفقى رحمة الله عليه هو أخذ ولو دقيقة كل يوم تغلق فيها عينك وتتأمل فى اللاشئ !!! آه والله زي ما بأقول لكم كده .. إقفلوا عينيكم دقيقة واحدة فقط وما تفكروش فى أى شئ .. كأننا بنعمل ريسيت للبطارية بتاعتنا علشان نعرف نعيد الشحن .. فيا ريت تعملوا حسابكم على الوقت ده ويستحسن والأطفال مش صاحيين وإلا مش هيسيبوكوا فى حالكم

 

لازم تعملوا وقت مستقطع فى يومكم *

يعني إيه وقت مستقطع … يعني وقت إحتياطى لأننا مش روبوت وأكيد هيظهر لنا حاجات فى يومنا غير متوقعة فلازم نعمل الوقت ده إحتياطى .. طفل لا قدر الله مريض .. مشوار مالهوش لازمة .. تليفون غير متوقع وهكذا فبدل ما نصاب بالإحباط والدربكة فى يومنا يبقى لو حصلنا حاجة غير متوقعة عارفين إن عندنا وقت سايبينه إحتياطى وميجيلناش إحباط

 

 

أتمنى إنكم تقدروا ترتبوا يومكم وتوصلوا لحل فى كمية الحاجات المهمة اللى عايزين تعملواها وتضغطوها فى الـ ٢٤ ساعة .. وربنا يبارك لنا فى أوقاتنا ويجعلها فيما يرضيه تعالى علينا إن شاء الله