يعاني أحد أطفالى من العصبية المفرطة على سنه !!! أوقات كتير أبص له فى نوبة العصبية وأسأل نفسي إيه اللى منرفزه كده؟ أما لما يكبر ويواجه مشاكل الحياة المتعددة هيعمل إيه .. لما يكبر ويواجه مشاكل مع رئيسه فى العمل أو مشاكل مع زوجته هل مع أول خلاف هيطلقها!!!! وبعدين
قرأت كتير فى عصبية الأطفال ومحاولة إحتواءها ولازلنا نجرب ونفشل ونجرب وننجح وهكذا العديد والعديد من التجارب … ولكن لا زالت المشكلة قائمة .. كل أما يتعصب أقول له إهدا وأحاول آخده فى حضنى وأهديه قبل ما ينفعل
مرة قريت الكلمة دى ” طفلك يتعلم من أفعالك أكثر من أقوالك” فبدأت ألاحظ نفسي وتصرفاتى فى أكثر من موقف .. وجدت إنى بأنفعل وأتعصب زى إبنى بالظبط !!! على حاجات ما تستاهلش فعلا
والغريبة إن هو نفس الطفل ده اللى بأنفعل عليه أكثر من إخواته زى ما أكون بكده قصدى أرسخ فى عقله مفهوم العصبية .. مش عارفة ليه .. مع إنه بيصعب على جدا من كتر ما هو مش عارف يتحكم فى نفسه .. يمكن علشان الحاجات اللى بيعملها بتخوفنى لا يفضل سلوكه كده وبأحاول بسرعة أصلح قبل فوات الأوان
إمبارح دلق طبق الغدا بتاعه كله على الأرض بدون سبب ضرب إيده فى الطبق غصب عنه راح الطبق كله مدلوق على الأرض .. وبدأت أنفعل وأقول كلام لا يجوز ولوم وعتاب و و وبعدين وقفت وقطعت كلامى وأخدت نفس عميق وحاولت أهدا شوية .. واقلل من إنفعالى على حاجة فعلا ما تستاهلش .. والحقيقة لولا زوجى كان له عامل كبير فى إنى أهدا كان زمان الولد بيقول على شرشبيل بتاع السنافر
آه طبعا كنا آخر النهار وكنت تعبانة ومرهقة وما صدقت أخلص بس برضه ما يشفعش إنى الكلام ينطلق منى بدون حساب مع تعمد لجرح مشاعره ومضايقته .. ساعتها فعلا حسيت إنى بأعلمه العصبية وإن العصبية سبب لجرح الآخرين وإيذاء مشاعرهم .. وإننا ممكن نجرح مشاعر الناس ونرجع نعتذر وخلاص يا دار ما دخلك شر
لأ … لازم يعرف إن الكلمة اللى بتطلع ما بتدخلش تانى .. وإن الكلام ممكن يوجع أكتر من الضرب وإن التحكم فى نفسنا وقت العصبية والغضب شئ مهم جدا وإلا هنخسر كل اللى حوالينا
فكرت فى إبنى ٢٠ سنة من دلوقتى إن شاء الله يا ترى عايزاه يفتكر ماما إزاى ؟ واحدة عصبية بتزعق وتشخط على الفاضى والمليان زى ما بنقول واللا ماما متسامحة وبتآخده واحدة واحدة لغاية لما يبقى شاب جميل يتخلق بأخلاق حسنة إن شاء الله
Leave a Reply