أخطاء شائعة عند إستخدام الكوبونات

photo credit

إستخدام الكوبونات من أهم وأسهل الوسائل للتوفير بالذات فى أمريكا وأحيانا كندا .. وإستخدام الكوبونات أصبح من الأمور الشائعة جدا جدا من وقت الإنهيار الإقتصادى لأن بيوت كتير إتأثرت وناس كتير فقدت وظيفتها وأيضا ناس كتير تم تخفيض مرتباتها بشكل أو بآخر

 

لكن إستخدام الكوبونات بالذات فى الأول ممكن يغمرنا بشكل لا يوصف وممكن يصبح عادة أو إدمان ونلاقى نفسنا بندفع أكتر مش أقل!!! نتيجة لبعض الأخطاء اللى بنقع فيها غصب عننا.. هأقول لكم على بعض الأخطاء اللى إرتكبتها وبعضها لازلت بأقع فيها علشان أحذركم وأتمنى إنكم ما تقعوش فيها إنتو كمان

 

أولا :: الجرى وراء كل وأى عرض

وده خطأ شااائع لدرجة لا توصف وإلى الآن لسه بأقع فيه .. إيه الفايدة من إنى أشترى سيريال بارن بالزبيب لمجرد إنه بـ ٦٠ سنت مثلا مع إن مفيش حد عندى بيآكل منه أو حتى بيحبه ومفيش عندى خطة مثلا إنه أهديه لشخص أو أتبرع بيه .. لأ ده هيبقى مصيره الزبالة حتى ولو بـ ٥ سنت .. الحل يبقى لما تشوفوا ديل حلو إسألوا نفسكم الأول هل يا ترى ده من الحاجات اللى إحنا بنستخدمها فى بيتنا؟ طيب لو لأ هل هو حلو لصديق أو صديقة بتحب المنتج ده؟ طيب لو لأ هل عندى حد ممكن أتبرع بالمنتج ده ليه قريبا واللا لا.. لا الإجابات كلها لأ يبقى نغمض عينينا عن الديل ده ونعرف إنه مش لينا

 

ثانيا ::ما نبقاش منظمين الكوبونات كويس

لما نروح نشترى وبالذات لو معانا أولاد صغيرين ما نبقاش منظمين الكوبونات كويس ونقف قدام الكاشير وننسى ونتلخبط ونضيع علينا الديلز .. وما نبقاش مصحصحين .. يعني فى أوقات كتير لما بيكون فيه عرض فى تارجت بنآخد عليه الخمسة دولار جيفت كارد مش بيطلع فى ماكينة الكاشير وحصلت لى أكتر من مرة وأنسى وأمشى وخلاص كده ضاع على الجيفت كارد مين بقا يروح تانى لخدمة العملاء ويوريهم الريسيت يعني هتبقى شغلانة .. فلازم نآخد بالنا كويس وننظم الكوبونات بالذات فى المحلات اللى إحنا عارفينها كويس مثلا فى تارجت بأكون عارفة البقالة هنا والصيدلية هنا وأدوات التنضيف هنا والشامبوهات هنا فبأحط كل مجموعة كوبونات مع بعض بحيث إنى أدخل مثلا منطقة البقالة وأنا عارفة هأمشى إزاى الأول عرض السيريال وبعدها مثلا هألاقى المكرونة يبقى أرتب الكوبونات على هذا الأساس وقبل ما أروح الكاشير أقف على جنب وأشوف الكوبونات والمنتجات اللى معايا وأراجعها كويس وأعرف إذا كنت هآخد مثلا جيفت كارد أو آرآر لو فى ولجرينز وكده

 

ثالثا :: ننسى نبعت الريبيت اللى بالبريد

الموضوع ده للأسف حصل لى أكتر من مرة قبل كده .. الميل إن ريبيت بتعملوا الشركات بالذات على المنتجات الجديدة علشان الناس تجربه وفى الغالب بيرجع لنا تمن المنتج كله من غير الضرايب طبعا .. الفكرة إنه بيكون ليه شروط يعني لازم الشراء يكون فى فترة محددة واننا نبعت الريبيت برضه ليه فترة محددة .. أحيانا كتير أشترى المنتج وأجهز الريبيت وطبعا أنسى أبعته وأكتشف بعد ما الوقت يعدي ودي حاجة بتضايق جدا جدا علشان كده لما نشترى حاجة بالريبيت لازم نفكر نفسنا بأى طريقة إننا نبعت الريبيت… مثلا نعمل حاجة على الموبايل أو نكتب فى مكان واضح بالبيت أو نخلى حد تانى مصحصح أكتر مننا يبعت لنا إيميل يعني نحاول بأى طريقة وخلاص

 

 

 

رابعا :: الشوبينج فى ١٠ ستورز علشان نآخد كل الديلز الحلوة

طبعا مشكلة كبيرة لأن اللى بنوفره باليمين بيروح بنزين بالشمال ده غير ضياع الوقت والمجهود يعني نحاول نشوف إيه الستورز اللى قريبة مننا واللى إحنا متعودين نعمل فيها الشوبينج وخلاص .. ولو عندنا مشوار جنب أى ستور تانى نبقى نبص على الديلز اللى عنده .. يعنى مثلا  عندكم مشوار عند دكتور قريب من تارجت وإنتم عادة مش بتروحوا تارجت يبقى أبص على الديلز بتاعة الأسبوع ده يمكن ألاقى حاجة فري أو ديل ينفعنى أعدى بالمرة عليه وأجيبه لكن مش أروح مخصوص وهو مثلا بعيد عنى ١٠ – ١٥ ميل

 

خامسـا :: الهوس بالكوبونات

إستخدام الكوبونات ما يعنيش على الإطلاق الهوس بيها …. لكن المشكلة تكمن لما يتحول إستخدامها إلى هوس بيها … أنا عارفة إن موضوع إستخدام الكوبونات ممكن يتحول فعلا لإدمان بمنتهى السهولة لأنى مريت بالمراحل دي  .. يعني بلاش الموضوع يتعدى حدوده كل شئ بالعقل يكون كويس

 

سادســـا :: الإيميل والفيسبوك أكونت

أرجوووكم أرجوكم وكمان أرجوكم تعملوا إيميل منفصل وأيضا فيسبوك منفصل لإستخدامات الكوبونات والإشتراك فى العروض والسامبلز وخلافه صدقونى هتشكرونى على النصيحة دى بعدين لأن هييجي لكم كمية لا بأس بها من العروض والإعلانات إنتم فى غنى عنها .. على الأقل علشان تعرفوا تشوفوا الإيميلات المهمة براحتكم

 

طيب سؤال إيه الكوبونات اللى نطبعها ونستخدمها

 

لما يكون فيه كوبون وأقول لكم إنه عالى القيمة يبقى مش بيتكرر كتير إطبعوه وخلوه عندكم وقت اللزوم*

 

 

لما يكون فيه ديل فعلا على حاجة فري أنا بأشوف إنه من غير المعقول إننا ما نآخدهاش طيب ليه ما نآخدها طالما إحنا كده كده فى الستور يبقى نطبع الكوبون ونستخدمه أكيد

 

 

آخر الشهر بصوا على الكوبونات لأنها بتاعة كوبونز دوت كوم وريد بلم أونلاين وكمان كوبون نيتوورك لأن الكوبونات بتتغير أول كل شهر .. بصوا عليها وشوفوا لو فيه كوبون ممكن تستفيدوا منه لاحقا يكون على شئ بتستخدموه فى البيت كتير

 

سؤال تانى بيجيلي كتير ما بتزهقيش ؟ من موضوع الكوبونات وبتتعبى

أكيد كل فترة بيجي لى حالة زهق .. ملل … تعب سموها زى ما تسموها وخصوصا إننا السيدات مودى شويتين .. يعنى مزاجنا بيتغير كتير .. وساعات بأقرر إنى أروح أعمل شوبينج من غير تخطيط .. للتنفيس عن النفس مش أكتر .. لكن بأندم بعدها لأنى دايما بألاقى كوبونات على الحاجات اللى إشتريتها وأقول يا ريتني كنت .. بس خلاص أهه بتكون كل فترة كده مرة وبتعدى يعني حصل خير مش هنشنق نفسنا علشان ١٠ واللا حتى ١٠٠ دولار مش كده واللا إيه

 

وأخيرا أتمنى لكم توفير سعيد وكوبونات وديلز متميزة وإن شاء الله ما تقعوش فى الغلطات بتاعتى .. يا ريت لو وقعتوا فى أى خطأ تانى تقولوا لنا عليه لتجنبه .. ويبقى كتر خيركم