إزاى ننظم الكوبونات؟ .. ناس كتير بيحيرها الموضوع ده وخصوصا إننا ممكن نطبع كوبونات كتير وما نستخدمهاش فى ساعتها أو فى يوميها .. وناس كتير بتسألنى أحط الكوبونات فين وأتعامل معاها إزاى .. وإزاى أنظمها علشان لو إحتجت كوبون معين أعرف ألاقيه
الحقيقة لو دخلتوا على الإنترنت وعملتوا بحث فى جوجل هتلاقوا حاجات كتير قوى عن تنظيم الكوبونات .ز فيه ناس بتقسمها بالتاريخ وناس تقسمها بالمنتجات .. وناس بتستخدم علبة كبيرة وناس تستخدم شنطة متقسمة وناس بتستخدم فايلات و و لآخره .. وأغلب الناس دى بتيجي يوم الأحد بالليل وتقعد قدام التليفزيون وتقص الكوبونات كلها وتحفظها على حسب طريقتهم فى الحفظ
بالنسبة لى ده من رابع .. لا عاشر المشتحيلات إنى أعمل كده .. أولا الكسل هأجيب كل ده وأقعد أقص فيه وأوضب وأحط كل كوبون فى مكان … لا يمكن مش أنا .. لست أنا هذا الرجل .. ثانيا :: مفيش وقت للكلام ده !! أنا ولادى ربنا يخليهم شافطين الوقت بتاعى وما عنديش وقت ولا نفس للكلام ده
تعالوا بقا أقول لكم طريقة الناس الكسلانة أو اللى ما عندهاش وقت زيي بتعمل إيه
أولا :: الكوبونات الأسبوعية
طبعا إحنا كل أسبوع بتوصل لنا كوبونات زى سمارت سورس وريد بلم وبي جي وخلافه .. بآخدهم كده زى ما هم وأكتب عليهم التاريخ
آخر السنة كل واحد من ولادى بيرجع معاه حاجات من المدرسة بتاعته منها الفولدرز اللى كانوا بيستخدموها للمواد المختلفة … بأعمل لها ريسايكل وإعادة إستخدام .. إخترت عدد ٦ فولدر يكون ليها جيوب من جوه على أساس كل فولدر يتحط فيه كوبونات شهرين ٦*٢ = ١٢ شهر بالتمام والكمال
لو ما عندكمش أولاد فى المدرسة يبقى إنتظروا موسم دخول المدارس وإنتظروا الكليرانس بتاع تارجت بيكونوا نازلين ٧٠ و٩٠ ٪ كمان
وآدى فولدر أهه ناحية فيه شهر مارس والتانية شهر أبريل
وبأحطهم على جنب أو فوق بعض أو فى علبة من علب اللعب بتاعة الأولاد وخلاص لما بأحتاج أدور على كوبون بأدخل على البحث عن كوبون عندى وبأشوفه وأطلعه من الفولدر بتاعه وأقصه مش محتاجة أقصه من بدري يعني
ثانيا : الكوبونات اللى بنطبعها أو بتيجي مع السامبلز
ودى عادة مش بتكون كتير قوى يعني بأقصها وبأحطها فى فولدر بلاستيك شفاف زى ده كده وبأعينها مع الورق بتاعى فى فولدر بأشيل فيه حاجاتى المهمة وأوراقى
أهه الفولدر ده كنت جايباه من تارجت رخيص قوى فى تنزيلات المدارس وكل شهر أبص على الكوبونات دى بسرعة واللى خلص بأرميه
بس كده .. هى دى طريقتى الكسلانة فى ترتيب الكوبونات .. إيه رأيكم؟
طبعا فيه ناس كتير تحب تنظم الكوبونات على حسب نوعها .. لو عندكم وقت طبعا تبقى ظريفة وتسهل عليكم كتير
أتمنى إنى أكون جاوبت على الأسئلة اللى محيراكم فى تنظيم الكوبونات
I wish we can find this big amount of coupons that we cannot organize!!!!!!!!!!!!!
ههههه ما تزعليش إن شاء الله موضوع الكوبونات ينتشر عندكم .. الصبر جميل .. يا كده يا إما تنقلوا أمريكا أو كندا