مطبخ مغتربـة :: صينية السمك بالبشاميل

سمك!!! وبالبشاميل كمااان!!! لا يمكن أبدا أبدا أجربه

ده كان أول إنطباع لى لما كلمتنى أختى وقالت لىعلى الوصفة وقعدت تقول فيها شعر .. قلت إزاى يا بنتى بشاميل وسمك ما ينفعش .. دى كده بقيت سمك لبن تمر هندى .. ردت على وقالت لى انا برضه قلت كده لكن لما جربته … إتغيرت وجهة نظرى تماما … وفعلا أنا كمان لما جربته غيرت وجهة نظرى … جربوه يمكن إنتو كمان تغيروا وجهة نظركم واللا إيه مفيش مانع من التجربة تعالوا نشوف بقا السمك أبو بشاميل ده بيتعمل إزاى

 

المقاديـــر

 

٦ قطع سمك فيلية أى نوع أنا إستخدمت التالابيا اللى هو شبه البلطى

٣ أكواب بطاطس مقطعة – حوالى ٢ حبات بطاطس كبيرة

١ كوب فلفل رومى ألوان مقطع

٢/١ كوب كزبرة خضرا مقطعة

معلقتين صغيرتين ثوم مفري

٢ معلقة صغيرة كمون

بصلة صغيرة مقطعة جوانح

٤ معالق كبيرة زيت زيتون

ملح وفلفل حسب الرغبة

للبشاميل هنحتاج

٤ ملاعق كبيرى زيت زيتون

٣ ملاعق كبيرة دقيق – أنا إستخدمت دقيق أسمر !!! وطلع حلو جدا

٣ أكواب لبن حليب

الطــريقـــــة

فى طبق نخلط زيت الزيتون والملح والكمون والثوم جيدا ونقسمهم نصفين

نتبل السمك بنصف التتبيلة ونضيف النصف الآخر لخليط الخضروات ( الفلفل والبطاطس والبصل) وممكن تضيفوا حلقات طماطم لو حبيتو

فى صينية الفرن نضيف الخضروات ثم نضع عليها شرائح السمك

ندخلها فرن مسخن مسبقا على ٣٥٠ فهرنهايت ونتركها حوالى ٢٥ دقيقة

فى هذه الأثناء نجهز البشاميل بأننا نضع الدقيق فى الزيت على النار حتى يشقر لونه ثم نضيف اللبن الحليل واحدة واحدة ونقلب سريعا علشان ما يكلكعش

نخرج الصينية من الفرن ونضيف عليها البشاميل ونرجعها تانى للفرن

تبقى فى الفرن حتى يتحمر والوش بتاعها أو شوية كده ونفتح عليها الشواية

نتركها تهدأ قليلا ثم تقدم بالهنا والشفا مع سلطة خضرا وأرز أو عيش بلدى

وبالهنا والشفا … عايزة رأيكم