يوم السيت الماضى كان عندنا جراج سيل فى الكميونيتي اللى إحنا فيه .. وعلى الرغم إن الجراج سيل ده مكانش مثمر قوى لى من الناحية المادية .. لكنه كان جميل جدا جدا للأولاد ولأولاد الجيران ..وإتعلموا حاجات كتير فيه وأكيد أنا كمان إتعلمت لأن ده أول جراج سيل حقيقي لينا
أولا :: فن البيع والشراء وإتمام الصفقات
الأولاد عندى طلعوا شوية لعب عايزين يبيعوها .. طبعا أنا قلت لهم اللعبة علشان تتباع لازم تنزل مش أقل من ٧٠٪ من سعرها الأصلى .. وفعلا قعدوا يحطوا الأسعار عليها زى ما قلت لهم بالظبط .. ولما جه وقت البيع الناس كانت بتفاصل .. طبيعي قلت لهم الفصال مع أصحاب الشأن وده إداهم ثقة فى نفسهم .. طبعا حسن إبنى كان الزعيم فى الموضوع ده .. وكانوا مثلا حاطين اللعبة بـ ٤ دولار ييجي حد يسألهم يقوموا ينزلوها لدولار على طول مفيش تفاهم هههه بس أنا فهمتهم إنك ما ينفعش تنزل من ٤ لـدولار مرة واحدة .. لازم بالتدريج الأول ٣ وبعدين ممكن آخر النهار تنزل لـ ٢ على أساس آخر اليوم وخلاص هنقفل .. كده وده علمهم فن التعامل مع الناس والبيع والشراء
ثانيا :: التعامل مع الفلوس
يعني إيه ربع دولا ودولار و ١٠ سنت وهكذا إزاى يآخدوا دولار ويرجعوا الباقى .. وإنهم يعدوا الفلوس كويس جدا ويبقوا مصحصحين ويآخدوا بالهم ويدوا الناس حقها
ثالثا :: التعاون لإنجاح المهمة
الأولاد تعاونوا مع أولاد الجيران وكل واحد قال هيجيب إيه ويعمل إيه .. وده فى حد ذاته يعلمهم العمل الجماعى
رابعــا :: خلق فرص لكسب فلوس أكتر
ودى الحقيقة موجودة عندهم بالمدرسة بشكل كبير قوى كل شوية الأولاد يعملوا سيل بعد المدرسة والفلوس تروح للمدرسة .. المرة دى قرروا يعملوا ستاند يبيعوا فيه ليمونادة وكوكيز وآيسد تى .. والصبح كانت الدنيا برد وواحدة قالت لهم ليه ما تعملوش قهوة .. وطبعا لمعت فى عينيهم وعلى طول عملوا القهوة
خامسـا :: الماركتينج
ههههه ودى بقى كانت لذيذة جدا من بنت الجيران … بتلم فلوس علشان كانت عايزة تجيب عروسة باربى .. وهتموت وتلم الفلوس كأن ما عندهاش ١٠ باربى المهم إنها لما قعدوا شوية ومفيش حد إشترى قالت لو هم مش عايزين ييجوا إحنا نروح لهم !!! وفعلا فكرة ذكية جدا جدا وراحت هى والأولاد أخدوا العصير وشوية كبايات والكوكيز وقعدوا يلفوا على الناس ويقفوا على الناصية البعيدة بس طبعا أنا شايفاهم .. يعني نظام الجيش قال لك إتصرف هنجيب زباين يعني هنجيب زباين
سادســـا :: هدف للفلوس
مش الفكرة إننا نلم فلوس وخلاص لازم يكون ليهم هدف محدد .. كل واحد كان محدد عايز يلم الفلوس ليه … وعلشان يجيب بيها إيه بالتحديد
سابعـــا :: مقاومة النفس
ودى وجدت فيها صعوبة شوية لكن تمت على خير والحمد لله … لازم يكون للفقراء حق فى الفلوس اللى بنكسبها علشان ربنا يبارك لنا فيها ويبعت لنا أكتر وأكتر .. أنا حابة إنى أعلم ولادى إن الواحد مش لازم يستنى لما يكون عنده ١٠٠ دولار علشان يبتدى يطلع فلوس يعنى مش لازم يكون فيه نصاب بالعربى .. لا كل أما نحوش كل ما ندى فلوس وكل ما ييجي لنا فلوس أكتر .. الدنيا كده .. علشان تآخد يبقى لازم تدى الأول .. عايزين فلوس يبقى نطلع فلوس .. عايزين علم يبقى العلم اللى عندنا نعلمه لغيرنا .. وهكذا
ثامنـا :: وده درس لى قبل أى حد الإستعداد الجيد
لازم نستعد كويس لو عايزين النجاح فى السيل يبقى لازم نستعد له كويس ونخطط ونشوف هنعرض البضاعة إزاى وهنحطها فين ونعمل الأسعار ونبقى تمام قبلها بفترة كويسة .. نتيجة لظروفى الحالية ودربكة عندىف ى البيت ما إستعديتش كويس للجراج سيل ده لكن إن شاء الله إتعلمنا الدرس
فيه حاجة مهمة احب أقولها عن التجربة دى .. الجراج سيل الناس بتيجي متوقعة تشترى عربية بدولار يعني عايزين أسعار رخيصة جدا جدا وده مش عيب .. هو الجراج سيل كده واليارد سيل كده .. لكن طبعا محلات البيع للغير اللى كنت كلمتكم عنها قبل كده بتكون مختلفة والعائد منها مختلف بس ما ننساش برضه إن المحلات والمعارض دى بتآخد نسبة وكمان بتآخد تمن ما هى بتعرض لكم المنتجات .. ومش بتآخد أى حاجة والسلام لأ بيكون فيه تدقيق فى المنتجات حاجة مبقعة ولو بقعة مش باينة مش هيآخدوها .. ليهم إشتراطات معينة أكيد علشان سمعتهم
Leave a Reply