البسبوسة .. من أحلى وأشهى الحلويات الشرقية .. والكل بيحبها صغار وكبار
البسبوسة فى بلدى غييييييييير … ليها طعم جميل ومهما حاولنا نقلدها مش بنعرف للأسف فيه سر للحلوانية فى مصر محدش عارف يوصل له .. لكن أهه أدينا بنحاول وفى وسط محاولاتنا ممكن يطلع حاجة كويسة
أنا جربت وصفات كتير للبسبوسة منها اللى باللبن ومنها اللى بالقشطة ومنها اللى بالزبادى .. الحقيقة أكتر واحدة عجبتنى هى اللى بالزبادى وبأستخدم معاه السميد الخشن لأن الناعم مش بيكون طعمه بسبوسة بيبقى على كيك شوية .. ده رأيي والنصيحة دى عرفتها من صديقة لى .. السميد الخشن أفضل من الناعم فى عمل البسبوسة وطبعا دى فى الأول والآخر مسأله أذواق مش أكتر وده شكل السميد اللى أنا بأشتريه من المحل العربى
هنحتاج الآتى
١.٥ كوب سميد خشن
١ كوب سكر أبيض
٤/٣ كوب جوز هند مبشور
١ كوب زبادى سادة – زبادى مش لبن سائل
٢/١ كوب زبدة – بدرجة حرارة الغرفة
٢/١ م كبيرة بيكنج بودر
٢/١ م كبيرة بيكنج صودا
١ ونصف م صغيرة فانيليا
للشربات : ١ كوب ماء + ١ كوب سكر أبيض + ١ م صغيرة عصير ليمون
الطريقــة
سهلة جدا .. نخلط كل المكونات مع بعضها ونعجنها كويس جدا
ثم نفردها فى صينية مستطيلة .. البايركس العادية ونزينها بالمكسرات لو حبينا
وتدخل فرن مسخن مسبقا على ٣٥٠ فهرنهايت لغاية لما تحمر من الوش
فى أثناء ما البسبوسة فى الفرن نعمل الشربات .. ندوب السكر فى المية وأول لما تغلى نضيف عليها الليمون المعصور ونتركها حوالى ١٠ دقائق على النار
وأول ما تخرج البسبوسة من الفرن نصب عليها الشربات وهو ساخن .. لازم الإتنين يكونوا سخنين
نتركها تبرد قليلا ثم تقطع وتقدم بالهنا والشفا
راجية says
انا سمعت الشيف منال عامر وهي بتقول: سر نجاج البسبوسة انها لازم تتبسبسس يعني تدعك باليد مش بمضرب. ايه رايكم دام فضلكم.
moghtarebah says
إيه ده بجد!!! أول مرة أعرف موضوع البسبسة ده على العموم نجرب أنا عمرى ما عملتها باليد بأعملها بالمعلقة وخلاص …أدور على لينك منال وأشوف بس خللى بالك إنتو اللى هتتدبسوا فيها هههه
........... says
my kids really like the egyptian version of basbousah
but as u mentioned, the secret receipe was never known
i will try urs and let u know their expressions
moghtarebah says
يا ريت تقولى لى عملتى إيه ويا رب تعجبكم .. أنا لازم أشوف لى حلوانى فى مصر أعرف منه السر ورا البسبوسة بتاعتهم حاجة رهيبة فعلا
Shery says
ازيك يا قمر انا اشتريت كيس بسبوسه امبارح حلو الشام
من المحل العربي وجبت كيس جوز هند عايزكي تساعديني
بقا في مقاس الصنيه لحسن لما كنت بعملها في مصر كانت
بتبقا طوبه متنكره علي هيئة بسبوسه ههههههههههه
وقريت علي ألنت سر الحلوانيه في البسبوسه انهم بيحطوا جواه
عجينه البسبوسه شويه يا عسل ابيض يا جلوكوز
يا سيريب تقيل او شويه شربات تقيل اوي ده وانتي بتعجنيها قبل متحطيها في الصنيه وتسقي البسبوسه
وهي سخونه بشربات يكون بيغلي سخن جداً بيقولوا
بتتطلع زي بتاعه الحلواني بالظبط
بس انا مجربتش بس ناويه الصراحه نفسي فيها بس متردده لآني مقاس الصنيه اللي مش عارفه
وبشوف الناس اللي عاملها علي ألنت بتبقا عامله صنيه مدوره وإلحافه بتاعتها مش عاليه زي
فعلا بتاعه الحلوانيه اجبها منين دي مش عارفه معلش طولت عليكي ورغيت كتير بس البسبوسه مشتقالها اوي
اوي
Amira says
بصي أنا عمري ما جربت حلو الشام ولا غيره بأستخدم الوصفة دي وبتطلع معايا معقولة واللي بيآكلوها من المصريين اللي هنا بيتبسطوا منها جدا مش عارفة بقى هل هم نسيوا طعم البسبوسة يا عيني…. ومفيش قدامهم إلا دي في الغالب كده ههههه…. أنا بأعملها في الصينية البايركس العادية اللي هي ٩ * ١٣ إنش دي ….عمري ما سمعت عن موضوع السيراب ده لكن نجرب وليه لا هو حد خسران حاجة وأهه كله بيتآكل
فضفضة says
الطريقة دي عمرها ما ظبت معايا ،ع طول تطلع مهرية وناكلها بالمعلقة بيبقي طعمها حلو بس ماينفعش تتقدم لحد هههههههه
فضلت ادور ع طرق واجرب لحد مالاقيت طريقة ف منتدي عالم حواء ل DON
جربتها وطلعت واااااو وبقت طريقتي المعتمده
بتطلع خرط وطعمها مايتفرقش عن الجاهزة مرة كنت عازمة سلفتي واخت زوجي افتكروها جاخزة
اهي الطريقة لو حبيتي تجربيها وهاتعجبك بإذن الله
المقادير :
كوب وربع سكر
كوب وربع حليب
3/4 كوب سمنة
1/2 كيلو سميد ( دقيق بسبوسة)
معلقة بيكنج بورد
نص كوب جوز الهند
شوية لوز مفروم نصهم للوش والنص التاني للعجينه
شوية فانيليا
الشرابات : 2 كوب ماء + 2 كوب سكر + رشة فانيليا ….. بدووووون ليمون
الطريقة:
نضع البيكنج بودر على السميد وجوز الهند والفانيليا واللوز ونخلطهم كويس
فى حلة حطي الحليب + السكر + السمنة على النار لحد مايغلوا ويقلبوا قلبتين
بعد كده حطيهم علي خليط السميد وقلبي كويس لحد ما السميد بشربهم وتتكون عندك عجينه اتخن من السيريلاك شويه
تكوني داهنه صينيه بالسمنه تفردي فيها العجينه دي
ورشي الوش بباقي اللوز المفروم
راعي ان مقاس الصينيه يكون مناسب للكميه اللي عندك والسمك اللي انت عاوزاه
مش عارفه الصينيه اللي عملته فيها مقاسها كام بس تقريبا قطرها 40 سم اللي هي زي صواني البسبوسة بتاع الحلواني ام حافة قصيرة
بعد كده دخليها فرن يكون متسخن قبل كده ( ولعي الفرن قبل ما تبدأي تعمليها )
يادوب تتحمر من تحت ومن فوق مش هاتاخد اكتر من 20 دقيقه
طلعيها وحطي عليها الشربات وهو سخن تكوني عامله حسابك انه يبقي جاهز وتطفي عليه وانت بطلعيها من الفرن
وغطيها خمس دقايق
بس يا ستي وكلي احلي بسبوسه بالهنا والشفا
باعملها من بدري او ع بيات عشان اضمن انها تبرد كويس وتتقطع بسهولة
Amira says
تسلمي فضفضة على الطريقة بالتأكيد هأجربها إن شاء الله