من أول المشاكل اللى بتواجهنا نحن المغتربين العرب هى الخبز أو العيش وفى سعيي الحثيث 
لأنى ألاقى طريقة تشبه ولو بقدر بسيط الخبز البلدى فى بلدى مصر وجدت هذه الوصفة الرائعة اللى أخذتها من صديقة فلسطينية غالية على قلبى وهى أم مالك من منتدى لك
قبل كده كنت قدمت لكم خبز البيتا وهو سهل وظريف ويعتبر من أحسن الوصفات للخبز المدور بتاعنا .. ودلوقتى أحب أقدم لكم خبز الطابون الفلسطيني … مما قرأت إن الطابون ده عبارة عن فتحة فى الأرض وفى قعرها ظلط وحجر لزيادة سخونة الفرن وليه غطاء معدنى وكانت السيدات الفلسطينيات بيطبخوا فى هذا الفرن الصوانى والمحمر والمشمر وأيضا هذا الخبز العظيم .. وبالبحث على الإنترنت وجدت لكم هذه الصورة لفرن الطابون الفلسطيني الجميل
وطبعا لأننا ساكنين فى شقق وما نقدرش نحفر فى الأرض ونعمل فرن بنستعيض عن الموضوع ده بإننا نجمع شوية ظلط أو حصى صغير .. أنا إشتريت حصى من اللى بيتحط للزينة فى الفزات وخلافه وغسلته كويس لأنه بيكون مغطى بطبقة من الشمع وبأحطه فى صينية الخبز فى الفرن وأسخنه كويس جدا على أعلى درجة فى الفرن
وده شكل الفرن بتاعى
تعالوا نشوف المقاديـــر
٢ كوب دقيق أبيض متعدد الإستعمال
٢/١ كوب دقيق أسمر
٢ معلقة كبيرة خميرة جافة
١ معلقة كبيرة سكر
ماء دافئ للعجن – حتى الحصول على عجينة تلتصق باليد … عجينتي أخدت كوب ونصف
الطريقــة
أولا : نخلط الكونات الجافـة معـا جيدا ثم نضيف الماء الدافئ بالتدريج ونعجن حتى نحصل على عجينة لينة وتلتصق باليد كما هو موضح بالصور ثم نتركها فى مكان دافئ حتى ترتفع وتزيد فى الحجم تقريبا ساعة
نرش سطح نظيف بالدقيق الأسمر ونطلع العجينة ونقسمها ٣ كور كبيرة
نفرد كل كورة على سطح مرشوش بالدقيق الأسمر ونضغط عليها بأطراف الأصابع علشان نعمل الشكل اللى قدامنا ده
وإحنا بنفرد العجين نجهز الفرن ونفتحه على أعلى درجة ونحط فيه صينية الخبز بتاعتنا والظلط فيها علشان يسخن قبل ما نبدأ الخبز
بعد ما نتأكد إن الصينية سخنت جامد وجهزت نبدأ بوضع الأرغفة فى الفرن ونتركه حوالى دقيقتين إلى أن يحمر ومفيش داعى نقلبه على الوجه الآخر
ممكن نغمس بيه أى شئ فى الوجود وقريب جدا من البلدى المصرى
وهنا ساندوتش محشى جبنة يم يم إتفضلوا معانا
شكل الرغيف كله
يا ريت يكون عجبكم … جربوه مش هتندموا أبدا إن شاء الله
Thanks very much.I will try it.A least one thing can be applied easily in Ireland.
Alhamdo lillah
Can you please help me with a recipe for egyptian pickles ( TORSHI)of onions, carrots, lemone….etc.
عامل زي العيش الابوري اللي بنعمله هنا في مصر والعجينة هي نفسها بتاع العيش الفلاحي المصري ودي بتتبطط رفيعه ،بس بنبططها اتخن اما نكون عاوزينه ابوري وساعات نحشيه سمنه بلدي وسكر يبقي واااااو
بس معلش هو انت بتحطيه مباشرة علي الظلط ولا بيتحط في صينية لوحده؟
وهل ممكن نستبدل الزلط ب حجر البيتزا ؟ ولا ماينفعش؟
أنا بأحطه مباشرة على الظلط .. الفكرة من الظلط إنه بيديها شكل شبه الشكل التقليدي لخبز الطابون فيه حفر كده شوية مش هينفع حجر البيتزا لأنه أملس