إصنع(ـى) بنفسك :: الكلوركس المنزلى

إيه مش مصدقين لا ممكن فعلا نعمل الكلوركس أو حاجة شبهه يعني

طيب ليه نعمله ما هو موجود ومش غالى يعنى

الحقيقة دى مسألة شخصية .. أنا شخصيا بأكره الكلوركس .. ريحته بتخنقنى .. وبأخاف منه جدا على الهدوم

دى عقدة عندى من أيام الطفولة لأن الست اللى بتساعد والدتى فى البيت بتموووت فى الكلوركس ويوم التنضيف العالمى فى البيت بترش كلوركس فى كل مكان صحرا إن كان أو بستان وبالتالى ممكن جدا كان ييجي على الهدوم وعلى أى حاجة ويبوظها .. حاولنا نخلصها من العادة دى لكن هى خلاص أدمنت مش بتحس إن الحاجة نضيفة إلا لما تكون مليانة كلوركس ومن هنا نشأت عقدتى الأزلية فى موضوع الكلوركس ده

ده بالإضافة إلى أخطار الكلوركس وبالذات لو عندك أطفال صغيرين أو حيوانات أليفة … وده مش من عندى ده مكتوب على العلبة بتاعة الكلوركس والوايبس وكل حاجة فيها كلوركس .. وفى محاولة منى علشان أكون صديقة للبيئة قررت إنى أعمل الكلوركس فى البيت .. أهيه تجربة

فيه وصفات كتير لعمل الكلوركس أو المبيض فى الإنترنت لكن فيه منها وصفات خطيرة حبتين لأنكم بتخلطوا مكونات مش المفروض إنها تتخلط مع بعض نتيجة التفاعل الكيميائى بتاعها يعنى مش نخلص من الكلوركس ندخل فى مفاعل نووى لا قدر الله

وبعد البحث والتنقيب وسؤال الأستاذ جوجل لقينا الوصفة المثالية والطبيعية بنسبة كبيرة .. وهى طريقة نستخدم فيها الهايدروجين بيروكسايد أو ماء الأكسجين

H2O2 ماء الأكسجين هو ببساطـة مكون من ماء + أكسجين

يعني من الآخر مكوناته طبيعية ومفيش منها خطورة .. بس أحب أنبهكم إن ماء الأكسجين يجب أن يحفظ فى مكان بارد ومظلم بعد ما نفتح الزجاجة

ماء الأكسجين بعد فترة يتأكسد ويرجع تانى ماء وغاز الأكسجين

لو زجاجة ماء الأكسجين عندكم بقالها سنة واللا إتنين أو تاريخ الصلاحية إنتهى مش هتجيب مفعول

لو عايزين تعرفوا ماء الأكسجين اللى عندكم لسه شغال واللا لأ إسكبوا بعض منه فى أى بلاعة .. حوض .. بانيو وخلافه المفروض تسمعوا صوت هسسس كده مش عارفة أوصفلكم الصوت إزاى المهم صوت كده  يعني طالع من البلاعة

بعد درس الكيمياء ده – برضه ما كنتش بأحب الكيمياء- تعالوا نشوف هنعمل الكلوركس إزاى

كل اللى هنحتاجه

١٢ كوب ماء من الحنفية يعني مية عادية **

٤/١ كوب عصير ليمون – من غير سكر يعنى مش ليمونادة **

١ كوب ماء أكسجين **

إخلطوا المكونات معا جيدا

وإستخدموه فى الغسيل أو ممكن نحطه فى بخاخة ويستخدم كمنظف عام فى المنزل

لما تيجوا تستخدموه فى الغسيل الأبيض نضيف ٢ كوب للغسلة الواحدة

أنا عملت نصف الكمية تقريبا .. يستحسن إننا نعمل كميات صغيرة يعنى النص وكل أما نحتاج نعمل علشان ماء الأكسجين ما يبوظش من الركنة إلا لو كنتم بتستخدموه زي واحدة صاحبتنا وناقص ترشوه على الأكل وخلافه

أتمنى تكون فكرة اليوم عجبتكم وتطبقوهــا وقولوا لى عملتوا إيه