Skip links

مغتربة

حياة أمريكية بنكهة عربية

Main navigation

مطبخ مغتربة :: كيكة جدتى الرخامية- أحلى كيكة فى الوجود

by 11 Comments

النهاردة هأقول لكم على وصفة سحرية وهى وصفة فى العائلة من زمان … كيكة جدتى الرخامية … عمرها ما خيبت معايا ودايما مشرفانى قدام ضيوفى والحمد لله وأهم حاجة وأغرب حاجة في الكيكة دى إنها ممكن تتشال فى الفريزر فترة طويلة شهر – شهرين  … أقصى مدة جربتها شهرين والكيكة دي بتكون حلوة جدا وهى نازلة من الفريزر .. فعلا جميلة قوى سيبوها تفك ربع ساعة وقدموها مع شاى جميل أو فوقيها بولة آيس كريم فى أيام الصيف الحارة .. تعالوا بقا أقول لكم على كيكة جدتى الشهيرة

شوفوا قد إيه هشة وطرية وجميلة فعلا أنصحكم تجربوها نييجي للمفيد

المقاديـر كالآتـى

٤ أكواب دقيق أبيض متعدد الإستعمالات –

٣ كوب سكر أبيض –

٢ كوب زبدة طرية –

١ كوب لبن حليب –

٦ بيضات متوسطة الحجم –

١ معلقة كبيرة بيكنج بودر –

رشة فانيليا –

٦ ملاعق كبيرة كاكاو بودرة غير محلى –

الكيكة دي بنسميها فى عائلتنا كيكة ٤- ٣-٢-١ نسبة إلى نسب الدقيق والسكر والزبدة واللبن فكرة حلوة لتذكر المقادير

الــطـــريـــــقة

بالخفاق اليدوي نخفق الزبدة الزبدة جيدا مع السكر حتى تصبح كريمي – أنا قطعت الزبدة مكعبات حتى يسهل خفقها بالخفاق اليدوي

نضيف البيض بيضة بيضة ونستمر بالخفق حتى ننتهى من البيض ثم نضيف رشة الفانيليا

نضيف اللبن ونستمر بالخفق ثم ننخل الدقيق جيدا ونضيف الدقيق واحدة واحدة ونضيف البيكنج بودر فى النصف

نحضر ٣ قوالب  للكيك ونوزع نصف الكمية فى القوالب

نضيف الكاكاو على النصف الباقى ونقلب جيدا ثم نضيف الجزء اللى بالكاكاو على باقى القوالب

بطرف سكينة أو شوكة نعمل تموجات فى القوالب حتى نحصل على الشكل الرخامي

يدخل فى فرن مسخن مسبقا على درجة ٣٥٠ فهرنهايت ولا نفتح باب الفرن أبدا أبدا قبل مرور ٣٠ دقيقة  وإلا الكيكة هتهبط ومش هتبقى هشة

نختبر نضوج الكيكة بوضع خلة أسنان فى المنتصف لو خرجت نظيفة يبقىالكيكة نضجت لو مش نظيفة نتركها كمان ١٠ دقائق أو أقل على حسب الفرن

نترك الكيكة تبرد جيدا ونلفها بالفيلم ونضعها بالفريزر لحين الإستخدام

قبل التقديم نطلع الكيكة من الفريزر بربع ساعة ونتركها فى درجة حرارة الغرفة حوالى ربع ساعة ثم تقطع وتقدم بالهنا والشفا

إذا كنتم ناويين على أكل الكيكة طازجة يستحسن تتركوها فى الثلاجة لمدة ساعة قبل التقطيع والتقديم بتكون أطيب

وهنا إبنى بيلحس الخفاق … أكيد أغلبكم عمل كده وهو صغير

 

أفكــار للتقديم

طبعا تقدم كده سادة مع الشاى أو القهوة ويمكن تزيينها بالفواكة أو الآيس كريم

Reader Interactions

Comments

  1. اما باجى اضرب السكرمع الزبده مالسكر ما بيدوب
    ينفع احط البيض واضرب يمكن السكر يدوب

    Reply

  2. أهلا بيكي أروى … مش ضرورى السكر يدوب فى الزبدة هو بيكون لسه عامل حبيبات شوية جوه الزبدة ولمت بنضيف البيض واللبن وبعدين الدقيق بيدوب وبيتجانس مع باقى المكونات .. بس إنتى خللى الزبدة تكون طرية شوية .. مش ضرورى سايحة بس طرية على الآخر طلعيها من التلاجة من بدرى

    Reply

  3. هو ممكن استبل الزذبدة بالزيت
    لان الكيك بالزبده بتفشل معايا ونشغل الفرن من تحت وفوق معا ولا من تحت فقط ويكون الخليط قدايه فى القالب نصفه ولا ثلث القالب وجزاك

    Reply

    • ليه بيفشل معاكى مع إن الزبدة أحلى بكتير من الزيت .. مش عارفة والله يا أروى جربى تلت المقدار يعني قالب واحدففط .. وشوفى الطعم إيه بالنسبة للفرن بأشغله من تحت فقط مش بأشغل الشواية .. والقالب تقريبا بيكون نصفه .. تابعيني وإن شاء الله أبقى أحط كيكات بالزيت ويا ريت لو جربتى تقولى لنا عملتى إيه

      Reply

  4. جزاك الله خيرا انا جربتها ببالزيت ماكنتش حلوة
    لى استفسار عن الكنافه نصف كيلولاكنافه ياخد اد ايه زبده والتسوية
    المسطرده اسمها ايه بالنجليزى والنشادر
    اسمها ايه
    انا استفدت من مطبخك ومتابعه معاك

    Reply

    • جزانا وإياكم أروى .. بصى فيه كيكات بالزيت كتير لو إنتى مش عايزة تشتخدمى السمن أو الزبدة خليني أجرب لك وأقول لك إيه اللى نفع معايا .. بالنسبة للكنافة أنا سألت والدتى – عليها صينية كنافة ما أقولكيش :)- المهم قالت لى حوالى ٤ معالق طعام هرمية سمنة طبعا ده بالتقريب لأنها مش بتستخدم عيار نهائى وقالت لى تشوفى وإنتى بتحطى عبى الكنافة لغاية لما تحسى إنها إتشربت .. أنا أعرف إن الأربع معالق الكبار العاديين بيعملوا ربع كوب تقريبا يعنى لو قلنا هرمية يبقى تلت كوب أو أقل قليلا فأنا رأيي سيحي تلت كوب سمن وحطى شوية شوية وإخلطى بالكنافة لغاية لما تتشرب السمن

      Mustard المسطردة
      Ammonia النشادر

      شكرا على كلامك الجميل وأى سؤال أنا تحت أمرك

      Reply

  5. ازيك ياغاليه حاجاتك بجد بتفدنى لانك بتوصصغى بالظبط علشان الخايبين اللى ذى
    انا عملت الكنافه بس عندى مشكله انهابسوى من تحت ولما افتح من فوق تنشف
    مش عارفه ليهوتشقق
    الشربات كان تقيل ياريت لو معاك مقادير
    الله اسال ان يلبس والدتك ثوب الصحه والعافيه ويرزقكم الحج عاجلا غير اجلا يارب استجب منى يارب

    Reply

    • إزيك إنت أروى .ز أنا بأنبسط قوى قوى فعلا لما حد بيستفيد وشكرا على تعليقك وتشجيعك لي يا رب أكون دايما مفيدة ليكي .. تعرفى أنا ما كنتش حتى بأعرف أعمل الرز ههههه بس أهه الغربة بتعلم الواحد حاجات كتير والحمد لله .. هممم إنت البوتاجاز بتاعك كهربا؟ البوتاجاز الكهربا أصله مقرف فعلا غير الغاز بتاعنا اللى فى بلادنا بس تعرفى فيه مناطق هنا فيها غاز بس قليلة قوى والتأمين بتاع البيوت بيكون عالى جدا لما بيكون فيه غاز .. بس الكنافة من تحت مش بتكون محمرة زى من فوق … طيب أقول لك جربى كده تقلبيها فى السمن فى صينية على النار فوق شوية يعني تديها نص سوا وتكملى تحت فى الفرن بس خلى بالك ما تنشفش .. أنا كنت ساعات بأشوف والدتى بتآخدها تقليبتين كده على النار من فوق والشربات بتاع الكنافة بيكون تقيل مش زى البسبوسة .. يعني بيكون ١ : ١ مش ١: ٢ زى البسبوسة – الرقم الأول سكر والرقم التانى مية .. إبقى قولى لى عملتى إيه والحياة كلها تجارب هههه ما تخافيش أمال .. من فوائد الزوج والأولاد إنك تجربى فيهم الأكل هههههه .. طبعا زوجك هيقول لك ما تدخليش مغتربة تانى :) .. ولكم مثل ما قلتم حبيبتى ويهدينا ويهدي أولادنا ويرضى عننا ربنا يا رب

      Reply

Trackbacks

Leave a Reply

Your email address will not be published. Required fields are marked *