ibotta أفكار بسيطة لزيادة الدخل :: مـن

أنا أسمع عن أبليكيشن أيبوتا بقالى فترة كبيرة لكن ما جربتهوش لأنى شكاكة زى ما شكيت إن سواج باكس هيديني فلوس وإعتمدت على المثل المصرى الأصيل …” هى الحداية هترمى كتاكيت؟!!!” لا طبعا أكيد فيه حاجة أو نصب .. لكن الحقيقة سمعت ناس كتير ثقة بيشكروا فيه و أخيرا قررت إنى أشترك فيه وأجربه

 

تعـالو الأول نعرف هو إيه التطبيق ده

 

أيبوتا مش أبليكيشن بتاعة كوبونات مبدئيا .. هى أبليكيشن فري بتقدم لك مجموعة من عروض الكاش باك على منتجات فى الغالب بتشتروها يعنى صابون – مربى- عصير- … وهكذا من منتجات البقالة الأسبوعية أو الشهرية العادية والمنتجات /، أسماء برضه بنشتريها زي دوف- تايد- جيف – تايسون- كلينكس … وغيرها يعني مش ماركات أورجانيك وغالية بقا أو ماركات لازم نلف على ما نلاقيها .. وأيضا فيها أغلب الستورز المشهورة هنا تارجت – ولمارت- سيف واى – ولجرينز- كينج سوبرز ….. وغيره

 

طيب بتشتغل إزاى الأيبوتا ده

 

أولا بندخل هنـــا ونعمل داونلود للأبلكيشن .. ونعمل تسجيل هيسأل على البيانات وهنعطيه كود المنطقة اللى إحنا فيها علشان العروض بتختلف من منطقة للتانية وهنلاقى شاشة شبه دى كده فيها العروض المتاحة كلها

ولما نضغط على أى عرض منهم هيظهر لنا التفاصيل بالشكل ده

لكل عرض من العروض بيكون فيه مجموعة من الأنشطة تحته زى ما إحنا شايفين ولازم نكمل على الأقل واحدة من الأنشطة دى علشان نقدر نخلى المنتج يظهر لنا فى قائمة المشتروات بتاعتنا ولو ما عملناش أى نشاط فى النهاية هيتشال العرض من عندنا ويحطوا لنا واحد تانى .. العرض يمكن إستخدامه مرة واحدة فقط يعني مثلا عرض المربى اللى هنا مش هنقدر نستخدمه غير على برطمان مربى واحد بس فهمتونى؟ مش زى الكوبونات نقدر نطبع منها كذا مرة ونستخدمها

علشان تعرفوا مدة صلاحية العرض بعد ما تختاروه روحوا على قائمة المشتروات ودوسوا على ريدييم كأنكم هتبعتوا الفاتورة هيطلع لكم مجموعة من الستورز اللى ممكن تعملوا فيه الشوبينج زي ما قلنا ولمارت وتارجت وكده إختاروا الستور اللى تقريبا هتعملوا فيه الشوبينج هيطلع لكم قائمة المشتروات وتحت كل منتج إخترتوه تاريخ إنتهاء العرض

 

لو ضغطوا على المنتج تقدروا تعملوا لايك أو ديس لايك ليه وبمرور الوقت الأبليكيشن هتعرف إيه المنتجات اللى بتحبوها وإيه لأ علشان تطلع لكم العروض اللى ممكن تعجبكم

 

نييجي بقا للخطوة المهمة وهى شراء المنتج نفسه

 

إختاروا ستور يكون موجود فى القائمة بتاعة أيبوتا – أغلب الستورز المشهورة اللى إحنا متعودين عليها موجودة – وقبل ما تشتروا المنتج لازم تتأكدوا من صلاحيته للعرض إزاى ممكن تعملوا كده … بطريقتين .. أولا : عن طريق العرض نفسه فوق على اليمين فيه إنفورميشين ” معلومات” عن العرض إضغطوا عليها يطلع لكم كل المعلومات إتأكدوا من قرائتها .. ثانيا : وده الأسهل وإنتم فى الستور إضغطوا على البار كود اللى فوق يمين فى العرض وإعملوا سكان للمنتج وهيقول لكم إذا كان ماشى الحال واللا مش ماشى

بعد ما تكملوا عمليات الشراء للمنتجات اللى إنتو عايزينها هتبعتوا لهم فاتورة الشراء أو الريسيت من الكاميرا اللى فى الجهاز بتاعكم بسهولة جدا وهم عندهم شوية تعليمات لتوجيهنا عن كيفية تصوير الريسيت .. بس خلاص .. فى خلال من ساعتين لـ ٢٤ ساعة بيتأكدوا من عملية الشراء وبيبعتوا لكم على الإيميل تأكيد وإن الفلوس تم وضعها فى الأكونت بتاعكم

لما بتعملوا ريدييم للعروض بتنزل لكم عروض جديدة فى أغلب الأحيان من نفس الشركات … أغلب الناس تم عمل التأكيد على فاتورة الشراء فى غضون نصف ساعة فقط

لما بتكملوا ٥ دولار على الأقل بيقوموا بتحويل المبلغ على حسابكم فى باي بال .. طبعا ظريف جدا إنه فلوس كاش يعني مش مثلا جيفت كارد لمحل معين أو بيجبركم على شراء منتجات معينة لأ دى فلوس كااااااش إعملوا بيها اللى إنتم عايزينه

طبعا أيبوتـا عروضه بتكون مفيدة جدا جدا بالذااات لو معاها كوبونات وتخفيضات بالمحلات تبقى أحسن وأحسن .. الأبليكيشن دى ممكن تحميلها على أجهزة الآبل والآندرويد … أى سؤال ممكن تدخلوا على صفحتهم الرئيسية وتضغطوا على المساعدة

 

من هنــــا يمكنكم قراءة باقى المجموعة