من فتـــرة ذهبت أنــا وأطفالى لطبيب الأطفال للإطمئنان عليهم عــامة والحمد لله … وإحنــا هناك عند الطبيب كنا بالغرفة أنتظر وصول الطبيب ودخوله علينا وإذا بإبنى الأوسط ينظر لى بدهشــة وإستغراب … قلت له مالك يا عبد الرحمن فيه إيه؟
عبد الرحمن : إنتى شايفة بيقولوا إيه؟
أنا : بيقولوا إيه يا إبنى؟
عبد الرحمن: بيقولوا …. وقرأ لى الورقة اللى فوق دى كانت متعلقة على الباب من جوة
أنــا : أيوة ما أنا عارفة؟
عبد الرحمن : إزاى بيعملوا كده …؟!!! ماما
أنــا: بيعملوا إيه مش فاهمة؟
عبد الرحمن: إزاى بيخلونا نختفى لما إنتو تتكلموا فى التليفون !!! غريبة قوى يا ماما
وهنــا أدركت هو بيتكلم عن إيه .. وطبعــا فطست على روحى من الضحك ولغاية دلوقتى لسه بأضحك كل أما أفتكر الواقعة دى
واقعــــة تــــــانيـــــــة
حسـن إبنى كان بيحفظ قرآن معايا وماسـك المصحف بإيده وبعدين حطه على رجليه ” قدمه” رحت قلت له لأ يا حسونة ما ينفعش كده القرآن ما يتحطش على رجلينا من تحت كده … قال لى ليـه ؟ قلت له علشـان القرآن ده كلام ربنا ولازم نحترمه ونشيله على راسنا من فوق … بص لى قوى كده وقال لى : والله؟ وراح حاطط المصحف على راسه من فوق وقال لى يعنى لازم أشيله كده وأمشى بيه!!!!! طبعـــا ضحكت ومش عارفة أرد عليه إزاى
خلاصة الواقعتين : أولادنـــا واللغـــة سواء العربى أو الإنجليــزى مختلفين … طبعا اللغة الإنجليزية هتتحسن بالوقت وهيفهموا المقصد من وراء الكلام إنما العربي .. لازم يتعرضوا له بشكل كبير ويومي .. ودى أكبر مشكلة بتواجه العرب المغتربين .. بنخاف على أولادنــا ينســوا العربى وعايزينهم يبقــوا زيينا إحنا اللى إتربينا فى بلادنــا وعشنا وكبرنا وإتعلمنا فيها … صعب .. لكن مفيش حاجة مستحيلة بس هنعمل مجهود أكبر من اللى عملوه أهالينا لأن الوضع مختلف تماما
أول حاجة لازم نعقد النية إننا بنعمل كده لوجه الله وعلشان نربطهم بوطنهم وأصلهم ولو إنتو مسلمين تعليمهم اللغة كمان هيعلمهم إزاى يقدروا يقرأوا من المصحف ودى حاجة ثوابها كبير أكيد … ونطلب المساعدة والصبر من ربنا
ثانيــا : بأشوف كتير من العرب بيستسهلوا ويتكلموا مع أولادهم فى البيت باللغة الإنجليزية؟ ويرجعوا يقولوا عايزينهم يفهوا عربى ويتكلموا عربى ومحدش يضحك عليهم فى بلادنـا … وفيه ناس بتعمل كده بصراحة فشخرة أيوه يعنى بيعملوا كده علشان فى بلادنا يتقال عليهم بيتكلموا إنجليزى … عقدة الخواجة يعنى .. يبقى الحل إننا نتكلم معاهم فى البيت عربى وعلى فكرة لما بأروح المدرسة عند أولادى دايما المدرسين يقولوا لنا كلموهم بلغة بلادكم وما تكلموهمش بالإنجليزي أبدا أبدا
ثالثــا : ناس كتير برضه هنا عرب بيودوا أولادهم مدرسة السبت أو الأحد للجامع وخلاص مرة واحدة فقط فى الأسبوع بدون متابعة منهم للواجب وحفظ القرآن وكده .. لو نفسنا فعلا ولادنا يفهموا عربى ويقرأوا عربى لازم نتعب ونبذل معاهم مجهود أكبر ونتابعهم ونقرأ معاهم وده بالتأكيد هيكون كويس لمستقبلهم إنهم بيفهموا أكثر من لغة كتابة وقراءة وكمان محادثــة
أنا عارفة إنه صعب ومرات الواحد يكون متحمس ومرات تانية الظروف بتخلينا تعبانين وكسلانين .. سواء ظروف الحياة .. الإكتئاب .. الظروف الإقتصادية والمادية وخلافه .. أنا مثلا توقفت تماما فترة طويلة كنت فيها حامل ولما رزقنى الله بطفلى الثالث .. لكن إن شاء الله مش هأعملها تانى
علشــان كده إن شــاء الله أنا هأحط أوراق عمل من إجتهادى الشخصى للأطفال علشان اللى حابب يشتغل معاهم فى البيت أو لو حبيتوا تشتغلوا أكثر مع مدرســة الجامع
وربنا يوفق وأسأل الله أن يتقبل منى هذا العمل وأسألكم الدعــاء لى ولأولادى بالهداية والتوفيق
Leave a Reply