إستكمالا لما بدأته معكم من قبل بخصوص بعض الأفكار لزيادة الدخل زيادة بسيطة
كنا بنتكلم فى السابق عن بيع كراكيب المنزل .. اليوم ميعادنا مع الجراج سيل واليارد سيل
الجراج سيل أو اليارد سيل للى ما يعرفهوش هو سيل بتعملوه فى حديقة منزلكم أو بيشترك فيه
مجموعة من الجيران .. بيعملوا جراج سيل .. زى سوق بتبيعوا فيه كل حاجة مش محتاجينها فى البيت
لعب … مجلات … ملابس بكافة الماركات والمقاسات .. أدوات مطبخ .. أدوات كهربائية وهكذا
وهذه بعض من انصائح المفيدة لعمل جراج سيل ناجح
١- المكـــــان
مكان الجراج سيل مهم جدا جدا … يجب أن يكون فى مكان مزدحم ومعروف
لو عايشين فى منطقة نائية أو مكان بعيد عن الطرق الرئيسية .. حاولوا تشوفوا
أحد من أصحابكم يسكن فى منطقة أكثر إزدحاما مثلا وتستعيروا أو تأجروا
منه الجراج أو اليارد بتاعه فى يوم هم مش موجودين أو مسافرين مثلا أو حتى موجودين
٢- الزمـــــان
زى ما المكان مهم أيضا توقيت الجراج سيل مهم جدا جدا فمثلا لا تحاولوا عمل جراج سيل فى
أيام الصقيع الشتوية والثلوج وأيضا كذلك أيام الحر الرهيب إختاروا الشهور اللى بيكون فيها
الجو عندكم معتدل فى أغلب الأيام … أيضا راجعوا النشرات الجوية وإدخلوا على الويب
سايت بتاع النيوز أو الويذر تشانيل للتأكد من أنها لن تمطر فى اليوم الموعود
أيضا لاحظت فى منطقتنا إن الويك إند هو أحسن وقت نعمل فيه جراج سيل .. راجعوا المنطقة
بتاعتكم وشوفوا فى الكريجزليست تقدروا تعرفوا الجراج سيل الناس بيعملواه إمتى تقريبا
٣- العمــل الجماعــــى
كلما زاد عدد الأشياء المعروضه فى الجراج سيل كلما زادت أعداد الزبائن
وبالتالى المشتروات إعملوا والتى فاميلى جراج سيل إستفيدوا إنتم وأصدقائكم
على شرط كل واحد تكون أغراضه بجانب ويآخد باله منها كمان كل واحد يهتم بفلوسه
لأ توزيع الفلوس بعد البيع بيكون صعب جدا فكل واحد يخلى باله من حاجته ويلم فلوسه بنفسه
أضمن بكتير وإختاروا الباك يارد الأوسع فى منازلكم وكمان اللى موقعها أحسن
٤- الإعلان … الإعلان .. الإعلان
الإعلان عن الجراج سيل بتاعكم مهم جدا ممكن تعلنوا فى الجريدة المحلية وده
هيكلفكم حوالى ٣٠ دولار للإعلان لمدة ٣ أيام .. وفى الغالب الإعلان فى
الجريدة المحلية على الإنترنت يكون مجانى … وأيضا مهم جدا الإعلان بكريجز ليست
ناس كتير من اللى بيحبوا يروحوا الجراج سيل بيدوروا فى الكريجزليست أولا
٥- طريقة وكيفية عرض المعروضــات
ودى خطوة مهمة جدا جدا قبل يوم الجراج سيل لازم تعرفوا بالظبط هتعملوا إيه
لازم نشوف إزاى هنعرض اللعب والملابس وادوات المطبخ وخلافه لازم تعملوا إسكتش كده
يكون فيه طريقة وأماكن عرض المعروضات وتشوفوا إذا كنتم هتحتاجوا طاولات إضافيه أو صناديق أو أو
٦- عمــــل اللافتـــــات
مهم جدا اللافتات تكون واضحة بخط كبير وواضح للمارين بالسيارات من جوارهــا
كمان ما يكونش فيها كلام كتير لأن الراكبين بالسيارات ما فيش وقت يقرأوا كلام كتير
يكون بها سهم للإشارة إلى المكان يمين شمال أو على طول ويكون واضح وكبير
ويكون تحته مكتوب المواعيد من كذا لكذا أيام إيه بالظبط وفيه شوية نقاط يجب مراعاتها
حددوا مين اللى هيعمل اللافتات ويخلصها إمتى بوضوح ::
أيضا حددوا مين اللى هيقوم بوضع اللافتات بالشوارع وأى شوارع ::
ولازم تتأكدوا من المدينة أولا شروط وضع اللافتات بعضهم يمنع وضعها على الأشجار أو الإشارات ::
فلازم تتأكدوا الأول من ضوابط وضع اللافتات وإلا تعرضتم لغرامة
٧- وضــع الأسعـــار
يجب وضع الأسعــار وبوضوح على المعروضــات وخليكم مستعدين للتفاوض
أيضا أحب ألفت إنتباهكم إن القادمين للجراج سيل عايزين يشتروا أغراض بأسعار
زهيدة تشعرهم إنهم أخدوا صفقة ناجحة علشان كده ما تحطوش أسعار عالية لأنها
مش هتتباع وبدل ما الكراكيب مركونة فى البيت من الأفضل التخلص منها ولو بسعر
أقل بكثير مما إشتريم به
٨- صندوق للنقـــود
لازم يكون معاكم صندوق للنقود وخلو فيه شوية فكة يعنى كوراترز ودايمز وكده
كمان لازم يكون فيه حد متفرغ للصندوق ده ويكون معاه ورقة وقلم لتدوين
كل ما يتم بيعه وبكام لسهولة الحساب بالنهاية
٩- عروض آخـــر السيل
فى آخر السيل نقول مثلا آخر ٣ ساعات أو أكثر ممكن تعملوا عروض
مثلا كل شئ بنصف الثمن أو تقوموا بوضع صندوق كبير وتكتبوا عليه كل شئ
ب ١٠ سنت أو تجيبوا أكياس بلاستيك وتقولوا إملئوا الكيس ب ٥ دولار .. وهكذا للتشجيع
١٠ – الليمون والكوكيـــز
ما تنسوش طبعا ستاند لليمون والكوكيز المصنوعة بالبيت ولو الجو بارد يمكنكم بيع
القهوة والهوت تشوكليت وأيضا البانكيك الساخن الطازج كل ده يباع سريعا فى الجراج
واليارد سيل … وفرصة لتعليم الأطفال طرق بسيطة لكسب المال وتعليمهم التعامل مع الكبار
والبيع عد الفلوس وحسابها بطريقة صحيحة ودى حاجة بتبسطهم جدا جدا وتعليميا مفيدة جدا جدا
دى كانت مجموعة من النصائح اللى أتمنى تفيدكم لو قررتم تعملوا جراج سيل
Photos credits here and here
لقراءة باقى المجموعـــة
مقدمــــة
أفكـار لزيادة الدخل – سواج باكس ج١
أفكـار لزيادة الدخل – سواج باكس ج٢
أفكـار لزيادة الدخل – سواج باكس ج٣
أفكـار لزيادة الدخل – بيع كراكيب البيت
أفكـار لزيادة الدخل – بيع كراكيب البيت- ٧ نصائح مهمة
أفكار بسيطة لزيادة الدخل – بيع كراكيب المنزل – كريجز ليست
أفكـار بسيطة لزيادة الدخل – بيع كراكيب المنزل – أسواق البيع للغير
أفكار بسيطة لزيادة الدخل – بيع كراكيب المنزل – الجراج سيل ١٠ نصائح
Jingit – أفكار بسيطة لزيادة الدخل
Mechanical Turk أفكار بسيطة لزيادة الدخل
[…] […]