السلام عليكم … المرة اللى فاتت إتكلمت معاكم عن بعض الملاحظات التى تؤخذ فى الإعتبار
عند شراءنا للملابس وبالذات ملابس وأغراض الأطفال لغرض بيعها بعد الإستعمال والإستفادة منها
عايزة أقول لكم إن طبعا لو نقدر ندى الملابس دى لحد تانى مثل الأصدقاء والمعارف للإستفادة
بيها هيكون بالتأكيد خطوة أحسن لكن لو مفيش عندكم حد فعلا يستفيد بيها يبقى ممكن قبل ما نتبرع
بيها نحاول نبيعها لو نقدر ونستفيد بتمنها أو نبيع الحاجات الغالية قوى أو الشيك والباقى تتبرعوا بيه
النهاردة هأكلمك عن طريقة من طرق بيع الملابس المستعملة وهى بيعها على كريج ليست
كلكم تقريبا تعرفوا كريجز ليست هو ويب سايت لبيع الأشياء المستعملة أو تقديم خدمات معينة
موجود بأغلب بلاد العالم وبالذات أمريكا وكندا تلاقى كل الولايات والمدن كمان ولا يتم فيه الشحن
يعنى فى الغالب يقوم المشترى بالمرور على البائع فى منزله أو مكان يتم الإتفاق عليه مسبقا.. اليوم هأقدم
لكم بعض النصائح لتحقيق أقصى إستفادة وللوصول لديل ناجح لبيع كراكيبكم فى الكريجز ليست
١- البحث المكثف
قبل ما ننط على كريجز ليست وتعملوا بوست للى عايزين تبيعوه إعملوا بحث الأول وإقعدوا شوية على
الإنترنت إعملوا بحث عن المنتج اللى عايزين تبيعوه اللى زيه بيتباع بكام فى منطقتكم … دوروا على
كريجزليست على أشياء مشابهة دوروا فى الإي باى .. إبحثوا فى كل المواقع علشان تقدروا تقدروا
التمن مظبوط بدون زيادة ولا نقصان وعلشان تشعروا إنكم فى الجانب الصحيح وتعملوا ديل كويسة
٢- الأمانة الأمانة الأمانة
مش عارفة أقولها كام مرة … الأمانة فى كل شئ نبيعه لو حاجة مبقعة أو مقطوع منها حته أو جزء
مش موجود أو أو حتى لو مش هيأثر على فعالية الشئ اللى بنبيعه خلينا نكون صريحين وعندنا أمانة
فى عرض الأشياء
٣- التصـــوير
كريجز ليست بيمنحكم الفرصة إنكم تحطوا ٤ صور بس … فلازم تآخدوا صور كتيرة وواضحة ومن عدة
زوايا للمنتج بالذات لو شئ غالى الثمن .. لأن الصور اللى مش واضحة أو لو حطينا صورة واحدة بتخلى
الناس تشك إننا بنخبى حاجة وده مش صحيح طبعا .. وإعرضوا إنكم تبعتوا صور زيادة بالإيميل حسب
يعنى اللى عايزين يشوفوا صور أكتر يبعتوا إيميل وإنتو تراسلوهم .. طبعا الحاجات تكون نضيفة ولو
ملابس يا ريت تكون مكوية ولو فيه أى عيب لازم نوضحه بالصور كويس .. خدوا لقطات كتيرة
وإختاروا أحسنها وأوضحها علشان تحطوه فى البوست
٤- العنــوان والتفاصيــل
عنوان البوست مهم لأنه بيقول إحنا بنبيع إيه بالظبط وكمان بيطلع فى عملية البحث للمشترى
علشان كده مهم إننا نحط كل الكى ووردز المهمة فى العنوان مثلا
2T Boy’s Clothes ( Gymboree, Children’s place, Disney ….etc)
Huge 2T Boy’s Clothes Lot ( GAP, NIKE,… and more)
وفى البوست من جوة نشرح بالتفصيل بس تو ذا بوينت يعنى ما قل ودل مش نقعد نحكى حكايات
وإشتريناها منين وجبناها بكام وكلام كلام … الناس بتكون مستعجلة عايزة تشوف المفيد نكتب
بالظبط مثلا كام تى شيرت والماركات .. كام بنطلون .. كام بيجاما وهكذا ولو فيه أى عيوب نوضحها
كمان فى كريجز ليست الصور بتظهر تحت الكتابة فممكن نشير للصور فى وسط الكتابة ونقول كما
هو مبين فى الصور بالأسفل ونكتب السعر وتأكدوا إنكم عايزين كاش فقط لأن فيه ناس ممكن تدفع
بشيك … لأ إكتبوا مثلا ٥٠ دولار وبعدها كلمة كاش بليز … حاولوا تغطوا كل الأسئلة اللى ممكن
الناس تسألها علشان تقللوا من عدد المكالمات اللى بتستفسر عن البضاعة المباعة
٥- إعرضوا يوم السبت والثلاثاء باكرا
كريجز ليست بتسمح لكم بإعادة عرض البضاعة كل ٣ أيام وأحسن الأيام هى السبت باكرا
وبالتالى الإعادة تكون الثلاثاء باكرا أيضا
٦- المـــرونـــة
لو فيه بضاعة ليكم عرضتوها مثلا بـ ٥٠ دولار وكلمكم شخص لكن عايز يفاصل خللى عندكم مساحة
للمرونة فى السعر يعنى مثلا حطوا فى بالكم تتحركوا فى مدى معين من السعر فلو قال لكم الشخص
٤٥ قولوا ما ينفعش ٤٧ لو قال آه يبقى حلال علينا الديل لو قال هيبقى صعب ممكن توافقوا أو
تقولوا له طيب أصل فيه واحد تانى كلمنا وهيرد علينا بكرة لمجرد إنكم تدوا نفسكم فرصة يمكن
يطلع مشترى أحسن أو قولوا له على بلاطة لو ما ظهرش لنا مشترى أحسن فى خلال يومين يبقى
حلال عليك … كده يعنى مرونة فى البيع والشراء
٧- التواجـــد للرد على الأسئلة
لو مش هتحطوا التليفون بتاعكم يبقى ما تحطوش الإعلان وتخرجوا برة طول اليوم من غير
ما تتابعوا الإيميلات لأن الناس بتبعت تستفسر وبتبقى عايزة الرد سريعا وإلا هيشوف غيركم
٨- حددوا ميعاد وزمان للمقابلة خارج المنزل
أفضل دااائما لقاء المشتريين فى مكان عام … أولا لأننا مش عارفين أى نوع من البشر هيشترى
وبالتالى مش أمان إننا نورى حد مكان البيت بتاعنا ثانيا بيكون أسهل إنكم تقولوا للشخص قابلنا
فى ماكدونالدز اللى فى الشارع الفلانى أو عند المكتبة العامة الفلانية .. الأماكن العامة سهل الوصول
ليها دااائما
٩- إعلان … إعادة إعلان … إعادة إعلان … إعادة نظـــر
نعما الإعلان وفى رأيي الشخصى نعمل إعادة إعلان مرتين فقط وإذا لم تباع البضاعة لازم نعيد النظر
فى الإعلان يمكن السعر مرتفع أو يمكن البضاعة مش كويسة أو مش وقتها أو مفيش عليها طلب دلوقتى
زى مثلا لو حاولنا نبيع هدوم شتوى على بداية الصيف إختيار خاطئ للتوقيت أو بنبيع طقم مثلا
للبيبيى ب ١٠ دولار وإحنا مشتريينه ب ١٢ دولار مش معقول كده السعر مرتفع جدا
فى النهايــــة أحب أقول لكم إن الموضوع بيآخد وقت ومجهود وبحث لكن هو فى الآخر مجزى
يعنى أنا الصيف اللى فات بعت مجموعة من ملابس أطفال ب ٦٠ دولار كانت مركونة وكنت
هأعزل وأسيب البيت بدل ما أشيلها وأحطها فى كراتين وأرجع تانى أركنها بعتها وإستفدت
بالفلوس .. كمان عايزة أقول لكم ممكن جدا المشترى ما يظهرش أو يغير رأيه بصراحة
حصلت لى وكنت متغاظة جدا لأن المشترى ما إتكلمش يعتذر ودى بتكون قلة ذوق جامدة
علشان كده إتأكدوا أكتر من مرة وقبل ما تنزلوا من البيت إتصلوا بالمشترى وأكدوا معاه الميعاد
ولو ما ردش على الإيميل أو التليفون ما تتعبوش نفسكم وبلاش تنزلــوا من أســاســه
وأتمنى لكم حظ سعيد على كريجز ليست
لقراءة باقى المجموعـــة
مقدمــــة
أفكـار لزيادة الدخل – سواج باكس ج١
أفكـار لزيادة الدخل – سواج باكس ج٢
أفكـار لزيادة الدخل – سواج باكس ج٣
أفكـار لزيادة الدخل – بيع كراكيب البيت
أفكـار لزيادة الدخل – بيع كراكيب البيت- ٧ نصائح مهمة
أفكار بسيطة لزيادة الدخل – بيع كراكيب المنزل – كريجز ليست
أفكـار بسيطة لزيادة الدخل – بيع كراكيب المنزل – أسواق البيع للغير
أفكار بسيطة لزيادة الدخل – بيع كراكيب المنزل – الجراج سيل ١٠ نصائح
Jingit – أفكار بسيطة لزيادة الدخل
Mechanical Turk أفكار بسيطة لزيادة الدخل
ibotta أفكار بسيطة لزيادة الدخل – من
[…] اللى فاتت إتكلمنا عن البيع على كريجز ليست وبعض الملحوظات عليه وطرق الإستفادة […]