المرة اللى فاتت إتكلمنا عن إيه هى كراكيب البيت بالظبط اللى ممكن نبيعها
وعرفنا إن كراكيب بيتنا هى أى وكل شئ مر عليه سيزون بدون إستخدام
يا إما إنها شئ بقى مقاسه مش مناسب أو الموضة بتاعته راحت أو مثلا مش عاجبنا وهكذا
ولو عايزين نضمن إننا مش هنستخدمه يبقى أى شئ مر عليه سنة كاملة بدون إستخدام
يبقى فى الحالة دى مالهوش لازمة عندما ويجب التخلص منه
وقبل ما أقول لكم هنعمل إيه فيهم أحب أقدم لكم شوية نصائح مهمة من تجربتى فى بيع ملابس أولادى
١- إشتروا الماركـــات المعروفـــة
دايما حاولوا تشتروا الماركات المعروفة والمشهورة لأنها أسرع بالتأكيد فى البيع ومنها مثلا
Gymboree, GAP, Children’s Place, NIKE, Carter’s, OshKosh …. etc
وطبعا مش محتاجين توصية إن الماركات دى ما تشتروش منها إلا فى الكليرانس والتخفيضات العاليــة
٢- إيـــاكم والبقــــع
أنا عارفة إن موضوع البقع ده صعب السيطرةعليه بالذات مع الأطفال مرة شيكولاتة .. آيس كريم
صوص الإسباجيتى ألوان فى المدرسة وهكذا .. لكن حاولوا تعالجوا البقع فور حدوثها وقبل الغسيل
إنقعوا الهدوم كويس قبل الغسيل فى الغسالة .. البقع أول وأشرس عدو ضد بيع الملابس
محدش هيشترى هدوم مبقعة ولو كانت رخيصة وصعب عرضها فى محلات ومعارض البيع
للغيــر .. ويا ريت نكون حريصين شوية يعنى مش لازم لما نكون رايحين عيد ميلاد واللا
البارك وهنلعب ونتبهدل نلبس الحاجات الغالية نشوف حاجة من ولمارت واللا تارجت أنضف شوية
٣- غسيــل الملابس قبل التخزيــن
إحرصوا أيضــا على غسيل الملابس جيدا قبل التخزين .. الملابس المتسخة أو اللى فيها بقع
من الصعب تنظيفها بعد التخزين لمدد طويلــة
٤- البــرايس تــــاج
ما حدش يشيل البرايس تاج من أى شئ إلا عند الإستخدام والتأكد منها
الملابس الجديدة تباع بأسعار رائعة وممكن تصل إلى سعر اعلى من اللى إشتريتوه بيها
٥- مكونات الألعــاب و قطع البازل
إحرصــوا أيضا على لم قطع اللعب كلها وتعويد الأطفال على لمها بعد اللعب
ده بيفرق كتير لما بيكبروا أو بيزهقوا من لعبة معينة إننا بنلاقى القطع بسهولة وبنقدر نبيعها
ونستفيد من تمنها ونشترى لهم لعبة جديدة بدالها
٦- علــب وكراتيــن التغليــف الأصلية
حاولوا الحفاظ على الكراتين الأصلية والأكياس والعلب اللى كنتم مشتريين فيها الحاجات
بتفرق قوى لما نبيع الحاجات فى كراتينها الأصلية حتى لو كانت مستعملة وجود أكياس
التغليف الأصلية بيبين إن إحنا محافظين عليها كويس ومش مبهدلين الحاجات بتاعتنا
٧- الشمـــاعـــات
قبل كده لما كنت بأشترى ملابس ويسألونى فى المحل عايزة الشماعات كان ردى
دائما لأ … لأنى كنت بأحس إنها بتكركب الدنيا ومالهاش لازمة
لما بدأت أبيع الملابس بتاعة الأولاد بنحتاج كمية كبيرة من الشماعات لذا إحرصوا
إنكم تآخدوا الشماعات دائما وعلى الأقل هتكون فرى وده لوحده كفاية بدل ما نضطر نشترى
دى كانت مجموعة من الملاحظات والنصائح اللى تعلمتها وبأتبعها عند الشراء
أتمنى أكون أفدتكم ويا ريت لو حد عنده ملحوظة ممكن تفيدنا يقول لنـــا
ورمضـــان كريم عليكم
لقراءة باقى المجموعـــة
مقدمــــة
أفكـار لزيادة الدخل – سواج باكس ج١
أفكـار لزيادة الدخل – سواج باكس ج٢
أفكـار لزيادة الدخل – سواج باكس ج٣
أفكـار لزيادة الدخل – بيع كراكيب البيت
أفكـار لزيادة الدخل – بيع كراكيب البيت- ٧ نصائح مهمة
أفكار بسيطة لزيادة الدخل – بيع كراكيب المنزل – كريجز ليست
أفكـار بسيطة لزيادة الدخل – بيع كراكيب المنزل – أسواق البيع للغير
أفكار بسيطة لزيادة الدخل – بيع كراكيب المنزل – الجراج سيل ١٠ نصائح
Jingit – أفكار بسيطة لزيادة الدخل
Mechanical Turk أفكار بسيطة لزيادة الدخل
ibotta أفكار بسيطة لزيادة الدخل – من
[…] عليكم … المرة اللى فاتت إتكلمت معاكم عن بعض الملاحظات التى تؤخذ فى […]