المرة اللى فاتت إتكلمنا عن إيه هو مخزون السلع ده وإزاى ممكن يوفر لنا فلوس
النهاردة هنبدأ نتكلم عن إزاى ممكن نبدأ الخطوة دى
أولا : خصصوا من ميزانيتكم مبلغ بسيط فى البداية
ممكن مثلا ٥ أو ١٠ دولار كل أسبوع وممكن أقل أو أكتر بس فى الأول ما تفتحويش فى المبلغ علشان ما تلاقوش نفسكم مزنوقين فى الميزانية آخر الشهر
وحاولوا تبصوا كويس على العروض فى منطقتكم وتتابعونا هنا وأول ما تلاقوا عرض حلو فتشوا عن كوبون ليه لو مش لاقيين إبعتوا لى أفتش معاكم يمكن أقدر أساعد
طيب لو مش لاقين عرض الأسبوع ده؟ يبقى وفروا المبلغ للأسبوع اللى بعده أو اللى بعده وهكذا
المهم ما تصرفوش الفلوس وتتحوش لغاية أما نلاقى عرض بسعر قليل زى ما قلنا
ثانيا : فيه ناس عايشين فى شقق صغيرة أو مش لاقيين مكان يعملوا فيه ستوكينج
ببساطة هأرد عليكم وأقول الحاجة أم الإختراع … واللى عايز هيلاقى مكان … طيب فين؟ إليكم بعض الإقتراحات
١- دولاب الأولاد: لو أولادكم صغيرين وملابسهم مش بتآخد مكان كبير ممكن نخزن فى الرف العلوى فى الدولاب علشان ما مش هيعرفوا يوصلوا له
٢- دولاب البياضات أو المفارش اللى بيكون فى الحمام – غالبا- ممكن نخزن الملايات والفوط فى أكياس الشفط أو فى أدراج تحت السرير ونستغل الدولاب كمخزن
٣- غرفة نوم غير مستعملة – غرفة الضيوف– لو عندك غرفة غير مستعملة إستخدميها كمخزن أو حتى إستخدمى الدولاب بتاعها فقط
٤- حمام إستخدامكم له قليل ممكن تقفلوه خالص ويستخدم كمخزن أو ممكن البانيو فقط يمنع إستخدامه وتحطوا فيه الأدراج البلاستيك بتكون وحدات مثلا ٣ أو ٤ أدراج مع بعض وقابلة للزيادة وتوضع فى البانيو وإقفلوا الستارة وممنوع الدخول فى البانيو ده
٥- تحت حوض المطبخ أو الحمامات تحت الحوض بتاعها ممكن يتم تخزين مواد كتيرة
٦- تحت السراير … إرفعوا السراير قليلا عن الأرض – فيه حاجات بتتباع لرفع السراير عن الأرض أو ممكن بعض القطع الخشبية- وخزنوا تحتها الشامبوهات والكريمات والسيريال وما شابه . وخللوا بالكم ما تخزنوش الشيبسى والحلويات تحت سراير الأولاد طبعا عارفين مصيرها هيكون فين
يعنى المهم نتصرف ونحاول بأقصى صورة نلاقى مكان نخزن فيه
وأخيرا بعض الملاحظات الهامة
حاولوا دائما أن يكون التخزين فى الأماكن الباردة – يستحسن فى البيسمنت أو البدروم- لكن نخلى بالنا يكون بعيد عن أى مواسير مياة وبعيد عن أى أجهزة أو مصدر للحرارة زى الهيتر وما شابه
ظروف التخزين مهمة كل ما تكون درجة الحرارة عالية والرطوبة عالية تقل مدة التخزين
حاولوا دائما إستهلاك القديم ثم الحديث … دائما القديم يتم تخزينة أمام أو فوق الحديث ولا نستخدم أى شئ إنتهت صلاحيته
لا تحاولوا أبدا التخزين من المنتجات التى قربت إنتهاء صلاحيتها وعليها عروض إلا إذا كنتم متأكدين من إستعمالها قبل إنتهاء الصلاحية
وإحنا بنشترى دايما نآخد المنتج اللى علبته نضيفة مفيش عليها تراب – علامة على القدم- مش مخبوطة مثلا ولا معووجة وهكذا يعنى إختارو للمخزن أحسن المنتجات
بكده اكون أنا خلصت موضوع الستوكينج أو التخزين يا ريت لو فيه حد عنده معلومة يحب يضيفها يقول لنا عليها
وجزاكم الله خيرا
Leave a Reply