من يومين كان أولادى عايزين يعملوا مفاجأه لوالدهم
وفى الغالب أنا اللى بأتعب فى المفاجآت اللى من النوع ده المرة دى قررت إنهم يعملوا حاجة صنع إيديهم
وبعد الدراسة والتمحيص والفحص وطبعا عايزة شئ غير مكلف ويكون فى البيت قررت إنهم يعملوا حاجة بالعجينة المالحة
العجينة دى زى الصلصال لكن مفيش منها خطورة سمية أبدا لأنها ملح ودقيق وميه وبس
وبعد التشكيل تتحط فى الفرن لمدة حسب سمك التشكيل اللى معمول
تعالوا نشوف عملنا إيه
أولا مقادير العجينة
٤/١ كوب ملح
٤/١ كوب ماء
٢/١ كوب دقيق
الطريقة
فى وعاء عميق يخلط الملح مع الدقيق
لو عايزة العجينة ملونة
أضيفى ألون طعام للماء قبل إضافته للمكونات الناشفة
ثم إعجنى وخلى الأولاد يعجنوا بذمة وضمير هيتبسطوا من المرحلة دى
وبعدين سيبيهم يبدعوا ويشكلوا براحتهم
جابوا حصى صغير من برة البيت وبيرسموا بيه ويعملوا نقوش
ثم يدخل فرن مسخن مسبقا على درجة ٢٥٠ فهرنهايت
يترك من ساعة ونصف لساعتين ( سمك القطع اللى عملناها حوالى ١ سم) لو القطع أتخن تآخد وقت أكبر
ودى النتيجة النهائية
Leave a Reply