بعد ما عرفنا فوائد التخطيط للمنيو سواء أسبوعية أو نصف شهرية أو شهرية عايزين نعرف إزاى ممكن نخطط للمنيو
فى الأول الموضوع هيكون صعب ومجرد التفكير فيه يزهق يعنى أنا بأصحى من النوم مش عارفة هنآكل إيه النهاردة إزاى أخطط لشهر واللا أسبوعين واللا حتى أسبوع
تعالى بس واحدة واحدة وبلاش يأس من أولها كل حاجة بتكون صعب فى الأول
أولا: بصى كويس فى المخزن بتاعك
المخزن اللى هو دولاب الخزين بتاع الأكل بتاعك أو الـبانترى فيه … مكرونة … رز … صلصة … جبنة فيلادلفيا… فول … وهكذا
كمان بصى على الفريزر بتاعك فيه لحمة واللا فراخ واللا سمك واللا مفيش خالص ..فيه مثلا أكياس خضار بسلة … خضار مشكل
الحاجات دى هتديلك فكرة مبدئية عن الأصناف اللى ممكن تطبخيها فى الفترة
ثانيا: راجعى الفلاير بتاعة الأسبوع
العروص عادة بتيجى بالبريد لكن برضه فى الغالب هتلاقيها أونلاين فى السايت بتاع الستور
تارجت- كينج سوبرز- ألبرتسون وهكذا
أغلب العروض الحلوة بتكون فى أول صفحة وطبعا هم بيعملوا كده علشان تيجى وتشترى كل طلباتك وبالتالى يعوضوا السعر فى باقى
المنتجات … خليكى واخدة بالك من الأسعار ( ده هيآخد وقت شوية منك على ما تعرفى السعر بتاع أغلب المشتروات) لكن مش ضرورى
كل حاجة تبقى من نفس الستور وكمان إعقليها من ناحية البنزين لو روحتى كذا ستور بعيد عن بعض
ثالثا: إعملى ليستة بالمكونات اللى ناقصة ليكى وراجعى كوبوناتك علشان تجيبى الحاجات بسعر رخيص
لو ما لاقيتيش كوبون على المكونات اللى ناقصة حاولى تغيرى الوصفة أو تستبدليها بقدر الإمكان بمكونات أخرى
ودى وسائل مساعدة
ده ويب سايت ظريف جدا ممكن تعملى فيه بحث على وصفة بالمكونات اللى عندك والمكونات اللى مش عايزاها كمان
من هنــــــــــا
وفيه مواقع كتيرة بتساعد على إنك تعملى المنيو بتاعتك وكمان على حسب العروض اللى فى المنطقة وحسب الستور كمان
ومنها المجانى ومنها اللى بإشتراك زى مثلا
بلان تو إيت بإشتراك وفيه ٣٠ يوم تجربة مجانى
ميلز ماتر أعتقد إنه مجانى
إيميلز بإشتراك
فود أون ذا تابل مجانى وأنا جربت عملت فيه إشتراك
رابعا : جهزى المنيو وراجعى المكونات والكوبونات والمطلوب وإنطلقى لشراء ما تحتاجينه
فيه طريقة تانية للتخطيط للمنيو إتبعتها فترة من الزمن بإنك تحددى الأيام
يعنى مثلا أنا كنت عاملة إنى أطبخ ل ٤ أيام فقط فى الأسبوع لحمة أو فراخ مع خضار … اللى موجود واللى عليه عرض
دول اللإثنين – الثلاثاء- الأربعاء- الخميس
يوم الجمعة يبقى بواقى الأسبوع
يوم السبت سمك
يوم الأحد مرة بيتزا ومرة فول وطعمية أو هوت دوج وهامبرجر
أو ممكن تعملى مثلا
الإثنين : يوم المكرونة
الثلاثاء: سمك
الأربعاء :أرز وخضار ولحمة أو فراخ
الخميس : بيتزا
الجمعة: بواقى ألأكل
السبت : شاندوتشات خفيفة
الأحد : جربى طبق جديد أو مثلا يكون يوم أكل نباتى بدون لحوم
جربى كل شوية طريقة لغاية لما تعرفى إيه المناسب ليكى والمناسب لأسرتك وأطفالك وممكن المناسب ليكى دلوقتى كمان شوية ما يبقاش
مناسب مثلا أطفالك كبروا ومحتاجين أكلات معينة أو تغير فى نظام الحياة أو تغير الفصول زى مثلا فى الصيف نجب الأكلات الخفيفة وهكذا
خليكى مرنة المهم يكون فيه تخطيط
لقراءة باقى الخطوات
الخطوة الأولى : إستخدام الكوبونات من فين أجيب الكوبونات ؟ أمريكـــا – كنــدا
الخطوة الثانية : لعبة الصيدلية ج١ – ج٢– ج٣
الخطوة الثالثة : تحديد الميزانية الأسبوعية أو الشهرية والإلتزام بها
الخطوة الرابعة : التخطيط للمنيو ج١ – ج٢
الخطوة الخامسة : عمل مخزون المواد الغذائية ج١ – ج٢
SUPERMAMY says
انا مش عارفه احط السؤال دا فين معليش لو مكانه غلط …. بصي يا ستي مع الغلاء اللي كل ماله طالع ازاي اعمل ميزانيه تكون وسط يعني ولا هي ماسكه و لا هي مبزره يعني ايه المفروض يتعمل ؟؟؟ او ايه هي الاساسيات
moghtarebah says
بصى أنا أعتقد إنك عايشة هنا فى أمريكا أو كندا … مفيش حد هيقول لك تصرفى كام لكن بالتأكيد فيه حدود لكل شئ وكله بيكون على حسب عدد أفراد الأسرة أعمار الأولاد يعنى سنهم .. الأولاد فى فترة المراهقة بالذات الذكور بيآكلوا كتير ما شاء الله .. المهم هأديلك ويب سايت بيساعدك شوية بتتغير فيه الأرقام كل شهر تبع الحكومة هنا بأمريكا وأعتقد كندا تتقريبا نفس المعدل والله أعلم هنـــــا
moghtarebah says
نسيت أقول لك إن الويب سايت ده بيتكلم فقط عن الأكل تكلفة الأكل فقط مش اللبس بقى والأدوية وخلافه … دى كلها حاجات مش محسوبة